Barents ja davviguovllu ambassadevra Jari Vilén galledii maŋŋebárgga 6.10. Ohcejogas
Vilén joavkkuinis johtá dán vahkus davimus Suomas ságastallamin Barents guovlluráđi boahttevaš ságadoalleáigodagas.
Govas Ohcejoga váldostivrasáles Barents guovlluráđi čállingotti beaivválaš jođiheaddji Roman Gokkoev (gur.), Barents ja davviguovllu ambassadevra Jari Vilén, gielddahoavda Vuokko Tieva-Niittyvuopio ja vs. ealáhus- ja ovddidanhoavda Johanna Mikkola.
7.10.2020
Suoma olgoministeriija Barents-ságadoallejoavkku oahpásmuvvanmátki Davvi-Supmii ja -Norgii álggii maŋŋebárgga Ohcejogas. Joavku oahpásmuvvá dán vahkus davviguvlui Suoma sámeguovllus ja Finnmárkkus, ja galleda Ohcejoga lassin earret eará Avvilis ja Norgga Girkonjárggas. Mátkkis lea dárkkuhus ságastallat davviguovlluid doaibmiiguin Barents guovlluráđi Suoma ságadoalleáigodagas, mii álgá golggotmánus 2021.
Barents ja davviguovllu ambassadevra Jari Vilén válmmaštallá ságadoalleáigodaga. Viléna lassin mátkái oassálastiba Barents guovlluráđi čállingottis beaivválaš jođiheaddji Roman Gokkoev ja hárjehalli Ella Wahlbeck.
Joavku muitalii maŋŋebárgga Ohcejoga gieldda ovddasteaddjiide Barents euroárktalaš ráđi doaimmas ja hálidii gullat gieldda sávaldagaid Suoma ságadoalleáigodahkii, mii álgá jagi geažes.
Ohcejoga gielddahoavda Vuokko Tieva-Niittyvuopio ja vs. ealáhus- ja ovddidanhoavda Johanna Mikkola muitaleigga gussiide Ohcejoga gieldda birra, guovllu ovdánanvejolašvuođain ja ođđa projeavttain. Dilálašvuođas ságastahtte maiddái erenoamážit koronaepidemiija váikkuhusat ohcejohkalaččaid árgii, rádjaservošiid eallimii ja báikkálaš ealáhusaid ovddideapmái.