Sámegielat oahppomateriálaid buvttadeami ruhtadeapmi bissu seammá dásis jagi 2027 stáhtabušeahttaevttohusas

Sámediggi ja sámeguovllu gielddat atnet stáhta bušeahtaevttohusa hirbmat dehálažžan sámegielat oahppomateriálaid buvttadeami ja sámegielaid oahpahusa dáfus buot golmma Suomas ealli sámegillii: nuortalaš-, anáraš- ja davvisámegillii.

Suoma ruoŧŧelaš álbmotbellodaga (RKP) almmuhan dieđuid mielde Suoma ráđđehus mearridii bušeahttačoahkkimis 1. čakčamánus váldit mielde jagi 2027 bušeahttaevttohussii sámegielat oahppomateriálaid ruhtadeami bisuheami jagi 2026 dásis nappo 800 000 euros. Jagi 2027 bušeahttaevttohus addo riikkabeivviide stáhtaráđi dievasčoahkkimis 21. čakčamánus ja almmuhuvvo dan maŋŋel čujuhusas budjetti.vm.fi.

Jagi 2027 bušeahttaevttohusas sámegielat oahppomateriálabuvttadeami mearreruhta evttohuvvui álggos geahpeduvvot 200 000 euroin. Jearaldagas livččii leamaš mearkkašahtti 25 proseantta čuohppan dilis, mas sámegielat oahppomateriálaid dárbu lea lassánan geažos áigge.

Sámedikkis ja sámeguovllu gielddain nappo Eanodaga, Anára, Soađegili ja Ohcejoga gielddain lea oktasaš oaidnu oahppomateriála buvttadeami mearkkašumis buot golmma Suomas ealli sámegiela nappo nuortalašgiela, anárašgiela ja davvisámegiela oahpahussii.

“Dát lea dehálaš ja vásttolaš čoavddus. Alladásat oahppamateriálat leat guovddáš eaktun sámegielaid oahpahusa guhkesáigásaš ovddideapmái. Mearrádus doarju mánáid ja nuoraid vejolašvuođaid oahppat ja geavahit iežaset giela árgabeaivvis “, dadjá Sámedikki ságajođiheaddji Pirita Näkkäläjärvi.

Sámediggi ja sámeguovllu gielddat doarjaledje bušeahttaproseassa áigge ovttas sámegielat oahppamateriálamearreruđa seailluheami beales. Sámediggi ja sámeguovllu gielddat giitet oahpahus- ja kulturminister Anders Adlercreutz ja stáhtaráđi ruhtadeami fuolaheamis jahkái 2027.

Sámedikkis lea riikkaviidosaš ovddasvástádus sámegielat oahppomateriálabuvttadusa ovddideamis buot golmma Suomas ealli sámegillii: nuortalaš-, anáraš- ja davvisámegillii.

“Lea dehálaš, ahte sámegielat oahppomateriálaid buvttadeami buot golmma Suomas ealli sámegillii sáhttá ovddiduvvot guhkes áigge perspektiivvas sihke digitála ja deaddiluvvon hámis. Dát gáibida stáhtas čatnaseami ruhtadit dan doarvái”, dadjá Sámedikki nubbi várreságajođiheaddji Tuomas Aslak Juuso.

Sámeguovllu gielddain lea oahpahusa ordnejeaddjin ovddasvástádus sámegielaid oahpahusa ja sámegielat oahpahusa ordnemis.

“Oahppomateriálat lea vuođđoeaktu oahpahussii. Stáhta galgá dáhkidit oahppomateriálaid oažžuma, vai sámegielaid oahpahus ja sámegielat oahpahus sáhttá lágiduvvot buori kvalitehtain, ovttaveardásaččat ja oahppoplánaid mielde”, dadjet sámeguovllu gielddajođiheaddjit.

Oahppomateriálat dárbbašuvvojit nuortalašgiela, anárašgiela ja davvisámegiela oahpahusas miehtá Suoma.  Sámegiela dahje sámegielat oahpahusas ledje lohkanjagis 2025-2026 oktiibuot 823 oahppi ovdaoahpahusas gitta logahahkii miehtá Suoma. Ohppiidmeari lassáneapmi sihke gáiddusoahpahusoahpahusa lasiheapmi čalmmustahttet sámegielat oahppomateriálaid lassáneaddji dárbbu.

Sámediggi ja sámeguovllu gielddat jotket ovttasbarggu oahppomateriálaruhtadeami ovddideami várás boahttevuođas, vai buot sámemánáin ja – nuorain lea vejolašvuohta oahppat ja geavahit iežaset giela.

Lassidieđut

Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi

Tuomas Aslak Juuso
II várreságajođiheaddji
040 687 3394
tuomas.juuso@samediggi.fi

Eero Ylitalo
Gielddahoavda, Eanodaga gielda
040 5704073
eero.ylitalo@enontekio.fi

Tommi Kasurinen
Gielddahoavda, Anár gielda
050 548 4123
tommi.kasurinen@inari.fi

Jari Rantapelkonen
Gielddahoavda, Soađegili gielda
040 615 9880
jari.rantapelkonen@sodankyla.fi

Päivi Kontio
Gielddahoavda, Ohcejoga gielda
040 744 7630
paivi.kontio@utsjoki.fi