Ohcejoga gielddas olu koronavirusinfekšuvnnat – dearvvasvuođafuolahus muittuha ain máskkaid, giehtahygieniija ja dorvogaskkaid mearkkašumis
14.3.2022
Ohcejoga gielddas leat dál valjis koronavirusnjoammumat. Vaikko dearvvasvuođafuolahus ii šat eanaš dáhpáhusain teste koronavirusa, lea dieđus, ahte dávda leavvá dál olu. Dearvvasvuođafuolahusa dilli lea goit ráfálaš, eaige ovdan leat boahtán váigadis dávdadáhpáhusat. Buot dán jagi sekvenserejuvvon čájánasat leamašan omikron-virusvariánta.
Vuoi koronavirus ii leavašii eambbo, lea ain dehálaš fuolahit buorre giehtahygieniijas, dorvogaskkain ja máskkaid geavaheamis almmolaš báikkiin álo, go eará olbmuide ii leat vejolaš doallat doarvái gaskka. Oainnát Ohcejoga gieldda buot dálá ávžžuhusaid ja ráddjehusaid ovtta sajis dáppe.
Jos navddát alddát koronavirusinfekšuvnna ja dus leat dávdamearkkat, galggat báhcit ruoktot ja garvit eará olbmuid nu guhká, ahte dávdamearkkat geahppánit. Jos hálidat, sáhtát dahkat ruoktoteastta. Dearvvasvuođafuolahus ii šat bargga njoammunbálgáid guorrama, testema iige errenmearrádusaid. Jos ruoktoteasta lea positiiva ja gulat riskajovkui dahje dárbbašat virggálaš duođaštusa koronavirusinfekšuvnnas, váldde oktavuođa dearvvasvuođafuolahussii.
Jos navddát alddát koronavirusinfekšuvnna, leat gártan njoammunvára vuollái dahje dahkan positiiva ruoktoteastta, oahpásmuva Ohcejoga gieldda beaiváduvvon doaibmarávvagii.
Heidi Eriksen, njoammudávddain vástideaddji doavttir
040 181 0284
heidi.eriksen@utsjoki.fi