Sámesodeguovddáš álggaha doaimmas Ohcejogas golggotmánus – bálvalanhoavdan Uhca Paadar Ristena Raisa, Raisa Similä
9.9.2026
Lappi buresveadjinguovllu Ohcejoga girkosiidda guovllu vuorrasiid bálvalusat, ruoktobuohcceviessu ja dearvvašvuođadálu vuostáváldinbálvalusat ovttastuvvet golggotmánu álggus ođđa sámesodeguovddážin. Viggamuššan lea dorvvastit bargiid ja bálvalusaid oažžuma guovllus.
Ohcejohka lea Lappi buresveadjinguovllu áidna sápmelašeanetlogu gielda. Sámesodeguovddáš buvttada bálvalusaid sihke davvisámegillii ja suomagillii.
Ovttadaga bálvalanhoavdan álggaha 14.9.2026 Uhca Paadar Ristena Raisa, Raisa Similä. Avvila Männikkö bálvalanruovttu bálvalanovddasvástideaddjin bargan Similä muitala:
”Ohcejoga bálvalusat leat munnje oahppásat juo ovddit barggustan, ja vuorddán movttain, ahte mii beassat hukset dain ain buorebut doaibmi ollisvuođa. Erenomážit vuorddán, ahte mii beassat bargat ovttas bargiiguin: Ohcejogas leat čeahpes bargit, geat bures dovdet iežaset guovllu sierraiešvuođaid ja bálvalandárbbuid.”
Lappi buresveadjinguovlu lágida Ohcejoga guovllu ássiide nuppástusaide guoskevaš ássiiddilálašvuođa 10.9.2026 dmu 17.30–19.30 Ohcejoga gielddadálu váldostivrasáles (Luossatie 1).
Dilálašvuođas ássit ja báikkálaš ovttasbargoguoimmit besset háleštit Ohcejoga guovllu sosiála- ja dearvvašvuođabálvalusaid birra, jearrat gažaldagaid ja addit máhcahaga. Dilálašvuhtii sáhttá oassálastit báikki alde dahje Teams-gáiddusoktavuođain čujuhusas https://urly.fi/4c6f.
Dilálašvuohta lágiduvvo davvisámegillii ja suomagillii.
”Sámegielat ja kulturmieldásaš sosiála- ja dearvvašvuođabálvalusaid ovttadagas midjiide lea dehálaš gullat guovllu ássiid vásáhusaid ja oainnuid bálvalusain. Mii sávvat ahte ássiiddilálašvuhtii servet ollu olbmot”, dadjá sámegielat ja kulturmieldásaš bálvalusaid vástoovttadatjođiheaddji Tuuli Miettunen.
Lassedieđut
Tuuli Miettunen
vástoovttadatjođiheaddji
tuuli.miettunen@lapha.fi
040 484 2676
Raisa Similä
bálvalanhoavda
raisa.simila@lapha.fi