Sámegielaid gáiddusoahpahusa pilohttaprošeavtta doaibmanmálle árvvoštallan gárvánan – Buresboahtin bohtosiid almmustahttindilálašvuhtii 18.1. Ohcejohnjálmmi skuvlii dahje Teamsii
2.1.2023
Ohcejoga gieldda ja Sámedikki oktasaš Sámegielaid gáiddusoahpahusa pilohttaprošeavtta doaibmanmálle árvvoštallan lea gárvánan, ja bohtosiid almmustahttindilálašvuohta lágiduvvo 18.1.2023 Ohcejogas.
Našuvnnalaš skuvlejumi árvvoštallanguovddáš (Karvi) lea doaimmahan sámegielaid (davvisáme-, anáraš-, ja nuortalašgiela) oahpahusa lágideaddji gáiddusoahpahuspilohta árvvoštallama jagi 2022. Árvvoštallamis leat čielggadan, mo borgemánus 2018 álggahuvvon gáiddusoahpahuspilohtta doaibmá oahpahusa ordnejeaddji, skuvllaid, oahpaheddjiid ja ohppiid dáfus. Čoggojuvvon dieđuid mielde Karvi lea čállán čoahkkáigeassoraportta doaibmanmálle joatkima suokkardallamii.
Árvvoštallama várás leat jearahallan gáiddusoahpahusprošeavtta bargiid, oahpahusa ordnejeddjiid, oahpaheddjiid ja ohppiid. Karvi árvvoštallanplána mielde gáiddusoahpahusprošeakta gullá ovttaveardásašvuođa ovddideami, oahppama ja máhtu lasiheami ja skuvlenvuogádaga buorideami fáttáide.
Bohtosiid almmustahttindilálašvuohta lágiduvvo Ohcejohnjálmmi skuvllas gaskavahku 18.1.2023 dii 16.00–19.00. Almmut iežat dilálašvuhtii maŋimustá 13.1.2023 https://link.webropolsurveys.com/S/411B1A5230C8A64F. Bohtosiid almmustahttindilálašvuođa sáhttá čuovvut maiddái gáiddusin Microsoft Teams bokte: Čuovo dilálašvuođa dákko.
Almmustahttindilálašvuođa prográmma
16.00 KÁFESTALLAN JA BURESBOAHTIN
čuvgehuslávdegotti ságadoalli Leevi Halonen, Ohcejohka
16.30 RAHPANSÁHKAVUORRU
ovttadaga jođiheaddji Salla Venäläinen, Našuvnnalaš skuvlejumi árvvoštallanguovddáš (Karvi)
16.40 SÁMEGIELAID GÁIDDUSOAHPAHUSPILOHTA ÁRVVOŠTALLAN: GUOVDDÁŠ BOHTOSAT
jođiheaddji árvvoštallanáššedovdi, prošeaktahoavda Marita Härmälä, Našuvnnalaš skuvlejumi árvvoštallanguovddáš (Karvi)
17.00 KOMMEANTASÁHKAVUORRU
oahpahusráđđi Anna Mikander, Oahpahus- ja kulturministeriija
17.15 BOHTOSIID SUOKKARDALLAN, panelaságastallan
oahpahusdoaimma bajitdárkkisteaddji Satu Pieski, Lappi guovlluhálddahusdoaimmahat
plánejeaddji Tiisu Näkkäläjärvi, Sámi oahpahusguovddáš
giella- ja kulturjoavkkuid koordináhtor Sirpa Tenhu, Oulu gávpot
Maiddái dilálašvuođa oassálastit sáhttet searvat ságastallamii.
Lassedieđut:
Marita Härmälä
Njunušárvvoštallanáššedovdi, Karvi
+358 29 533 5560
marita.harmala@karvi.fi
Hanna Helander
Prošeaktahoavda, Sámegielaid gáiddusoahpahusprošeakta
Ohcejoga gielda
+358 40 7012 094
hanna.helander@edu.utsjoki.fi
Sámegielaid gáiddusoahpahusprošeakta
Sámegielaid gáiddusoahpahusa pilohttaprošeavtta jođiha Ohcejoga gielda ja koordinere Sámediggi. Prošeavtta mihttomearrin lea fállat sámegielaid gáiddusoahpahusa vuođđoskuvlla ohppiide ja nuppi dási studeanttaide sámeguovllu gielddaid olggobeallái guokte vahkkodiimmu ja ovddidit sámegieloahpahusa pedagogihka. Gáiddusoahpahusprošeavtta oahpahus lea reálaáiggi oahpahus (nu gohčoduvvon synkronalaš oahpahus), mas oahpaheaddji ja oahppit oassálastet oahppodiibmui seamma áigge iežaset dihtoriiguin iešguđet guovllus.