Ohcejogas leat vuordevaš mielain– Lapha ássiideahkedis gulle guhkes áigái buriid ođđasiid

Lappi buresveadjinguovlu ordnii ohcejohkalaččaide ássiideahkeda duorastaga 10.9. Báikki ala váldostivrasálii ledje čoahkkanan sullii golbmalot gielddaolbmo ja seamma olu ledje oassálastit gáiddusoktavuođa bokte. Báikki alde lei maiddái Lapha sámegiel lávdegotti ságadoalli Ara Aikio, guhte rabai dilálašvuođa ovttas gielddahoavda Päivi Kontioin. Ohcejoga dilálašvuohta dollojuvvui sihke sáme- ja suomagillii.

Sámesoteguovddáš álggaha Ohcejogas golggotmánu álggus ja dan bálvalanhoavdan lea válljejuvvon Uhca Paadar Ristena Raisa, Raisa Similä, guhte buvttii iežas dearvvuođaid gielddaolbmuide. Girkosiidda guovllu eallilan olbmuid bálvalusat, ruoktobuohcceviessu ja dearvvasvuođaguovddáža vuostáiváldin ovttastuvvet.  Ulbmilin lea sihkkarastit ahte Ohcejogas gávdnojit bargit ja bálvalusat. Ruoktobuohcceviessodoaibma álgá bottu maŋŋá golggotmánus. Ruoktobuohcceviessu vuolgá johtui muttuid mielde ja dat doaibmá olles gielddas.

Sámegielat ja sámekulturvuđot sosiála- ja dearvvavuođabálvalusaid ovddasvástádusovttadaga jođiheaddji Tuuli Miettunen deattuhii iežas ovdanbuktimis, ahte sámegiel bálvalusaid háliidit nannet Ohcejogas. Áiddo dál Ohcejohkii ohcet gilibargi, guhte bargá nugo ovddit Auttaja-Aslak. Ohcanláhkai bohtet lagašdivššáriid báikkit Gáregasnjárgii ja Ohcejohkii. Maiddái lagašdivššára oahpposoahpamušskuvlejupmi lea vejolaš.

Gielda ja Lapha plánejit dál ovttasbarggu oahppoloatnabuhttema márkanastimii, mainna áigot geasuhit bargiid. Ovttasbarggu gieldda ja buresveadjinguovllu gaskkas háliidit muđuige nannet.

Gielddaolbmuid sáhkavuoruin bođii ovdan fuolla earret eará eallilan olbmuid virkkosmandoaimmain, sáhttobálvalusain, bargiid máhtus ja mo áššehasaiguin láhttejit. Ovtta gielddaolbmo kommeantta mielde sámegiela dehálut ášši lea dat, mo olbmuiguin láhttejit. Maiddái Norgga beale bálvalusat bohciidahtte gažaldagaid.

– Bázii duođai buorre miella ássiiddilálašvuođas, lohká gielddahoavda Päivi Kontio. – Lapha čielgasit bidjá návccaid dasa ahte Ohcejogas leat bálvalusat ja ahte dat doibmet. Jo dat ahte Ohcejoga bálvalusaid boahtá stivret dušše okta hoavda, muitala áddejumi lassáneamis Lapha hálddahusas. Mii leat smávva searvvuš eatge mii gáibit dan ahte doaimmaid háddjejit máŋggaid sierra hoavddaid vuollái.

Lassedieđut

Gielddahoavda Päivi Kontio
040 744 7630
paivi.kontio@utsjoki.fi