Vuigengáibádus Lappi buresveadjinguovllu guovllustivrra mearrádussii 25.5.2026 Ohcejoga ruovttubuohcceviessodoaimma gaskkalduhttin 1.5.-31.8.2026 bargiidváilli geažil

Lappi buresveadjinguovllu guovllustivrra lea mearridan 25.5.2026 § 248 gaskkalduhttit Ohcejoga ruovttubuohcceviessodoaimma 1.5.2026-31.8.2026 Mearrádusa ággan lea ovdanbuktojuvvon Ohcejoga ruovttubuohcceviessodoaimma bargojoavkku bargoveahkaváili ja das šaddan váttisvuođat bálvalusa ordnemis.

Mearrádusa mielde Ohcejoga buohccedivššu joavkkus leat golbma buohccedivššára doaimma, mat leat dál rabas. Áššebáhpáriid mielde bargguin leat giđđat 2026 bargan mearreáigásaš buohccedivššárat, muhto maŋimus mearreáigásaš bargogaskavuohta lea nohkan miessemánus. Mearrádusas gávnnahuvvo, ahte rabas doaimmat leat leamaš ohcanláhkai guovtti rekryteremis giđđat 2026, muhto rekryteremat eai leat mielddisbuktán ja dorvvastan bargoveaga fidnema.

Mearrádusa mielde ruovttubuohcceviessodoaimma gaskkalduhttima áigge bálvalusaid figgat dorvvastit eará ortnegiiguin. Lassin mearrádusas gávnnahuvvo, ahte sámegielat bálvalusaid fidnema figgamuššan lea dorvvastit nu ahte ávkkástallojuvvo Ohcejoga vuostáváldinbálvalusaid sámegielat buohccedivššára bargoresursa ja dárbbu mielde Avvilis fállojuvvon sámegielat bálvalusat ja dulkonbálvalus.

Ohcejoga gielda oaidná, ahte mearrádus vuođđuduvvá váilevaš válmmaštallamii ja váilevaš váikkuhusárvvoštallamiidda. Mearrádusas ii boađe doarvái bures ovdan, mo buresveadjinguovlu áigu ollašuhttit lágas mearriduvvon ordnenovddasvástádusa ruovttubuohcceviessobálvalusaid gaskkalduhttima áigge, mo bálvalusaid oažžun, olahahttivuohta, pasieantadorvvolašvuohta, gielalaš vuoigatvuođat ja ovttaveardásašvuohta dorvvastuvvojit dahje man vuođul ruovttubuohcceviessodoaimma gaskkalduhttima sáhttá atnit vealtameahttumin ja govttolaš doaibmabidjun.

Mearrádus vuođđuduvvá váilevaš válmmaštallamii

Guovllustivrra mearrádusain ja dan ákkain ii boađe ovdan, makkár konkrehtalaš doaibmabijuiguin Lappi buresveadjinguovlu áigu čoavdit Ohcejoga ruovttubuohcceviessodoaimma bargoveahkaváilli. Mearrádusas daddjojuvvo dušše, ahte rabas doaimmat leat leamaš ohcanláhkai ja ahte rekryterenfiggamušat eai leat dán rádjai buktán bohtosa, muhto das ii boađe ovdan, makkár lassidoaimmat bargoveaga fidnema dorvvasteami dihte leat plánejuvvon dahje ollašuhtton. Mearrádusas ii maiddái árvvoštallojuvvo, leatgo geavahuvvon buot vejolaš vuogit bargoveaga fidnema sihkkarastima dihte dakkár dilis, mas lea gažaldagas lágas mearriduvvon bálvalusa gaskkalduhttimis.

Mearrádusas ii maid boađe ovdan, mas rekryterenváttisvuođat duohtavuođas čuvvot dahje leatgo daid sivat čilgejuvvon obanassiige. Áššebáhpáriin boahtá ovdan, ahte bargguin leat giđđat 2026 bargan mearreáigásaš buohccedivššárat, muhto mearrádusas ii muitaluvvo, leatgo sidjiide fállojuvvon vejolašvuohta joatkit bálvalusgaskavuođas, leatgo rabas leamašan barggut fásta vai mearreáigásaš barggut dahje mo bargiid bissovašvuođa lea figgojuvvon dorvvastit. Mearrádusas ii nappo leat vejolaš árvvoštallat, boahtágo bargoveahkaváili duođalaččat bargofámu fidnemis vai buresveadjinguovllu iežas rekryteren- ja bargoveahkapolitihkalaš čovdosiin.

Mearrádusas ii maid boađe ovdan, man aktiivvalaččat rekryteren jotkojuvvo gaskkalduhttima áigge iige dat, man vuođul, buresveadjinguovlu árvvoštallá bargiid dili rievdat nu, ahte ruovttubuohcceviessodoaibma sáhttá álggahuvvot ođđasit 1.9.2026 rájes. Gaskkalduhttimii lea biddjon mearreáigi, muhto mearrádusas ii ovdanbuktojuvvo plána dahje árvvoštallan das, mo doaimma gáibidan bargoveahkaresursa dassážii sihkkarastojuvvo. Mearrádusas ii maiddái boađe ovdan, leago vejolaš loahpahit gaskkalduhttima ovdal 31.8.2026 jos rekryteren buktá čovdosa ja dárbbašlaš bargoveahka ordnašuvvá jo ovdal.

Vaikko mearrádusas válddahallojit muhtin buhttejeaddji ortnegat bálvalusaid dorvvasteami várás doaimma gaskkalduhttima áigge, dat ii árvvoštala, livččiigo ruovttubuohcceviessobálvalusaid geahpedeami sadjái leamaš anus eará molssaeavttut, maiguin bálvalandási livččii sáhttán bisuhit buorebut. Áššebáhpáriin ii guorahallojuvvo ovdamearkka dihte dan, livččiigo ruovttubuohcceviessobálvalusaid sáhttán doalahit dálá viidásut gaskaboddosaš bargoveahkaortnegiin, siskkáldas sirdimiin, oastinbálvalusain, ovttasbargguin eará ossodagaiguin dahje eará čovdosiiguin. Mearrádusdahkamis váilu oalát molssaeavttuid veardádallan, iige das ákkastallojuvvo manin aiddo ruovttubuohcceviessodoaimma gaskkalduhttin lea oidnojuvvon dán dilis vealtameahttumin. Seammás váilot árvvoštallamat molssaevttolaš čovdosiid váikkuhusain bálvalusaid fidnemii, olahahttivuhtii ja pasieantadorvvolašvuhtii Ohcejogas.

Mearrádusas ii maid boađe ovdan, leago buresveadjinguovlu čielggadan vejolašvuođaid ordnet bálvalusa nu, ahte ávkkástallá bargoveahkaresurssaid njuovžilit ossodagaid ja bálvalusaid rájáid rastá. Áššebáhpáriin váilu árvvoštallan das, livččiigo doaimma jotkkolašvuođa sáhttán dorvvastit bargguid ođđasitorganiserema, bargoveaga oktasašgeavaheami dahje eará organisatoralaš čovdosiid vehkiin ovdal go bálvalus gaskkalduhttojuvvui. Dán dáfus báhcá eahpečielggasin, leatgo bargiid dilli guorahallojuvvon ovttaskas doaibmaovttadaga geahččanguovllus vai olles buresveadjinguovllu resurssaid geahččanguovllus.

Go mearrádusa ággan lea bargoveahkaváili, de áššáigullevaš válmmaštallan livččii gáibidan ollu dárkilut čielggadusa bargoveaga fidnema dorvvasteami várás dahkkon ja plánejuvvon doaibmabijuin, rekryterengáibádusaid sivain, molssaevttolaš doaibmanvugiid árvvoštallamis ja maiddái das, man vuođul buresveadjinguovlu árvvoštallá ruovttubuohcceviessodoaimma sáhttit joatkašuvvat fas 1.9.2026 rájes. Go dát dieđut váilot, de báhcá eahpečielggasin, leago bálvalusa gaskkalduhttin leamaš vealtameahttun ja govttolaš doaibmabidju ja leamašgo guovllustivrras doarvái lean dieđut ášši čoavdima várás.

Buresveadjinguovllu ordnenovddasvástádusa ollašuvvan báhcá eahpečielggasin

 Buresveadjinguovllus lea sosiála- ja dearvvasvuođafuolahusa ordnemis addojuvvon lága (612/2021) 8 § mielde ordnenovddasvástádus iežas guovllu sosiála- ja dearvvasvuođafuolahusas. Lága mielde buresveadjinguovllus galgá leat doarvái máhttu, doaibmannákca ja gearggusvuohta vástidit bálvalusaid ordnemis sihke fuolahit ássiid bálvalandárbbuid mielde sosiála- ja dearvvašvuođabálvalusaid fidnemis buot diliin. Mearrádusas ii goittotge boađe ovdan, mainna lágiin buresveadjinguovlu áigu ollašuhttit iežas ordnenovddasvástádusa dán dilis, mas Ohcejoga ruovttubuohcceviesu doaibma gaskkalduhttojuvvo máŋggaid mánotbajiid áigái bargiidváilli geažil.

Mearrádusas celkojuvvo dušše, ahte oassi bálvalusain dorvvastuvvo spiehkastatortnegiiguin ja ahte pasieanttaid sáhttá dárbbu mielde doalvut Avvilii. Mearrádusas ii goittotge boađe ovdan, leago buresveadjinguovlu árvvoštallan leatgo dát ortnegat doarvái ruovttubuohcceviessodoaimma dálá áššehasaid ektui dahje eará gieldda ássiid ektui, geat sáhtášedje dárbbašit ruovttubuohcceviesu bálvalusaid gaskkalduhttima áigge. Mearrádusas váilu maiddái árvvoštallan das, ollašuhttetgo plánejuvvon ortnegat buresveadjinguvlui lágas ásahuvvon geatnegasvuođa fuolahit bálvalusaid fidnemis buot diliin.

Ordnenovddasvástádusa sisdoalu ja viidodaga deattuha dat, ahte ruovttubuohccedikšu ja ruovttubuohcceviessodikšu gullet dearvvasvuođafuolahusa 3 § mielde vuođđodearvvasvuođafuolahussii. Dearvvasvuođalága 25 § mielde buresveadjinguovlu galgá ordnet guovllu ássiid ruovttubuohccedivššu, ja ruovttubuohcceviessodikšu lea lágas meroštallojuvvon mearreáigásaš beavttálmahttojuvvon ruovttubuohccedikšun. Ruovttubuohcceviessodoaibma ii leat danin buresveadjinguovllu vuođđodearvvasvuođabálvalusa eaktodáhtolaš dahje árvvoštallanvuloš bálvalus, muhto lea lágas mearriduvvon vuođđodearvvasvuođabálvalusa bálvalusortnega oassi.

Dearvvašvuođafuolahuslága ákkaid (HE 90/2010 vp) mielde ruovttubuohccedivššu ja ruovttubuohcceviessodoaimma dárkkuhussan lea dahkat vejolažžan buohccedivššu ollašuhttima pasieantta iežas eallin- ja ássanbirrasis ja geahpedit dárbbu buohcceviessodikšui. Lága vuođustusain deattuhuvvo erenomážit ruovttubuohcceviessodivššu mearkkašupmi earet eará pasieanttaid geat dárbbašit njuolga sutnii biddjon dálkkodeami , váigadis háviid divššus, palliatiiva divššus ja mieđuštandivššu ja maiddái boarrásiid bálvalusássama áššehasaid divššus. Ruovttubuohcceviessodoaimma ulbmilin lea addit divššu ruovttus dalle go dat heive buoremusat pasieantta dillái ja go pasieantta háliida oažžut divššu iežas ruovttubirrasis.

Mearrádusas ii goittotge árvvoštallo, makkár váikkuhusat ruovttubuohcceviessodoaimma gaskkalduhttimis leat daid pasieantajoavkkuid sajádahkii, geaid dikšu lea oaivvilduvvon ollašuhttojuvvot erenomážit ruovttubuohcceviesu bálvalussan. Mearrádusas ii maid boađe ovdan, man bures buresveadjinguovlu áigu geavadis dorvvastit dáid pasieanttaid dárbbašan vuođđodearvvasvuođa bálvalusaid gaskkalduhttima áigge dahje makkár ákkaiguin plánejuvvon sadjásašortnegat leat árvvoštallojuvvon vástidit ruovttubuohcceviessodoaimma fállan bálvalandási.

Sosiála- ja dearvvašvuođalága 4 § mielde bálvalusat galget ordnejuvvot sisdoaluid, viidodaga ja kvalitehta dáfus dakkárin, go áššehasaid dárbu gáibida. Dasa lassin bálvalusat galget ollašuhttot ovttaveardásaččat ja vejolašvuođaid mielde lahka áššehasaid, ja buresveadjinguovlu galgá dorvvastit bálvalusaid olahahttivuođa.

Ráđđehusa evttohusa (HE 241/2020 vp) mielde lagasbálvalusat leat erenoamáš mávssolaččat olbmuide, geat dárbbašit bálvalusaid dávjá, guhkit áigge dahje geaid lea váttis ohcalit bálvalusaid, mat leat guhkkin. Ráđđehusa evttohusas deattuhuvvo maid dat, ahte guhkes gaskkat sáhttet dovdomassii heajudit bálvalusaid olahahttivuođa ja duođalaš vejolašvuođa geavahit bálvalusaid.

Mearrádusas ii boađe ovdan, ahte buresveadjinguovlu livččii árvvoštallan ruovttubuohcceviessodoaimma gaskkalduhttima váikkuhusaid Ohcejoga ássiid bálvalusaid fidnemii ja olahahttivuhtii. Mearrádusas ii guorahallojuvvo ovdamearkka dihte dat, mo bálvalusaid čohkken Avvilii váikkuha daid áššehasaid sajádahkii, geaid vejolašvuođat mátkkoštit guhkes gaskkaid leat dearvvasvuođa, doaibmanávcca dahje eallindili geažil ráddjejuvvon. Mearrádusas váilu maiddái árvvoštallan das, mo gaskkalduhttin váikkuha ollu bálvalusaid dárbbašeaddji áššehasaide, palliatiiva divššu pasieanttaide ja mieđustandivššu dárbbašeaddji olbmuide, geaidda ruovttus addojuvvon dikšu lea dávjá guovddáš oassi divššu ollašuhttimis.

Ohcejoga gielda muittuha dasa lassin, ahte gielddas geavadis eai leat ruovttubuohcceviessobálvalusat, mat buhttejit dearvvasvuođafuolahusa bálvalusaid. Mátki Ohcejoga girkosiiddas Avvila dearvvašvuođaguovddážii lea sullii 167 kilomehtera ja Njuorggámis sullii 220 kilomehtera. Danin bálvalusaid čohkkema váikkuhusat Ohcejogas leat mearkkašahtti ollu stuorábut go dain gielddain, main fállet molssaevttolaš bálvalusaid. Mearrádusas eai árvvoštallo dáid erenoamáš guhkes gaskkaid váikkuhusat bálvalusaid duođalaš olahahttivuhtii.

Mearrádusas eai maid árvvoštallo váikkuhusat vuosttasdikšunbálvalusaide. Ohcejoga gielddas doaibmá okta vuosttasdikšunnovttadat, mii vástida olles gieldda guovllu vuosttasdikšungearggusvuođas. Jos buohcciid ferte vuojihit eanet go dál Avvila seaŋgaossodahkii ruovttubuohcceviessobálvalusa váiluma geažil, de vuosttasdivššuovttadat čatnasa guhkes vuojihemiide gieldda olggobeallái. Mearrádusas ii leat árvvoštallojuvvon, mo dát váikkuha vuosttasveahki fidnemii, vástidanáiggiide dahje gearggusvuhtii vástidit oktanaga hohpolaš bargguide Ohcejoga guovllus.

Mearrádusas ii maid árvvoštallojuvvo ruovttubuohcceviessodoaimma gaskkalduhttima váikkuhusat buohcciiddorvvolašvuhtii. Ruovttubuohcceviessodoaibma lea erenoamážit oaivvilduvvon daidda buohcciide, geaid divššu sáhttá dorvvolaččat čađahit ruovttubirrasis dikšun, man doarju buohcceviessodási máhttu. Dakkárat sáhttet ovdamearkka dihte leat olbmot geat ožžot palliatiiva divššu ja mieđuštandivššu olbmot, geat ožžot njuolgga sutnii biddjon dálkkodeami ja eará olbmot geaidda lea ávkkálaš oažžut divššu ruovttus. Mearrádusas ii boađe ovdan mo dán joavkku pasieanttaid divššu jotkkolašvuohta, dorvvolašvuohta ja divššu rivttes áigge oažžun sihkkarastojuvvo ruovttubuohcceviessodoaimma gaskkalduhttima áigge.

Mearrádusas ii maid árvvoštallo dat várra, ahte guhkes gaskkat, bálvalusaid čohkken ja vuosttasveahkkebálvalusaid vejolaš badjelmearálaš noađđi, sáhttet maŋidit divššu fidnema dahje geahpedit pasieanttaid duođalaš vejolašvuođaid oažžut rivttes áigge dan divššu, man sii dárbbašit. Nappo mearrádusas ii leat árvvoštallojuvvon makkár váikkuhusat bálvalusa gaskkalduhttimis sáhttá čuovvut buohcciiddorvvolašvuhtii.

Ráđđehusa evttohusas (HE 241/2020 vp) deattuhuvvo, ahte bálvalusaid olahahttivuohta ii dárkkut dušše fysalaš gaskka bálvalusaide, muhto dasa gullet maiddái gielalaš ja kultuvrralaš olahahttivuohta. Ráđđehusa evttohusa mielde áššehas galgá oažžut bálvalusa iežas gillii, áddehallat ja nákcet áddet dikšunrávvagiid, vai son sáhttá duođalaččat geavahit bálvalusaid ovttaveardásaččat.

Vaikke mearrádusas daddjojuvvo, ahte figgamuš lea dorvvastit sámegielat vuostáváldinbálvalusaid buohccedivssára bargoresurssain ja dárbbu mielde dulkonbálvalusain, mearrádusas ii árvvoštallo leatgo dát ortnegat duođalaččat doarvái. Mearrádusas ii boađe ovdan, mo ruovttubuohcceviessobálvalusaid gaskkalduhttin váikkuha sámegielat áššehasaid vejolašvuođaide oažžut bálvalusaid iežas gillii iige dat, heajudago mearrádus sin duođalaš vejolašvuođaid geavahit bálvalusaid ovttaveardásaččat eará áššehasaiguin.

Mearrádusas váilu maiddái árvvoštallan das, mo plánejuvvon spiehkastatortnegat dorvvastit sámegiela ja kultuvrra mielde bálvalusaid jotkkolašvuođa geavadis. Nappo mearrádusas ii leat vejolaš árvvoštallat, devdetgo plánejuvvon ortnegat daid gáibádusaid, maid láhkaásaheapmi ja dan vuođustusain leat deattuhuvvon ásahit bálvalusaid duođalaš olahahttivuođa, ovttaveardásašvuođa ja gielalaš vuoigatvuođaid ollašuvvama buresveadjinguvlui.

 Mearrádus spiehkkasa guovlostivrra dohkkehan bálvalusčovdosis

 Guovllustivra mearridii 28.10.2024 buhttet Ohcejoga seaŋgaossodaga ruovtubuohcceviessodoaimma, ruoktodivššu, bálvalanássama ja vuosttasdivššu bálvalusaiguin

Válmmaštallanáššebáhpáriid mielde Ohcejoga bálvalusaid lei ulbmil buhttet dearvvasvuođaguovddážii sajustuvvon lotnolasbálvalusain, mas addojuvvojit maid dearvvasvuođa birrajándorbálvalusat ja mas váldojuvvojit vuhtii gielalaš vuoigatvuođat. Dasa lassin plánas daddjui, ahte Dorvvu oktavuođas doaibmi buohccedivššu joavku dahká vejolažžan oanehisáigge divššu njuovžilit ruovttubuohcceviessodivššu áššehasaide, interválladivššu áššehasaide ja olbmuide geat dárbbašit sosiála- ja heahtedillesaji.

Ohcejoga gielda reagerii seaŋgaossodaga heaittiheapmái bealeheamet namalassii dan vuođul, ahte buresveadjinguovlu lohpidii buhttet ja čoavdit seaŋgaossodaga bálvalusaid doaibmi ruovttubuohcceviesso- ja hybridabálvalusaiguin. Dál dahkkon mearrádus ruovttubuohcceviessodoaimma gaskkalduhttimis mearkkaša goittotge dan, ahte guovddáš oassi dan bálvalusmálles, man vuođul guovllustivrra dohkkehii bálvalusfierpmádaga rievdadusa, báhcá anus máŋggaid mánuid áigái.

Mearrádusas ii árvvoštallo, makkár váikkuhusat das leat guovllustivrra dohkkehan bálvalusčovdosa ollašuvvamii iige dan, sáhttágo Ohcejogas šat duođalaččat fállat daid bálvalusaid, maid ulbmil lei buhttet heaittihuvvon seaŋgaossodaga bálvalusaid. Mearrádusas ii maid árvvoštallo, mo buohccedivššu joavkku  doaibma ollašuvvá dahje ruovttubuohcceviessodoaimma gaskkalduhttima áigge dahje mo guovlluváldostivrii ovdan buktojuvvon bálvalusmálle guovddáš ulbmilat ollašuvvet almmá ruovttubuohcceviessobálvalusa haga.

Bálvalusfierpmeplánas ruovttubuohcceviessodoaimma ovddideapmi ovdanbuktojuvvui guovddáš vuohkin buhttet seaŋgaossodatbálvalusaid ja dorvvastit bálvalusaid báikegottiin, main seaŋgaossodagat heaittihuvvojit. Plánas daddjui maid leat ulbmilin fidnet ruovttubuohcceviessodoaimma viidát buresveadjinguvlui. Dál dahkkon mearrádus lea ruossalassii dáid vuolggasajiiguin, iige mearrádusas ákkastallojuvvo manin Ohcejoga oasil dán ulbmilis spiehkastuvvo.

Jurddabohtosat ja gáibádusat

 Ovdalis ovdanbuktojuvvon ákkaid vuođul mearrádusas ii boađe ovdan, ahte buresveadjinguovlu livččii dárbašii bures árvvoštallan ruovttubuohcceviessodoaimma gaskkalduhttima váikkuhusaid bálvalusaid fidnemii, olahahttivuhtii, ovttaveardásašvuhtii, gielalaš vuoigatvuođaide dahje guovlluváldostivrra jagi 2024 dohkkehan bálvalančovdosa ollašuvvamii. Mearrádusas ii maid boađe ovdan, ahte buresveadjinguovlu livččii čielggadan doarvái molssaevttolaš doaibmanvugiid dahje livččii álggahan buot govttolaččat gáibiduvvon doaibmabijuid bargoveaga fidnema dorvvasteami várás ovdal bálvalusa gaskkalduhttima.

Ohcejoga gieldda oaivil lea, ahte mearrádusa válmmaštallan ja váikkuhusaid árvvoštallan leamašan váilevaš. Váilevaš čielggadeami geažil báhčá eahpečielggasin, leamašgo ruovttubuohcceviessodoaimma gaskkalduhttin vealtameahttun ja govttolaš doaibmabidju ja devdetgo mearrádusas ovdanbukton buhttejuvvon ortnegat daid gáibádusaid, mat buresveadjinguovllus leat sosiála- ja dearvvasvuođafuolahusa ordnengeatnegasvuođa, dearvvasvuođafuolahuslága ja bálvalusaid ovttaveardásaš fidnema ja olahahttivuođa guoski njuolggadusaid mielde.

Ohcejoga gielda gáibida, ahte guovllustivrra vuige iežas mearrádusa ja máhcaha ášši ođđasit válmmaštallamii.

Ovdal go ášši čovdojuvvo ođđasit, galget ráhkaduvvot doarvái čielggadeamit bargoveahkaváilli sivain ja rekryterendoaimmain, molssaevttolaš doaibmanvugiin, mearrádusa váikkuhusain bálvalusaid fidnemii, olahahttivuhtii, pasieantadorvvolašvuhtii, ovttaveardásašvuhtii ja sámegielat bálvalusaide ja maiddái das, mo ruovttubuohcceviessodoaimma jotkkolašvuohta dorvvastuvvo ja maid mo doaimma gaskkalduhttima áigge ja dan maŋŋá.

Dasa lassin buresveadjinguovlu galgá ráhkadit plána dain bargoveahka-, rekryteren- ja doaibmaortnegiin, maiguin ruovttubuohcceviessodoaimma jotkkolašvuohta Ohcejogas dorvvastuvvo sihke doaimma gaskkalduhttima áigge ja 1.9.2026 maŋŋá.

Nuppádassii Ohcejoga gielda gáibida, ahte mearrádus rievdaduvvo nu, ahte ruovttubuoccceviessodoaimma gaskkalduhttima ákkat árvvoštallojit ođđasit farggamusat, jos bargoveahkadilli gaskkalduhttima áigge nuppástuvvá nu, ahte doaimma ordnen lea vejolaš. Dasa lassin buresveadjinguovlu galgá ráhkadit plána dain bargoveahka-, rekryteren- ja doaibmaortnegiin, maiguin ruovttubuohcceviessodoaimma jotkkolašvuohta Ohcejogas dorvvastuvvo 1.9.2026 maŋŋá.