ÄRM (Fáhkka struktuvranuppástus) -álggahanprojeakta

ÄRM-álggahanprojeakta pláne ja álggaha ođđa projeavttaid, maiguin lea ulbmil máŋggabeallásaččat nannet Ohcejoga geasuhan-, doallan- ja eallinfámu.

Ohcejoga gielda ohcalii giđđat 2021 Fáhkka struktuvranuppástusa (Äkillinen rakennemuutos / ÄRM) gieldan koronapandemiija ja Deanu luossabivdogildosa buktin vuordemeahttun váttisvuođaid geažil. Ohcejoga fáhkka struktuvranuppástusa duogážiin sáhttá lohkat lasi siiddu loahpas. ÄRM-álggahanprojeakta addá vejolašvuođaid fáhkka struktuvranuppástusa doaimmaid jođanis álggaheapmai. Projeavtta doaimmat ovddidit guovllu ekonomiija ealáskeami ja ođasmuvvama Lappi korona-ceavzinplána mielde.

ÄRM-álggahanprojeakta sisttisdoallá golbma temáollislašvuođa (Fitnodateallin, barggolašvuohta ja máhttin / Sápmelašvuohta, vásttolašvuohta ja buorredilli / Infra ja olaheapmi), mat fas dollet sisttis máŋggaid sierralágan projeavttaid. Golbma temáollislašvuođa sihke projeaktafáttát buktojit ovdan dárkilabbot vulobealde.

Ohcejoga buot ÄRM-doaibmabijuid temán lea nannosit sápmelašvuohta ja vásttolašvuohta. Ollislašvuođa páras leat bargan eanangotti viiddis koordináhtajoavku sihke smávit bargojoavkkut iešguđet temáid mielde. Áššis leat gullan maiddái Ohcejoga gieldda ássiid golmma gilidilálašvuođas. Lassemáhcahus lea čohkkejuvvon neahttasiidduid jearahallanskoviin.

Projeakta ollašuhtto áiggis 1.8.2021–28.2.2022. Projeavtta ruhtada Lappi lihttu.

Fitnodateallin, barggolašvuohta ja máhttin

Fitnodateallin, barggolašvuohta ja máhttin -temáollislašvuođas lea šaddan guokte projeaktafáttá, mat sáhttet juohkásit velá máŋgan projeaktan dahje ovttastuvvat eará projeaktafáttáide. Dáid projeavttaid ulbmilin lea veahkehit Ohcejoga fitnodatdoalliid ceavzit fáhkka muhttašuvvan dilis. Ovddidandoaimmat ollašuhttojit jogo dalán dahje lagašjagiid.

Projeaktafáttát:

1. Fitnodatdoalliid ja ealáhushárjeheaddjiid máhttima lasiheapmi ođđa fitnodatdoaibmama vejolažžan dahkama várás, fitnodatvuođadálu, oktasaš fierbmegávpevuođu dahje eará fitnodatfierpmádaga áigái oažžun sihke fitnodagaid doaibmanbirrasa muhttašuvvamii laktáseaddji projeaktadoaibmabijut. Dán uDigi-projeavttas lea guđđojuvvon ohcamuš REACT-prográmmii Lappi lihttui. Projeavtta ulbmilin lea, ahte Ohcejoga gieldda eallinfápmobálvalusat ođasmahttojit atnimiin ávkin digitála čovdosiid ja viiddis fierpmádaga ovtta luŋkká ja ovtta ruvttá bálvalussan. Ulbmilin lea gávdnat doaibmanmálle, mii doarju álkidit, johtilit ja goasttádusbeaktilit ovdamearkka dihtii fitnodagaid doaibmama ovddideami, gánnáhahttivuođa buorideami, digitaliserema máhttima sihke beassama viidásut fitnodat- ja áššehasfierpmádagaide ja projeaktaruhtademiide. Doaibmanmálle doallá sisttis eallinfápmobálvalusaid viidát vuhtii váldimiin nu fitnodatdoaibmama álggaheami ja ovddideami, huksemii ja ássamii laktáseaddji bálvalusaid, skáhppomiid, máhttima ovddideami go maiddái bargofápmoáššiidge. Fitnodatvuođadálu/eallinfápmodálu buohta plánenbargu lea álggahuvvon.
2. Iežaset fitnodatdoaibmamis luohppi fitnodatdoalliid fitnodaga vuovdima/sohkabuolvva molsuma helpen.

Sápmelašvuohta, vásttolašvuohta ja buorredilli

Sápmelašvuohta, vásttolašvuohta ja buorredilli -temáollislašvuođas leat šaddan guokte projeaktafáttá, mat dárbbašuvvojit doarjut báikkálaččaid buorredili sihke árbevirolaš luossabivdokultuvrra vurkema.

Projeaktafáttát:

1. Gieldda ássiid ja fitnodatdoalliid buorredilli.
2. Báikkálaš luossabivdokultuvrra vurken. Leaderii lea guđđojuvvon projeaktaohcamuš Sápmelaš kulturárbbi nannen Deatnoleagis (Saamelaisen kulttuuriperinteen vahvistaminen Tenojokilaaksossa). Ulbmilin lea vurket árbevirolaš luossabivdokultuvrra luossaboađuin ja fatnasiid duddjomis gitta ieš bivdokultuvrii ja luosa mearkkašupmái oppa Deatnoleagis. Dasa lassin projeavttas váldojuvvo čielggas vejolašvuođain oažžut áigái lussii, báikkálašhistorjái ja vejolaš lassetemái laktáseaddji čájáhusa dahje musea.

Infra ja olaheapmi

Infra ja olaheapmi -temáollislašvuođas leat resurssat čohkkejuvvon eandalii turismma, prográmmabálvalusaid ja luondoaktivitehtaid doarju infrai sihke geahppa johtolaga ja vázzima geinnodatčovdosiidda.

Daid vuođul leat šaddan golbma projeaktafáttá:

1. Oppa gieldda čađa doalvu guovlogeainnu 970 (Tenontie Gáregasnjárggas Ohcejoga bokte Njuorggámii) ovddideapmi riikkaidgaskasaš dási sihkkelastingeinnodahkan. Suoma čábbásamos geaidnun jienastuvvon, Deatnogátti guoradeaddji geainnus lea potentiála badjánit riikkaidgaskasaččat mearkkašahtti sihkkelmátkegeinnodahkan doarvái buriin ordnen- ja ovddidandoaimmaiguin.
2. Geahppa johtolaga luottaid ráhkadeapmi buot čoahkkebáikkiide.
3. Turismma doarju infra ollašuhttin helpet ođđalágan fitnodatdoaimma ovddideami. Buot Gáregasnjárga-Ohcejohka-Njuorggán-gaskka giliide háhpohallojuvvo báikkálašinfra nugo lasi fatnasiid ja kanohtaid luoitinsajit, čoahkkebáikkiid lahkosis leahkki vánddardan- ja meahccesihkkelgeinnodagaid ordnen, loddeturismma vejolažžan dahkki loddetoartnat ja lottiid/luonddu čuovvunguovlu. Turismainfra hutkamiin geahččalit ovddidit turismma prográmmabálvalusaid ja aktivitehtaid vásttolašvuođa ja gávppálažžan dahkama.

Lagašáiggiid dáhpáhusat

ÄRM-álggahanprojeakta priorisere dán čavčča earenoamážit Tenontie sihkkelastingeinnodat-projeavtta. Ollislašvuohta plánejuvvo skápmamánu áigge. Ulbmil lea maiddái oažžut turismafitnodagaid oasálažžan plánet geinnodaga. Ohcejoga gielddahoavda ovddida ovttas Lappi lihtuin geahppajohtolaga geinnodagaid ollašuhttima.

Sápmelašvuohta, vásttolašvuohta ja buorredilli -ollislašvuođa luossabivdokultuvrra vurkenprojeavttas fidnejuvvo mearrádus golggotmánu beallemuttus ja rekryteren álggahuvvo velá golggotmánu áigge, jos ruhtadeapmi mieđihuvvo. Fitnodateallin-ollislašvuhtii laktáseaddji uDigi-projeakta álgá álgojagis 2022, jos ruhtadeapmi mieđihuvvo. Eará projeavttaid lea dárkkuhus plánet guovvamánu 2022 loahpa rádjai ja projeavttat álggahuvvojit dađi mielde, go ruhtadeamit fidnejuvvojit.

Jos leat beroštuvvan gullat lasi projeavttain, de sáhtát váldit oktavuođa ÄRM-koordináhtorii!

Lassedieđut:

Ovddidan- ja ealáhushoavda
Ohcejoga gielda
+358 400 151 294

Gielddahoavda
Ohcejoga gielda
+358 400 933 754

Duogáš – manin Ohcejohka ohcalii ÄRM-gieldan?

Ohcejohka lea Suoma davimus ja áidna sápmelašeanetlogu gielda. Gielddas leat 1200 ássi. Ohcejoga beaivválaš eallimii gullet sámegiella sihke divttis oktavuođat Norgga bealde ássi fulkkiide, verddiide ja oktasašbargoguimmiide. Jagi jorrama lea álo kruvnnidan Deanu luossabivdu.

Ohcejohka ohcalii giđđat 2021 Fáhkka struktuvranuppástusa (ÄRM) gieldan koronapandemiija ja Deanu luossabivdingildosa dagahan vuordemeahttun váttisvuođaid geažil. Koronaráddjehusat, rádjagiddemat sihke luossabivdogielddus leat váikkuhan Ohcejogas mearkkašahtti láhkai earet eará báikkálaččaid buorredillái, sosiálalaš gaskavuođaide, sápmelaškultuvrii, ealáhusaide ja rádjagávpái.

Korona lea hihtudan ja goasii bissehan Ohcejoga jođánit álgui beassan riikkaidgaskasaš turismma. Seammás go korona govččai rájá Norgii, álge maiddái rádjagávppi stuorra váttisvuođat. Gávppiid váljagálvvut ja viidodat leamašan nannosit norggabeale áššehasaid veagas, mii gokčá sullii 90 proseantta buot áššehasain. Seammás gávppit leat goittotge maiddái báikkálaš ássiid giligávppit ja bálvalanguovddážat, maid váttisvuođat ja otnon rabasáiggit sihke geahppánan váljagálvvut leat čuohcan báikegotti ássiide.

Korona ja rádjagávppi váttisvuođaid lassin bođii cuoŋománus 2021 mearrádus Deanu luossabivdogildosis geasi 2021 áigge. Luossabivdogielddus joatkašuvvá várra maiddá boahttevaš gesiid áigge, dasgo guollenáli dilli lea issoras fuotni. Árbevirolaš luossabivdu lea báikegotti olbmuide deaŧalaš máŋgga láhkai. Dat lea vurdojuvvon geasseáigge bargu, mas lea stuorra mearkkašupmi gieldda ássiid vuoiŋŋalaš ja fysalaš buorredillái. Luossabivddus lea dasa lassin molsašuddi ruđalaš mearkkašupmi ealáhushárjeheaddjiide ja fitnodagaide smávva lasseboađuin gitta oaiveáššálaš ealáhussii.

Ovddabealde máinnašuvvon dahkkit leat dassalan oppa Ohcejoga gieldda dillái, mas dat deavdá fáhkka struktuvranuppástusa kriteraid.