Vásttolaš turisma Ohcejogas -projeakta

1.3.2020–31.7.2022

Turisma lea Ohcejoga gielddas ain eanet mearkkašahtti barggu addi ja áigáiboađu bukti. Turismma buktin ávki guvlui lea buori muddui positiiva go dat lasiha sierralágan bálvalusaid geavahusa ja dan láhkai lasiha bargosajiid meari. Turisma goit váikkuha álo dan guvlui gos dat lea nu ekologalaččat, ekonomalaččat, sosiálalaččat go kultuvrralaččatge. Dálkkádatnuppástusa riskkaid ain ovddeš viidásut oaidnin ja vásttolašvuođa mearkkašumi lassáneapmi turismasuorggis oaivvildit maid dan ahte, turismasuorggi doaibmit galget figgat vásttolaš doaibmamii. Guovllu turismma boahtteáiggi dáfus lea vealtameahttun hámuhit makkár sierralágan váikkuhusat turismmas sáhttet leat guvlui. Suvdilis ovdáneami galggašii váldit vuhtii buot ealáhusain ja doaimmain dahje vásttolašvuođa galgá álo gieđahallat buot suvdilis ovdáneami dahkkiid dahjege ekologalaš, ekonomalaš, sosiálalaš ja kultuvrralaš suvdilisvuođa dáfus.

Čitnavánisvuohta lea dehalaš suvdilis ovdáneami oassi ja dan ollašuhttima várás berre ohcat nuppástusaid ráhkadusain, doaibmanmálliin, investeremiin ja guovllu oppalaš ovddideamis. Vásttolašvuođa mearkkašupmi turismafitnodaga ja –guovllu gilvodahkkin boahtá leat guovddášášši boahtteáiggis ja deaddu mii boahtá riikkaidgaskasaš soahpamušaid guovllus stuorru ovddežis ja dat maid unnida turismma dagahan čitnaluotta. Ipmirduvvo, ahte maid turismasuorgi berre váldit ovddasvástádusa dálkkádatnuppástusas ja dán dihte čitnaluotta unnideapmi lea boahtán dehalaš temán turismasuorggis maŋimuš jagiid.

Sihke riikkasis ja Lappi turismastrategiija váldet ovdan turismma ovddideamis vásttolašvuođa ja suvdilis ovdáneami. Visit Finland háliida dahkat Suomas vásttolaš turismma ovdamearkabáikki ja Ohcejohka lea beassan oktan pilohttabáikin mielde sin Sustainable Finland -prográmmii. Ohcejoga gielddas suvdilis ovdáneapmi lea jo vuhtii váldon sihke gieldastrategiijas ja ođđa turismma ovddidanprográmmas ja dasa laktáseaddji eanageavahanplánas. Maid guovllu mátkkošteamivuovdaleami, mii áiddo ođasmahttojuvvo, diehtojuohkimis lea vásttolašvuohta okta dan dehalamos brándaárvvuin. Dáin girjejuvvon árvvuid hárrái galgá beassat dál albma láhkai maid geavatlaš daguide.

Dárbu

Moatti čuovvovaš jagi siste Ohcejoga guovllu orrunkapasitehta lassána sakka ja dan mielde maid mátkkošteaddjimearit bohtet guovllus lassánit ollu. Maŋimuš jagiid erenoamážit jo riikkaidgaskasaš dálvemátkkošteapmi lea lassánan. Dálvemátkkošteapmi ovddiduvvui Destination Utsjoki – Utsjoen matkailun kansainvälistyminen -projeavtta áigge jagiid 2016-2018. Geassemátkkošteapmi vuođđuduvai ovdal ollu Deanu luossabivdui, muhto go guollebivdonjuolggadusat nuppástuvve, lea luossabivdoturismma mearri njulgestaga gahččan ja smávva fitnodagat mat leat vuođđudan doaimmaset dušše geassemátkkálaččaide leat juoba gártan heaitit doaimma. Nuppástuvvi doaibmagieddi lea ožžon áigái dan, ahte oassi fitnodatolbmuin lea vuolgán roahkkadit ohcat čovdosa doaimma viiddideapmái ođđa vuovdinvejolašvuođain dahjege lagamustá riikkaidgaskasaš dálvemátkkošteamis. Maid geasseáigái leat hutkojuvvon muhtun veardde jo ođđa buktagat, mat vuođđuduvvet luondomátkkošteapmái. Riikkaidgaskasaš mátkelágideaddjit ja mátkkálaččat gáibidit ain dávjjit, ahte mátkkoštanbáikkiin galggašii duođaid doibmet suvdilis ovddideami vuođul ja unnimustáge bázahusaid sirren galggašii leat ortnegis.

Mii lea projeavtta ulbmil?

Daningo Ohcejoga gielda lea olmmošlogu beales unni ja guhkes gaskkaid geahčen, lea guovlu bisson hui áidnalunddogin. Ohcejohka lea maid Suoma áidna gielda gos sápmelaččat leat eanetlohkun. Mátkkošteaddjimeriid lassáneapmi guovllus lasiha deattu birrasa lassin maid sosio-kultuvrralaš birrasii. Mo stuorru mátkkošteaddjimearit bohtet váikkuhit báikkálaš olbmuide? Mo váldo vuhtii sápmelaškultuvra seailun guovllus? Mo kultuvrra sáhttá buktit ovdan mátkkálaččaide suvdilis vugiin? Mo mátkkošteaddjimeriid stivret, ahte turismma hehttehus ovdamearkka dihte boazodollui livččii nu unni go vejolaš?

Mii projeavttas bargojuvvo?

Projeakta lea juhkkojuvvon viđa oassái:

Ohcejoga vásttolaš turismma dálá dilli
Hálti čitnaneutrála Ohcejoga guvlui
Ođđa vásttolaš mátkkoštanbuktagat
Vásttolaš turisma boazodoalu dáfus
Vásttolaš lagašmáđijat ja -báikkit

Projeavtta doaibman leat Ohcejoga turismma čitnavánis -prográmma dahkan, ug-fitnodagaid čitnavánisvuhtii ja biras-sertifikáhtaide laktáseaddji máhttima lasiheapmi dieđu buvttadeami ja bargobájiid bokte, kultursensitiivvalaš doaibmanvuogi nan¬nen turismma ja boazodoalu gaskasaš vuorrováikkuhusas sihke vásttolaš ja birrasa hárrái mieđis imago nannen gilvalannávcca lasiheapmin.

Projeavtta ruhtadeapmi ja ovddasvástádus

Projeavtta ollislaš bušeahtta lea 292 966 €.
Eurohpá guovlluidovddidanfoandda, EAKR ja Lappi lihtu (Lapin liitto) ruhtadeapmi lea 80,00%, 234 373 €. Iešruhtadanoassi projeavttas lea 20%, 58 593 €.

Projeavtta ohcci ja ollašuhtti lea Ohcejoga gielda.

Projeakta ollašuhtto 01.03.2020 – 31.07.2022.