Deanuleagis sámástit -prošeakta almmustahttá álbmotbeaivvi gudnin iežas neahttasiidduid – erenomášvuohtan Deanuleagi sámegielat dáhpáhusaid kaleandar!

Ohcejoga gieldda Deanuleagis sámástit -prošeakta lea otne, 6.2.2021, almmustahttán iežas neahttasiiddu čujuhusas www.samastit.org.

Prošeakta almmustahtii neahttasiidduidis sámi álbmotbeaivvi gudnin. Prošeakta lea dán rádjai almmuhan doaimmainis Ohcejoga gieldda neahttasiiddus, muhto otná beaivvi rájes diehtojuohkin sirdašuvvá prošeaktasiidui.

Deanuleagis sámástit -prošeavtta ođđa neahttasiidduin gávdnojit máŋggabealagit dieđut prošeavttas, dan duogážis ja doaimmain. Siiddut leat davvisáme-, suoma- ja dárogillii.

Siidduid oktan erenoamášvuohtan lea sámegielat dáhpáhusaid kaleandar, mas prošeaktahoavda Kati Eriksen sávvá šaddat olles Deanuleagi oktasaš kaleandara.

– Dávjá gullat olbmuid lohkamin, ahte livčče searvan doaimmaide, jos fal diehtán. Sávvamis min kaleandara bokte olbmot gávdnet álkket sámegielat doaimmaid dán guovllus!

Dasa lassin, ahte juohkehaš sáhttá almmuhit iežas sámegielat dáhpáhusaid siidduid kaleandarii, sáhttá siidduin maid earret eará deavdit sávaldatskovi Deanuleagi dáhpáhusain ja asttuáiggedoaimmain.

Deanuleagis sámástit lea guovttejahkásaš (2020–2022) Interreg Davvi -prošeakta, man ollašuhttet ovttasbarggus Ohcejoga gielda, Sámi ealáhus- ja guorahallanguovddáš (SEG) ja Kajaani ámmátallaskuvla (KAMK).

Prošeavtta vuođđoulbmil lea gáhttet Deanuleagi sámegiela ja árbedieđu iešguđetlágan doaimmaiguin. Prošeakta earret eará lágida sámegielat doaimmaid Deanuleagis rastá riikkarájá, vuođđuda Ohcejohkii Giellagárdi-giellaguovddáža, ovddida Deanuleagi giellaguovddážiid ovttasbarggu, buvttada sámegielat Vuosterávdjái-oahppospealu ja doarju sámegiela gáiddusoahpahusa.