Deanuleagis sámástit -projeakta

1.2.2020–30.9.2022

Sámegiela máŋggat árbevirolaš geavahanoktavuođat geahppánit ja erenoamážit mánáide ja nuoraide dehálaš, dálá áiggi giellageavahanarenain sámegiella govssahallá. Gollegiellamet gáhttema ja ealáskahttima ovdii galgá rahčat jámma.

Deanuleahki lea mearkkašahtti guovlu olles davvisámegiela seailuma dáfus. Guovllu sápmelaččain lea nana oktasaš historjá guovtte beal dálá riikkarájá. Dat addá lunddolaš vuođu ovttas gáhttet giellamet ja kultuvramet. Nu riegádii jurdda Deanuleagis sámástit -projeavttas.

Jearaldat lea Interreg Nord -projeavttas 2020–2022, man ollašuhttet ovttasbarggus Ohcejoga gielda, Sámi ealáhus- ja guorahallanguovddáš (SEG) ja Kajaani ámmátallaskuvla (KAMK). Projeavtta vuođđoulbmil lea gáhttet Deanuleagi sámegiela ja árbedieđu. Projeakta fállá sámástanlávddiid Deanuleagi olbmuide ja buktá olbmuid guovtte beal rájá eambbo oktii. Doaimmain, ulbmiliin ja projeaktaveagas muitaluvvo eanet vuolábealde.

Oahpásmuva projevtta iežas neahttasiidui www.samastit.org! Čuovo projeavtta dáhpáhusaid ja diehtojuohkima maiddái Facebookas ja Instagramas.

Mii?

Deanuleagis sámástit -projeavttas leat vihtta (5) váldoulbmila:

Ohcejoga giellaguovddáža vuođđudeapmi ja Deanuleagi giellaguovddášfierpmádaga huksenProjeavtta oktan váldoulbmilin lea vuođđudit Ohcejohkii sámi giellaguovddáža. Giellaguovddášdoaimmas lea guhkes historjá Norgga beale Sámis, muhto Suoma bealde sámi giellaguovddážat eai vuos gávdno. Projeakta ovddida Deanuleahkái giellaguovddážiid fierpmádaga. Giellaguovddážat sáhttet ovttasbarggus nannet sámegiela Deanuleagis ja fállat buorrin gávnnahuvvon geavadagaid nuppiidasaset. Projeakta dahká giellaguovddášfierpmádaga duogáščielggadeami ja sámegiela revitaliserenplána. Projeakta juohká dieđuid dáhpáhusain riikkarájá rastá sámegillii. Dat maiddái doarju guovllu gielddaid sámegielat gulahallama ovddideamis.
Virtuála oahppanbiras ”Vuosterávdnjái”Projeakta buvttada áibbas ođđalágan virtuála oahppanbirrasa Deanuleagi sámegiela, árbedieđu ja báikedovdamuša birra. Jearaldat lea Vuosterávdnjái-nammasaš speallomáilmmis, man lea vejolaš speallat dihtoriin ja mii lea oaivvilduvvon maŋŋá earret eará skuvllaid atnui. Speallu huksejuvvo ovttasbarggus Kajaani ámmátallaskuvllain. Spealu pilohtat testejuvvojit projeavtta áigge goappat beal rájá.
Gáiddusoahpahusa ovddideapmiProjeakta doarju ja ovddida sámegiela gáiddusoahpahusa ovttas oahpaheaddjiiguin. Projeakta ordne sámegiela gáiddusoahppiide miehtá Suoma guokte (2) giella-kulturvahku Ohcejogas.
Sámegielat doaimmatProjeakta ordne sámegielat doaimmaid Deanuleagi olbmuide. Vuođđojurddan lea hutkat ja fállat erenomážit ođđalágan, innovatiivvalaš doaimmaid ja buktit daiguin oktii Deanuleagi olbmuid rastá riikkarájá. Projeakta ordne doaimmaid buot ahkásaččaide ja sihke eatni- ja vierisgiellagiidda. Plánan lea ordnet earret eará giellaleairraid, riekkisdoaimmaid ja dáhpáhusaid, main leat Deanuleagi olbmuid válljen temát, degomat filmmat, teáhter, valáštallan dahje eSport. Oktan ulbmilin lea ovddidit sámegielat johtti nuoraiddoaimma Deanuleagi siste. Sámi ealáhus- ja guorahallanguovddáš ovddida projeavtta áigge maiddái iežas innovatiivvalaš giellamaskohta ”Bluč”.
Máŋggagielatvuođa rávvenProjeakta ovddida ja fállagoahtá máŋggagielatvuođa rávvema Deanuleagi bearrašiidda, asttuáigge doaibmiide ja ámmátolbmuide, geat barget mánáiguin ja nuoraiguin. Projeakta buvttada rávvenmateriálaid máŋggagielatvuođa birra iežas neahttasiidui ja some-kanálaide, čohkke skuvlenpakeahtaid árrabajásgeassin- ja oahpahussuorggi bargiide, ordne guokte (2) seminára ja teste vugiid dahkat ovttasbarggu rájá rastá. Projeakta ovddida giellarávvendoaimma Ohcejohkii ja Detnui.

Projeavtta loahppaboađus: Deanuleagis doaibmá giellaguovddážiid fierpmádat, mii ovttasbarggus doarju guovllu sámegiela nanosmuvvama ja lasiha guovllu kulturárbbi dovdamuša.

Geat?

Projeavtta ollašuhttet Ohcejoga gielda ja Kajaani ámmátallaskuvla (KAMK) Suomas ja Sámi ealáhus- ja guorahallanguovddáš (SEG) Norggas.

Projeavtta geavatlaš ollašuhttimis vástidit Ohcejoga gielddas projeaktahoavda, máŋggagielatvuođaáššedovdi, dieđiheaddji-buvttadeaddji ja projeaktakoordináhtor, Deanu gielddas projeaktabargi ja Kajaani ámmátallaskuvllas spealuid ovddidanjoavku. Projeaktaveaga dieđuid gávnnat vuolábealde.

Projeavtta oppalaš bušeahtta lea 835 376 €. Projeavtta ruhtadit Interreg Nord (EAKR), Lappi lihttu, Ohcejoga gielda, KAMK, SEG ja Norgga Sámediggi.

Goas?

Projeakta ollašuhtto 1.2.2020–30.9.2022.

Projeavtta guoimmit

Kajaani ámmátallaskuvlla oktavuođas doaibmi Clever Simulation Entertainment -ávkespeallojoavku ráhkada projeavttas virtuála oahppanbirrasa ”Deanuleahki”, man váldoulbmil lea oahpahit spealliide sámegiela ja -kultuvrra beroštahtti vugiin. Joavku lea hui movttiidan projeavtta vejolašvuođain vurket Deanuleagi sámegiela, kulturárbbi ja birrasiid speallomáilbmái ja maiddái vejolašvuođas buvttadit ođđa bargoneavvuid sámegiela oahpahusa várás.

Sámi ealáhus- ja guorahallanguovddáš lea projeavtta norgalaš guoibmi. SEG buvttada bálvalusaid sápmelaš konsultašuvnna vuođul earret eará projeaktajođiheamis, dutkan- ja plánenbarggus ja proseassahálddašeamis. Okta SEG višuvnnain lea nannet Sámi innovatiivvalaš čovdosiin. Dán projeavttas SEG veahkehage ovddidit innovatiivvalaš ja rájá rasttildeaddji giellageavahanarenaid. SEG vuolde doaibmá Deanu giellagáddi, mii lea nana ja dehálaš doaibmi sámegiela ealáskahttimis Deanu gielddas. Giellaguovddáš lea ovddidan erenoamážit giellaleairadoaimma ja fállan doarjaga máŋggagielatvuođa hástalusaide earret eará Bluč bokte.