Ohcejoga eanapolitihkalaš prográmma ja turismma master plan huksejit vuođu ovddideami várás

Ohcejoga váldostivra lea dihkkádan duostilit ulbmiliid, maiguin gielda ovddidišgoahtá Ohcejoga eallinfámu. Varas gieldastrategiija vuođđuduvvá dasa, ahte turisma lea dat doaibmasuorgi, mas leat vejolašvuođat lassánit. Ovdánettiin dat maid lasiha lunddolaš jođu eará ealáhusaide. Váldostivra dohkkehii geassemánus guhkesáiggi ovddideami doarjjan Ohcejoga gieldda vuosttas eanapolitihkalaš prográmma ja dasa lassin kvantitatiivvalaš ja kvalitatiivvalaš ulbmiliid turismma strategiijarámman.

Ohcejoga eanapolitihkalaš prográmmas meroštallojit gieldda eanapolitihkalaš ulbmilat ja barggut. Prográmma addá dieđuid gieldda eanageavaheami doaibmanpolitihka birra sihke tontte ohccái, eanaoamasteaddjái, huksenfitnodahkii ja maiddái ođđa mearrideaddjiide.

Meahciráđđehus eaiggáduššá Ohcejoga eanaviidodagas  badjel 90 proseantta ja eatnašat eatnamiin leat suodjaluvvon. Gildii dárbbašuvvojit ođđa tonteguovllut sihke ássama ja fidnošandárbbuid várás. Danin eanapolitihkalaš prográmma dihkkáda earret eará tonte- ja lávvekeahtes eatnama háhkama. Turismma ovddidanguovlun leat válljejuvvon guovllut Ohcejoga girkosiiddas, Njuorggáma ja Gáregasnjárgga giliin, Buolbmatjávrregeainnu guoras ja lassin moadde guovllu Deanu gáddeguovllus.

Turismma ovddideapmi lea maiddái eanapolitihkalaš prográmmas guovddáš bealli. Turismma lassáneami dahká vejolažžan eanapolitihkka, mii lea dávggas ja mii váldá vuhtii fidnošeami dárbbuid. Turismma master plan ulbmilin lea hukset gildii oppalaš plána ovddidit turismma. Plána leat válmmaštallan ovttasbarggus gieldda fitnodatdoalliiguin, gieldalaččaiguin ja mearrideaddjiiguin. Geassemánus dohkkehuvvojedje Ohcejoga turismma kvantitatiivvalaš ja kvalitatiivvalaš mihtut jagi 2035 rádjai. Gudneáŋgiris mihttun lea oččodit 1000-2000 oađđinsaji ja miljovnna lassevearroeuro turismma bokte. Leat árvvoštallan, ahte turismafitnodagain galggaše leat unnimustá 200 oađđinsaji. Dalle fitnodatdoaimma váikkuhus gieldda vearuid čoggomii lea stuoris, go dat addá ollu barggu. Uhcit fitnodagat dárbbašuvvojit buvttadit erenomážit prográmma- ja fievrridanbálvalusaid.

Turismma figget lasihit turisttaid guhkit áiggi ádjánemiin guovllus ja jahkodatvuođa ovddidemiin. Turisttaid háliidit mielde láidejuvvon prográmmabálvalusaide ja -pakeahtaide. Dehálamos ulbmiljoavkkut leat riikkaidgaskasaš áššehasat, geat mákset buori mávssu. Maiddái báikkálaš kultuvrra ja autenttalašvuođa háliidit seailluhit. Dainna láhkai Ohcejoga erenomášvuohta seailu.

Turismma master plan gárvána čakčat. Planas meroštallojit ođđa brándda lassin maiddái boahttevaš doaimmat. Gildii dárbbašuvvo ovdamearkka dihte geinnodatplána. Plánain beassat ovddidit geinnodagaid ovttas sohppojuvvon vugiin.

Lagamus jagiid gielda ovddida turismma máŋggabealagit. Ođđa bránda sajáiduhttojuvvo, nu ahte guovllu turismma jahkodatvuohta ovdána. Geinnodagat ja eará turismaaktivitehtaid guovlluidgeavaheapmi ovddiduvvojit. Lassin guovllu gárvves fitnodagaid doarjut doaimmaset ovddideamis. Maiddái viessobuvttadeami figgat ovddidit. Dáiguin doaimmaiguin Ohcejoga gielda árvvoštallá, ahte dat bastá hohkahit guvlui ođđa investerejeaddjiid, mat háliidit ovddidit guovllu turismma. Ohcejogas turisma vuođđuduvvá Suoma dáfus áidnalunddot birrasii, nana sámi kultuvrii ja rádjeguvlui, mii láhčá vejolašvuođa lasihit Norgga mielde turismavásáhussii.

Ohcejoga eanapolitihkalaš prográmma (pdf)

Lassedieđut:

Eallinfápmohoavda Tanja Lepistö
0400 151 294
tanja.lepisto@utsjoki.fi