Ohcejoga gielda kárte ássamii guoski jearaldaga ja fálaldaga
14.5.2024
Ohcejoga gielda rahpá golbma sierra jearahallama, mat gusket ássama. Ássamii laktáseaddji dárbbuid birra jerrojuvvo sihke fitnodatdoalliin ja dábálaš olbmuin, geat ohcet viesu, dálu dahje viessosaji. Goalmmát jearahallan lea oaivvilduvvon giddodateaiggádiidda, geain jerrojuvvo leago mokta fállat viesuid, dáluid ja viessosajiid láigoheapmái ja vuovdimassii. Jearahallamiidda sáhttá vástidit miessemánu loahpa rádjai.
Viessovátnivuohta lea duođalaš
Ohcejohka dárbbaša ođđa vearromáksiid, dasgo ráhkadusnuppástus lea dolvon vearroboađuid. Eallinfámu ovddideami várás dárbbašat ođđa bargosajiid ja bargiide viesuid. Ođđa ássiid ásaiduvvama ja guovloovddideami easttan lea leamaš jagiid bistán viessovátnivuohta. Seamma váttisvuohta lea measta oppa Lappi guovllus. Ohcejoga gielda darvána dál vuosttas geardde systemáhtalaččat váttis viessodillái ja čielggada, makkár viesuide dahje viessosajiide lea dárbu, vai joatkkadoaimmaid bastá čujuhit riekta.
– Mii hálidat vuos čielggadit, makkár ássamii guoski dárbbut duođalaččat gávdnojit, muitala eallinfápmohoavda Tanja Lepistö jearahallamiid duogážiin. – Go beare vuos čielggadat sierra ulbmiljoavkkuid dárbbuid, de álggahišgoahtit doaibmabijuid, vai ássandilli buorrána.
Čielggadeami vuolde eaiggádiid mokta láigohit dahje vuovdit giddodagaideaset
Priváhta giddodat- ja viessosadjeeaiggádiidda lea dahkkon sierra jearahallan, mas čielggaduvvo, sáhtášiigo Ohcejogas lasihit viesuid, dáluid ja viessosajiid priváhta fálaldaga ja dan márkanastima bokte. – Mii sávvat ahte ohcejohkalaččat guorahalašedje, sáhtášiigo giddodagaid, mat leat uhcán geavahusas dahje geavatkeahttá, láigohit dahje vuovdit, dadjá Tanja Lepistö. – Dálá fálaldaga bokte oččošeimmet jođánit lasi ođđa báikkiid viessodárbbašeaddjiide.
– Viesut sáhttet leat friija láigomárkaniin, muhto olggobeale olbmot eai gávnna fálaldaga dahje dieđu das, gos viesuid gánnáha jearrat. Báikkiid oinnolašvuhtiige galgá giddet fuopmášumi.
Viessodárbbuid jearahallan sihke ássiide ja fitnodagaide
Máŋggat báikkálaš fitnodagat addet barggu olbmuide, geaidda dárbbašuvvojit viesut. Ovdamearkka dihte turismafitnodagat dárbbašit sesoŋŋaáigái bargui boahtti bargiidasaset orrunbáikki, muhto maid birrajagi viesuide lea fitnodagain dárbu. – Muhtun fitnodagain leat viesut bargiidasaset, muhto min áddejumi mielde lassedárbu lea, dadjá Tanja Lepistö. – Fitnodatdoalliid gánnáha dál vástidit jearahallamii, vai mii oažžut buot dárbbuid dihtui nu viidát go vejolaš.
Dábálaš ássanjearahallan lea oaivvilduvvon viessodárbbašeaddjiide ja sidjiide, geat hálidit lonuhit ruovttu dahje vaikkoba niegadit gávdnat dálu. Nuba dán jearahallamii sáhttá vástidit gii beare, gii dárbbaša viesu dahje viessosaji. Jearahallamis leat váldon vuhtii sihke báikkálaš olbmot ja sii, geat vihkkedallet fárrema eará sajis deike.
Lassediehtu:
Eallinfápmohoavda Tanja Lepistö, 0400 151 294, tanja.lepisto@utsjoki.fi