“Ohcejoga luondu lea erenomáš” - Juha ja Auli loaktiba barttas Deatnoleagis measta njealjátoasi jagis
Boaimmáš girddaša bartta meattá Deanu ala, skivveha Norgga beale duoddariid guvlui ja njurggodišgoahtá. – Besse návddašit fiinna luonddus man besse oaidnit ja gullat lássaráigge ja terássas, rápmusteaba Deatnogátti bartaeaiggát guovttos Juha Halttunen ja Auli Holmberg seammás go geahčadeaba stuorra lotti girddašeamen. Sudno fásta ruovttut leat Helssegis, muhto Ohcejogas soai loaktiba guokte, golbma mánotbaji jagis. – Letne dáppe dábálaččat juovllaid, beassážiid ja loahppagease, go čuoikaáigi lea meattá.
Oasseáiggeealáhatolmmoš ja fitnodateaiggát Juha lea johtán Deatnogáttis luossabivddus jo 1990-logu rájes. – Huksensadji mus leamašan badjel guoktelot jagi, go osten tontte Deatnoleagis1990-logu loahpas Valle Niillasis, fitnodateaiggát Petteri Valle áhčis. Valle fitnodatbearaš lea šaddan oahpisin jagiid mielde, ja singuin maiddái ovttasbargat. Guhká smihtten ahte maid áiggun huksensajiin, muhto viimmát iežas barta gárvánii juovllaide 2021. Dál go lean geahpedan bargguid, de asttan leat eanet dáppe. Maiddái gáiddusbargu lihkostuvvá buori neahttaoktavuođa bokte.
Govva: Petteri Valle
Aulis leat vel jagit ealáhatahkái, muhto luomuidis áigge son loaktá duođaid bures Deatnogáttis ja duoddariid askkis. Son maid sáhttá bargat oasi bargguin gáiddusin. – Dál borgemánus vuojadin iđidiid ja eahkediid Deanus, go iđitvuojádemiin gorut ja miella lihkket buot buoremusat ođđa beaivái. Dat ráfi, buhtes luondu, muorjjit ja guobbarat ja čáppa luondu ja duovdagat iešguđet jagiáiggiid ráfáidahttet miela – sáhtán dadjat ahte Ohcejohka lea čábbodagas dáfus duođaid áidnalunddot báiki.
Goappašagat buđaldeaba iežaska áššiid barttas. Auli johtá olu luonddus, sihkkelastá, fitná Giissás káfestallamin ja oastimin láibbi. Maiddái kirkostobuin ja kirkus lea somá ain finadit. Ovttas serve dáhpáhusaide ja dilálašvuođaide mat lágiduvvojit Ohcejogas. – Geavahetne báikkálaš bálvalusaid nu olu go lea vejolaš, dadjá Juha. – Bartta huksemis vástidii báikkálaš huksenfitnodateaiggát, gean ávžžuhin skáhppot buot huksemii dárbbašlaš bálvalusaid báikkálaččain.
– Letne searvan báikkálaččaid ordnen prográmmabálvalusaide: letne mellon ja govdon jogas, fitnan gonagasreabbásafáriin Norgga bealde ja návddašan báikkálaš restoráŋŋaid herskuid. Hotelli Utsjoki ja Pub Rastigaisa heaitin orru váivi, go doppe maid láviime fitnat dávjá. Giđđadálvve čuige ja vudje gielkkáin duoddarjávrriid bivdit.
Govva: Auli Holmberg
Dál Juha astá fitnat maiddái guhkit tuvrrain. – Imaštallen, go Juha ii leat guolástantuvrrain fitnan vaikko Áilegasas dahje Norgga bealde. Guolásteapmi lea gusto leamašan nu intensiiva doaibma sávdnumiiguin, ahte eará ii leat guollebivddu lassin astan, árvala Auli. – Moai letne dál vuojašan Norgga beale gilážiin, vuonain ja mearragáttis, ja dát vejolašvuođat lasihit Ohcejoga geasuhanfámu!
– Dáid ságain moai áigo leat eambbo dáppe. Barta lea ordnejuvvon nu ahte dan sáhttá láigohit maiddái turisttaide. Valle fitnodat láigoha munno bartta áššehasaide, geat gáibidit iežaset ráfi, muhto dakkár áššehasat eai boađe go 3-4 geardde jagis. Moai áigo hukset vel lasi, muhto ođđa huksenprošeavttaid áigi lea vehá maŋŋelis.
