Ohcejohka Šearrá kulturvahku prográmma lea almmustahtton – nuvttá fálaldat sámemusihkka, -ealligovat ja čáppagirjjálašvuohta

Suoidnemánu vuosttas vahkus lágiduvvo Ohcejohka Šearrá – Utsjoen Lumo -kulturvahku ja prográmma lea almmustuvvan. Kulturvahkku lágiduvvo dál goalmmát geardde. Kulturvahku oaivedáhpáhusat leat sámegielat diktafestivála, Mu ráhkis Ohcejohka -musihkkafestivála ja ealligovvafestivála.

Ohcejohka Šearrá -kulturvahku dáhpáhusat leat nuvttá ja buohkaide rabas. Kulturvahkkui sáhttet buohkat plánet ja ollašuhttit iežas prográmma Ohcejoga giliide girkosiidii, Gáregasnjárgii ja Njuorggámii.

Bearjadaga 5.7. ordnejuvvo sámegielat diktafestivála Buolbmátjávrris. Diktafestivála ulbmilin lea ovdanbuktit rikkis Deanuleagi čáppagirjjálašvuođa. Diktafestiválas jitnii besset Inger-Mari Aikio, Niillas Holmberg, Helga West, Niilo Aikio ja Siri Broch Johansen. Diktafestiválas lea maid rabas mikrofovdna, nuba dovdameahttun diktačállit besset jitnii, jos nu háliidit.

Lávvardaga lea vuorus Mu ráhkis Ohcejohka -musihkkafestivála Gieddemiellis, mii buktá lávddi ala máŋgga beakkán sámeartistta. Vejolaččat beaivvi miellagiddevaččamus artista lea maŋimuš 2000-logu álggus konserteren Jiella, mii loaiddasta ovttas Trio Boogiemenin. Beaivvi áiggi lávddi ala besset maid Emil Kárlsen, Suõmmkar, Ulla Pirttijärvi & Ulda, Hildá Länsman ja Jalvvi Niillas. Festiválas beassat oaidnit maid Riikka Kosola dánsun- ja sirkusovdanbuktima #raja23.

Kulturvahkku nohká 7.7. sámeealligovvafestiválii Gáregasnjárgii. Ealligovvafestivála ordnejuvvo ovttasbarggus Sámedikki ealligovvaguovddáš Skábmain ja festivála filmmat almmuhuvvojit maŋŋelabbos.

Prográmma beaiváduvvo čujuhussii www.utsjoki.fi/ohcejohkasearra

Ohcejohka Šearrá kulturvahku ordnejit Ohcejohnjálmmi gilisearvi ja Ohcejoga gielda, Sámediggi ja Ohcejoga gievrrat searvi. Kulturvahku ruhtadit Taiteen edistämiskeskus, Ohcejoga gielda ja Sámediggi.

Lassedieđut:

Asttuáiggčálli Kaisa Tapiola-Länsman
kaisa.tapiola-lansman@utsjoki.fi
+358 400 319 852