Váldostivra dohkkehii čoahkkimis 21.5 mánáid ja nuoraid buresveadjinplána

Mánáid ja nuoraid áššit ledje sakka ovdan Ohcejoga váldostivrra miessemánu čoahkkimis. Čoahkkimii maiddái bohte nuorat, dasgo čoahkkima álggus Ohcejoga nuoraidráđi ságadoalli guoktá muitaleigga nuoraidráđi doaimma birra. Seammás maid Ohcejoga boarrásiid- ja doaibmaváttogiidráđit muitaledje iežaset fuolaid ja dárbbuid birra.

Ohcejoga váldostivra dohkkehii mánáid ja nuoraid buresveadjinplána ja servodatlaš stuđerenfuolahusa ovddidanruhtadeami. Mánáidsuodjalanláhka geatnegahttá gielddaid gárvvistit plána, mainna dat ovddidit mánáid ja nuoraid buresveadjima ja lassin mánáidsuodjalusa ordnema ja ovddideami.  Dál gárvvistuvvon plána lea fámus čuovvovaš jagi lohppii ja dat beaividuvvo juohke váldostivrabaji.

Ságastallamis badjánii maid fuolla Lapha doaimmas, dasgo skuvlakuráhtora doibmii áigot boahtteáigge lasihit maid bearašbarggu. Ohcejoga skuvlakuráhtor lea masá hievganan mánáid ja nuoraid guoskevaš bargguide. Lapha ii leat mearrádusastis gulaskuddan gieldda, iige váldán vuhtii Ohcejoga erenoamášbeliid, ovdamearkka dihte guhkes gaskkaid.

Váldostivra dohkkehii maid sierraruhtadeami servodatlaš stuđerenfuolahusa ja ovddalgihtii eastadeami prošektii, masa bálkáhuvvo buohccedivššár lohkanjahkái doarjut oahpaheaddjiid ja oahpahusjoavkkuid. Gielda lea ožžon Oahpahus- ja kulturministeriijas 20 000 stáhta ruhtadoarjaga, mainna dat ovddida servodatlaš stuđerenfuolahusa iešguđege oahpahuscehkiid oahpahusas ja skuvlejumis. Gieldda iežasruhtadeapmi lea 30 %.

Čoahkkima beavdegirji gávdno dáppe.

LASSEDIEĐUT:

Gielddastivrra ságadoalli Arto Pohjanrinne
040 770 3986
arto.pohjanrinne@utsjoki.fi

Gielddahoavda Päivi Kontio
040 744 7630
paivi.kontio@utsjoki.fi