Ohcejoga ealáhusaid ovddidanprojeakta

Projeavtta duogáš

Ohcejoga gielddas lea doajáhatmuddu eandalit turismma doaibmasuorggis. Jahkelogiid áigge geasseturisma vuođđuduvai Deanu luossabivdui ja das šattai mearkkašahtti boahtogáldu johkagátti fitnodagaide ja ássiide. Jagis 2017 fápmui boahtán Deanu ođđa guolástannjuolggadus geahpedii sakka geasseturisttaid meari Ohcejogas. Fitnodatolbmuide dahkkon čielggadusaid ja árvvoštallamiid vuođul turisttaid mearri geassit 2017 geahppánii ovddit jagiid ektui 60-70 %. Dát lea oidnon fitnodagaid vuovdinboađuid radikála geahppáneapmin ja dan bokte maiddái fámolaččat eahpenjulges váikkuhussan gieldda guovloekonomiijas ja eallinvuoimmis.

Turismma doajáhatmuttu geažil Ohcejoga gielddas dárbbašuvvo buot ealáhusaid doaibmavejolašvuođaid buorideapmi ja viiddes, ain mearrediđolut ovddidanbargu, vai doaibmasurggiid oktasašbargu vuolggášii buorebut johtui. Lea nappo dárbu hutkat ođđa doaibmamálle, mas kultursensitiivvalašvuohta, servvolašvuohta ja turismma fámolaš riikkaidgaskasažžan šaddan váldojuvvojit vuhtii ealáhusaid ovddidanbarggus. Kultursensitiivvalašvuođain oaivvilduvvo dat, ahte ealáhusaid ovddidanbargu dahkkojuvvo sierra kultuvrraid (sisttisdoallá sámekultuvrra) ja ealáhusaid vuhtiiváldimiin.

Projeavtta ulbmil
Projeavtta ulbmilin lea oažžut sierra ealáhusaid doaibmat ovdánahtti ja boađuslaš vuorrováikkuhusas, vai gieldda eallinvuoibmi nanosmuvvá ja ođđa vejolašvuođat fitnodagain bargamii gávdnojit. Fierpmádatoktasašbarggus váldojuvvojit vuhtii báikkálašvuohta, kultursensitiivvalašvuohta sihke rádjaoktasašbarggu buktin vejolašvuođat.

Ulbmilin lea lasihit Ohcejoga dovddusvuođa áidnalunddot ja máŋggabealat luondoturismabáikin iige dušše Detnui vuođđuduvvi guolástanbáikin. Ulbmilin lea dan mielde dahkat turismmas máŋggabealat doaibmasuorggi  ja seammás nannet guvlui mihtilmas máŋggasuorggát fitnodatdoaimma, hutkat ođđa fitnodatdoaimma, ođđa buktagiid ja bálvalusaid ee. luonddubuktagiidda, kultuvrii sihke dujiide laktásettiin.

Projeavtta ruhtadeapmi ja ovddasvástádus

Ohcejoga ealáhusaid ovddidanprojeavtta oppalašgolut leat 204 600 euro. Projeavtta ruhtada Eurohpa eananguovllu ovddidanfoanda Lappi ELY-guovddáža bokte 194 370 euroin ja Ohcejoga gielda 10 230 euroin.

Projeavtta ollašuhttináigi lea 01.05.2018 – 30.06.2020.

Projeavtta ohcci ja vásttolaš ollašuhtti lea Ohcejoga gielda. Gielda vástida goluin projeavtta áigge, projeavtta hálddašeamis ja ollašuvvamis áigetávvala mielde. Projeavtta geavatlaš ollašuhttimis vástida projeaktahoavda.

Lassedieđut projeavttas:
Ovddidan- ja ealáhushoavda
t. 0400 151 294.