Lei rivttes mearrádus boahtit Ohcejohkii – eará sajis boahtán logahatoahppit loktet hui bures
– Vuosttas beaivve rájes leamašan dovdu, ahte lei rivttes mearrádus boahtit, dadjá Durdnosis Ohcejohkii logahahkii boahtán Sainimari Vähä (17).
Seamma mielas leat maiddái porvoolaš Aini Mäkelä (17), Sonkajärvis boahtán Varpu Ruotsalainen (18) ja Nivalas fárren Seela Tölli (17), geat buohkat álggahedje stuđerema Ohcejoga logahagas dán čavčča. Buohkat áigot čállit stuđeantan Ohcejoga logahagas.
Mo nuorat gávdne Ohcejoga logahaga? Dušše Varpui lei báikegoddi ovddežis oahpis, dasgo su stuorraoabbá lea leamaš dáppe barggus ovdal. Earáide Ohcejohka lei ovddežis áibba vieris báiki. – Ohcejoga logahaga oahpaheaddjit ovdanbukte stuđerema Suoma davimus logahagas Teams bokte, muitalit nuorat. – Smávva skuvla ja smávva joavkkut, davviguovllu luondu ja ođđa biras dáide geasuhit min buohkaid. Lassin hohkahii maid nuvttá ássan. Go váhnematge roahkasmahtte ohcat, lei oktasašohcamis álki válljet Ohcejoga logahaga.
Stuđeren lea vuolgán bures johtui. Joavkkut leat smávvá, oahpaheaddjit dovdet oahppiideaset ja oahpahus lea heivehuvvon guđege oahppi dárbbuide. – Oahpaheaddjit atnet mis fuola muđuige, ovdamearkka dihte veahkehit geavatlaš áššiin. Dáppe lea álki orrut, dasgo biras lea utnolaš eaige mis leat ráját sierra jahkeluohkáid oahppiid gaskkas. Mii gullat buohkat seamma jovkui.
Ohcejoga sámelogahagas sáhttá stuđeret davvisámegiela. Juohkehaš stuđeregoahtá sámegiela ja gii nu hálida dan čállitge. Smávva logahaga erenomášvuohtan lea lagaš ovttasbargu Turku universitehtain, ja dán čavčča ordnejuvvui juo nubbi allaskuvlavahkku Ohcejogas. Turku universitehta oahppiiguin oassálastit oktasaš oahpahussii, gieddegurssaide ja Norgga reisui. – Allaskuvlavahkku Eana ja čáhci -temáin álggii Geavu dutkanstašuvnnas, gos oahpásmuvaimet dutkamuššii Geavus ja Deanus ja beasaimet iežage gieddebargguide. Oktasašoahpuid lassin dagaimet reaissu Norgga beallái. Duođaid miellagiddevaš!
Ohcejoga logahat sávvá buresboahtin maid lonohallanoahppiid eará logahagain. Čavčča vuosttas periodas sii ledje guđas ja nuppi periodas moattis. Lonohallanoahppit orrot loaktimin erenomáš bures Ohcejoga logahagas ja máŋgasat sis vihkkedallet máhccat. – Leamašan suohtas oahpásmuvvat maiddái sidjiide, geat stuđerejit dáppe oanehut áiggi, muitalit nuorat. – Ođđa olbmot buktet sávahahtti nuppástusaid logahaga árgabeaivái.
Nuorat golladit asttuáiggi ollu gaskaneaset. – Beasaimet fárret ovttas juogaduvvon lanjadahkii, nuba mii loaktit ruovttusge gaskaneamet. Iežas latnja dáhkida iežas ráfi, go dan dárbbaša. Stuđeremii manná dieđusge iežas áigi skuvlabeivviid lassin. Vuojadanhálla ja álšasále leat logahatoahppiide nuvttá, nappo daid mii leat geavahan viššalit. Maiddái nuoraidsadji Wørtti lea šaddan oahpisin. Iešdoaibmangirjerádju lea vuogas, go dohko beassá goas beare. Mis juohkehaš lohká mielas girjjiid, dasgo eat hálit leat jámma dušše mobiila gieđas. Bigálusgárddisge juo finaimet, go min bovdejedje oahpásmuvvat bigálusaide. Báikkálaččat leat sávvan min liggosit buresboahtin.
Luondu ja olgolihkadeapmi leat dehálaččat. – Mii leat fitnan vánddardeamen lagašguovlluin ja reisen Norgga bealde. Dušše 18 jagi deavdán Varpus lea vuodjinvuoigatvuohta Norgga geainnuin, dasgo Sainimari 17-jahkásačča vuodjinlobiin ii oaččo vuodjit olgoriikkain. – Biila gal lea vuogas johtima dáfus, dasgo mii fitnat eará reaissuid lassin maiddái gávppiin Njuorggámis. Ja ruoktomátkkit maid šaddet álkibun iežas biillain – skihpáriid sáhttá guođđit togastašuvdnii.
Go nuorain jearrá, mii Ohcejogas lea buoremus, de vuosttas mii boahtá millii lea buorre vuoigŋa ja searvvušlašvuohta. – Olbmot leat dáppe duođaid ustitlaččat ja háleštit mielas, vaikko eai dovddašege nuppi. Dáppe lea álki eallit bottus ja eallin lea buohkanassii oktageardánut go máddin. Dáppe eallin ii gáibit nu ollu.
Teaksta: Suvi Spoof
Govvat: Sainimari Vähä, Aini Mäkelä, Varpu Ruotsalainen, Seela Tölli
