Visttiid ruhtadeapmi Ohcejogas

Visttiid ruhtadanvejolašvuođat Ohcejogas leat ovttaveardásaččat eará gielddaiguin. Báŋkkut deattuhit persovnnalaš rávvema ja fuolalaš plánema, vai vistti sáhtášii háhkat nu njuovžilit go vejolaš. Áiggil álggahuvvon plánemiin ja áššedovdiid doarjagiin iežas ruoktu Ohcejogas lea olahanmuttus.

Guovvamánu álggus Ohcejogas lágiduvvon Ássama beaivvis ságastallama bovttii earret eará visttiid ruhtadeapmi. Erenomážit deattuhuvvui gažaldat: Leago Ohcejohka ovttaveardásaš sajádagas go veardida Lappi ja Suoma eará gielddaide?

– Lea, nanne Nordea Davvi Suoma doaibmabáikkijođiheaddji Jussi Makkonen.

– Vistti dáhkádusárvu lea Hankos Ohcejohkii seamma 75 %, haddeárvvoštallama mielde man olggobealát árvvoštalli lea dahkan. Visteloanas lea dat dehálut makkár loatna geasage heive, go vistti sajádat, Makkonen joatká.

Pohjola OP oaidnu lea seamma.

– Visttiid ja huksema ruhtadeapmái váikkuhit prošeavttat, ii báikegoddi, muitala Pohjola OP báŋkojođiheaddji Tero Kasanen.

Vistegávppi jaskatvuohta váikkuha haddeárvvoštallama dahkamii

Ohcejogas leat huksejuvvon ja vuvdojuvvon visttit unnán maŋimuš jagiid áigge. Jagiid 2020 – 2024 áigge lea huksejuvvon 11 dálu ja 1 ráidodállu ja maid 15 astoáiggevistti. Vistegávppit leat dahkkon badjelaš guoktelogi.

Vistegávppi jaskatvuođas leat muhtun váikkuhusat gávppašeapmái.

– Jos veardásašgávpi lea ollu, de vistti árvvu árvvoštallan lea álkit. Jos veardásašgávpi ii leat, de dárbbašuvvo áššedovdi árvvoštallan, Tero Kasanen muitala.

Vistti árvvu meroštallamis vuhtiiváldit friija márkaniid. Jos visttis leat divrras erenoamáščovdosat, dat eai vealttakeahttá oidno dan árvvus.

– Go vistegávppit dahkkojit unnit, de gaskamearalaš hatti árvvoštallan lea váddásut, ja dat sáhttá áiggokeahttá unnidit visttiid hattiid, Jussi Makkonen govvida.

Áigi lea ustit

Stuorra gávppi plánema gánneha álggahit áiggil.

– Áigi lea min ustit vistti háhkamis, hoahppu fas lea fuones ášši. Go oktavuođaváldin boahtá áiggil, de fysalaš proseassa ja ruhtadanproseassa sáhttet ovdánit bálddalagaid, dadjá Pohjola OP Tero Kasanen.

– Go buriin áiggiin plánet, geargat vuhtiiváldit sierra molssaeavttuid ja vihkkedallat daid ráfis. Ovdamearkan iežas suddjemii reanttuin leat dál máŋggat buorit reaiddut, joatká Kasanen.

Gárvves visti vai ođđačuozáhat?

Álo eai fállojuvvo heivvolaš visttit, ja huksen šaddá áigeguovdilin.

– Loana mieđiheami oaidninčiegas gárvves visttis ja ođđačuozáhagas ii jur leat earru, muhto ođđačuozáhagaid dáhpáhusas ferte árvvoštallat proseassa riskkaid, dahjege dan, ahte jos buot áššit eai manage nu mo lea plánejuvvon, muitala Pohjola OP Tero Kasanen.

– Dát árvvoštallan dahkko juohke ođđačuozáhagas miehtá Suoma, riska lea seamma juohke sajis Suomas, Kasanen joatká.

Ohcejoga mátkegaska stuorra guovddážiidda ja daid ruovdegávppiide ja huksenfitnodagaide buktá iežaslágan hástalusaid huksemii.

– Ođđa čuozáhaga huksemis bušeahttaplánema dehálašvuohta boahtá ovdan. Ohcejoga buohta oainnášin, ahte bušeahtas ferte leat eanet várri heiveheapmái go stuorát guovddážiin mátkegaskkaid dihte, Nordea Jusso Makkonen dadjá.

– Muđui huksema ektui ii leat earru das, huksego dálu Ohcejohkii vai gosa nu eará sadjái, Makkonen lasiha.

Lávva váikkuha ruhtadeapmái

Lávva váikkuha dasa, makkár loana huksema várás sáhttá oažžut.

– Jos plánas lea fásta vistti huksen, de tonte galggašii leat fásta ássama tonte, Tero Kasanen muittuha.

– Visteloatna ja astoáiggi visteloatna leat sierra áššit. Visteloanas dáhkádusproseanta lea Pohjola OP:s dál dábálaččat 70 % ja astoáiggi visteloanas dábálaččat 60 %, Kasanen muitala.

Divvunloatna ja vuođđodivvunloatna

Boares vistti divvun dahje vuođđodivvun gáibidit dávjá ruhtadeami báŋkkus. Jos doaimmat devdet vuođđodivvuma kritearaid, dasa sáhttá oažžut visteloana.

– Jos doaimmat eai deavdde vuođđodivvuma kritearaid, gažaldahkii boahtá de divvunloatna dahjege golahanloatna, Tero Kasanen muitala.

– Stuorra vuođđodivvunloanain sáhttá hástalussan loktanit dat, ahte čuozáhaga dáhkádusárvu ii vealttakeahttá loktan seamma olu go dasa geavahuvvo ruhta, Jussi Makkonen dadjá.

– Dákkár dáhpáhusain sáhttá dárbbašit lotnii earáge dáhkádusaid go dušše visti, mii vuođđodivvojuvvo, Makkonen lasiha.

Persovnnalaš rávvema oažžu nuvttá

– Ávžžuhan sin, guhte niegadit iežaset visttis, váldit oktavuođa midjiide nu árrat go vejolaš, Jussi Makkonen movttiidahttá.

Nordeai sáhttá váldit oktavuođa visteloatnaohcamušskoviin čujuhusas Visteloatna | Oza márkaniid njuovžilamos visteloana | Nordea. Skovvi ii dárkkut aitosaš visteloana ohcama vaikko dan namma dasa čujuha, muhto dasa devdojuvvon dieđut dahket vejolažžan persovnnalaš rávvema.

– Vuosttas deaivvadeamis ii hállojuvvo loatnalohpádusa birra vealttakeahttá olláge, muhto kártet áššehasa dili ja smiehttat ovttas, mii lea áiddo sutnje heivvolaš čoavddus. Mii sáhttit veahkehit áššehasa hábmet dan, mii lea sutnje realisttalaš ulbmil, Makkonen muitala.

Pohjola OP sávaldat lea seammalágan.

– Min neahttabálvalusas sáhttá árvvoštallat loana meari ja loatnaáiggi, ja dainna lágiin plánet dan heivvolašvuođa iežas eallimii, Tero Kasanen muitala.

– Máŋgasat leat vuosttas háve oastimin vistti, de mii figgat buktit min áššedovdámuša áššehasa geavahussii. Mii váldit iluin vuostá buot visteoastinplánaid, Kasanen lohpida.

Pohjola OP loatnaohcamuššii beasat čujuhusas https://www.op.fi/henkiloasiakkaat/lainat-ja-asunnot.

Artihkal lea almmustahtton Ráhkadusnuppástus koordinašuvdna Ohcejogas -prošeavtta buvttusin.