Ohcejoga gieldda doaibmaráva koronatestemii, -njoammunáitagii ja -erremii
Jos navddát koronavirusinfekšuvnna
Koronavirusinfekšuvnna dávdamearkkat leat earret eará nuorvvu, gosahat, čottabávččas, feber, vuoigŋanváttisvuohta,
oaivebávččas, deahkkebákčasat, váibasat, illáveadjin, luhčadávda ja hádja- ja smáhkkaáiccu hedjoneapmi.
Jos navddát alddát koronavirusinfekšuvnna ja dus leat dávdamearkkat, galggat báhcit ruoktot ja garvit eará olbmuid nu guhká, ahte dávdamearkkat geahppánit. Jos hálidat, sáhtát dahkat ruoktoteastta.
Jos gárttat njoammunvára vuollái
Dearvvasvuođafuolahus ii šat čielggat njoammunvára vuollái gártan olbmuid. Koronavirusii buohccán olmmoš almmuha njoammumis ieš iežas lagaškontávttaide ja bivdá sin garvit dárbbašmeahttun kontávttaid viđa (5) jándora áigge. Skuvllas ja barggus sáhttá fitnat. Jos olmmoš hálida, sáhttá son dahkat ruoktoteasttaid viđa (5) jándora áigge. Njoammunvára vuollái gártan olbmo ávžžuhit geavahit máskka ja fuolahit giehtahygieniijas.
Jos buohccát koronavirusinfekšuvdnii
Njoammudávdadoavttir ii šat mearrit koronavirusii buohccán olbmo virggálaš erremii, muhto dákkár dáhpáhusas meannuduvvo baicce seamma láhkai go dábálaččat dalle, go olmmoš gártá leat eret barggus buohcuvuođa dihtii.
Doaibmarávvagat koronavirusinfekšuvnnas:
- Jos navddát alddát koronanjoammuma, lea ávžžuhus dahkat ruoktoteastta. Jos ruoktoteasta addá positiiva bohtosa, báze viđa (5) jándora eaktodáhtolaš erremii.
- Garvve kontávttaid ja báze eret bargosajis, skuvllas dahje beaiveruovttus unnimustá viđa (5) jándorii.
- Máhca dábálaš árgii easka dasto, go dávdamearkkat šaddet čielgasit geahppasabbon.
- Jos dárbbašat virggálaš duođaštusa barggus dahje skuvllas jávkamii dahje vuollái 16-jahkásačča dikšumii ruovttus, váldde oktavuođa dearvvasvuođaguovddážii, tel. 040 181 0285. Fuom. dearvvasvuođafuolahusa virggálaš koronatestii galgá várret áiggi ovddalgihtii nummáris 040 181 0285.
- Doaktára dahje divššára duođaštusa koronavirusinfekšuvnnas oažžu dušše virggálaš teastta vuođul. Teasttat dahkkojuvvojit Ohcejoga dearvvasvuođaguovddážis ja Gáregasnjárgga dearvvasvuođadálus.
- Olbmot, geain eai leat dávdamearkkat, eai testejuvvo Ohcejoga dearvvasvuođaguovddážis eará go njoammudávdalága gáibidan riikiiboahtindárkkisteami oktavuođas dárbbu mielde.
Váldde oktavuođa dearvvasvuođafuolahussii, jos ruoktoteasta lea positiiva ja
- gulat vejolaččat koronavirusa duođalaš dávdda riskajovkui.
- Dearvvasvuođafuolahusa ámmátolmmoš árvvoštallá riskajoavkkuide gullevaš olbmuid testema dárbbu (covid-19 infekšuvdnii lea fidnemis dálkkas, mii geahpeda buohcceviessodivššu/jámuid).
- leat áhpeheapmin dahje riegádahttán vuollái guhtta (6) vahku dassái ja dus leat dávdamearkkat.
- dárbbašat virggálaš duođaštusa koronavirusinfekšuvnnas.
Lassin dearvvasvuođafuolahusas testejit:
- sode-suorggi ámmátolbmuid, geat barget pasieanttaiguin, ja geain leat dávdamearkkat.
- sode-ovttadagaid ássiid/pasieanttaid, geain leat dávdamearkkat.
- jođánis antigenateasttain pasieanttaid, geat váldojuvvojit seaŋgaossodahkii man beare siva dihtii. PCR-teasta váldojuvvo, jos antigenateasta lea positiiva dahje jos olbmos leat dávdamearkkat.
- njoammunvára vuollái gártan sode-bargiid beaivválaččat viđa (5) jándora áigge njoammunváras.
Váldde bajábealde máinnašuvvon diliin oktavuođa:
- Ohcejoga dearvvasvuođaguovddáš 040 181 0285
- Gáregasnjárgga dearvvasvuođadivššár 040 758 2076
- Eahkediid, vahkuloahpaid ja árgabasiid: Ohcejoga dearvvasvuođaguovddáža seaŋgaossodat 040 181 0281
Jos du veadju hedjona, váldde telefovnnain oktavuođa goziheapmái!
- Árgan dmu 8–16:
- Ohcejoga dearvvasvuođaguovddáš 040 181 0285
- Eahkediid, ihkku, vahkuloahpaid ja árgabasiid:
- Anára gieldda dearvvasvuođaguovddáža goziheapmi Avvilis 040 770 9187
- Ohcejoga dearvvasvuođaguovddáža seaŋgaossodat 040 181 0281
Heahtedilis riŋge 112!
2.3.2022
Heidi Eriksen, njoammudávddain vástideaddji doavttir, Ohcejoga dearvvasvuođaguovddáš