Ohcejogas leat guokte ođđa koronavirusnjoammuma, buot njeallje dáhpáhusa leat seaŋgaossodagas
Njoammumiid vuolggasadji ii leat vuos čielgan.
Ohcejoga gielddas leat gávdnon bearjadatiđida 21.8. rádjai guokte ođđa koronavirusnjoammuma. Njoammumat leat Ohcejoga seaŋgaossodaga pasieanttas ja bargis.
Pasieanta leamaš erremis dan rájes, go seaŋgaossodagas gávdnui vuosttas njoammun vuossárgga 17.8. Maiddái bargi ii leat leamaš barggus dan áiggis, go lea sáhttán njoammudit earáid.
Ohcejogas leat gávdnon dán rádjai oktiibuot njeallje koronavirusnjoammuma. Buot njoammumat leat seaŋgaossodagas. Vuosttas njoammumiid gávdne seaŋgaossodaga guovtti pasieanttas vuossárgga 17.8. ja maŋŋebárgga 18.8.
Koronavirusii buohccán olbmuiguin leamaš dahkamušas árvalusaid mielde vádjit 20 olbmo, eanaš Ohcejoga dearvvasvuođaguovddážis. Ohcejoga njoammumiidda laktásit goittotge buohkanassii guhtta koronadáhpáhusa, main njeallje leat gávdnan Ohcejogas ja guokte gieldda olggobealde.
Njoammumiid vuolggasadji ii leat vuos čielgan. Ohcejoga gielda joatká njoammunbálgáid guorrama, virusiin vejolaččat dahkamušas leamašan olbmuid testema ja mearrida dárbbašlaš errendoaimmain. Buot vejolaš njoammumat kártejuvvojit systemáhtalaččat ja olbmot ožžot áššis dieđu persovnnalaččat.
Koronanjoammumiid váikkuhusain gieldda dearvvasvuođabálvalusaide sáhttá lohkat dáppe.
Lassidieđut:
Heidi Eriksen
Vástideaddji doavttir
Tel. 040 1810284
Vuokko Tieva-Niittyvuopio
Gielddahoavda
Puh. 0400 933 754
Jos eahpidat alddát dahje lagasbirrasis koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8-16 tel 040 1810285, vahkuloahpaid, eahkediid ja árgabasiid tel 040 1810281) de beasat koronatestii.
Koronavirusa dábálaš dávdamearkkat leat earret eará feber, gosahat, oaivebávččas, illáveadjin, luhčadávda, deahkkebákčasat, čottabávččas, nuorvu, vuoigŋanváttisvuođat ja hádja- ja smáhkkaáiccu hedjoneapmi. Mánáin dávdamearkkat sáhttet leat láivvit ja bistit oanehis áiggi. Koronavirusdávdda mearkkaid ii sáhte earuhit eará virusdávddaid mearkkain earágo koronavirusteasttain.
Lasi dieđuid koronavirusdilis gávnnat earret eará Ohcejoga gieldda, Lappi buohccedikšunbire ja THL neahttasiidduin.