Ohcejoga gieldda bealiváldin Suoma ja Norgga gaskasaš rájá rahpamii
Suoma davvi rádjagielddaide Norga lea hui deaŧalaš. Lei áddemis, ahte rája fertii gokčat koronavirusa leavvanmuttus. Dál lea goittotge dilli ráfálaš sihke Suoma ja Norgga bealde rájá, ja mii gáibidat johtilit ráđđádallamiid rájá rahpamis ja ráddjemiid geahpedeamis.
Suoma ja Norgga gaskasaš rájá fáhkkestaga gokčan lea bissehan Ohcejoga gieldda ealáhuseallima. Norgga rádjagávpi lea Ohcejoga gieldda deaŧalamos ealáhusat, stuorra bargoaddi ja searvvušvearu máksi. Ohcejoga fitnodagaid vuovdimiin badjel 75 % boahtá gávppis, mii vuođđuduvvá rádjagávpái. Áššehasain árvvu mielde badjel 90 % lea norgga beale olbmot. Statistihkkaguovddáža mielde jagi 2018 grossa- ja bođugávppi doaibmabáikkit leamašan 20, vuovdimat leamašan sullii 30 miljovnna euro ja bargiid lohku 82 (oppa gieldda barggolaččaid mearri 486). Dáid lassin rájáid gidden lea váikkuhan bealistis maiddái eará doaibmasurggiide, nugo buorredillebálvalusaide ja idjadandoaibmamii.
Dán háve gávpi lea bisánan ja fitnodagaid ja bargiid boahttevuohta birccihasas. Gávppiin ja fitnodagain leat nohkan áššehasat goasii ollásit, doaibmasajiid leat gártan gokčat ja bargiid cealkit eret ja luopmudit.
Rájáid gitta doallan orru hui govttoheapme guovllus, gos ng. koronadáhpáhusat eai leat. Jos ráját bissot gitta guhkit áiggi, de dát šaddá njeaidit guovllu ealáhuseallima. Gieldda bargguhisvuohta šaddá lassánit mearkkašahtti láhkai, ja govttolaš gieldaekonomiijadilli šaddá muhttašuvvat vearroboađuid geahppáneami mielde. Bargguhisvuođadilli šaddá váikkuhit maiddái fárremii negatiivvalaččat. Biebmanfitnodagaid rabadettiin uvssaideaset ja turismma álggedettiin Ohcejoga áššehasjoavkkus váilot ainge stuorámus áššehasjoavku nuppiin sániin Norgga beale olbmot, ja nuppe dáfus reaissut Norgga beallái leat Ohcejoga turismma deaŧalaš oassi.
Deanu čázádaga kulturguovlu lea oktasaš guktuid bealde rájá. Rájáid gitta doallan čuohcá mearkkašahtti láhkai maiddái olbmuid árgabeaivái. Rájá rasttildeaddji johtolat gullá árgabeaivái, dasgo olbmot fitnet gávppašeamen ja geavahit bálvalusaid ja maiddái fuolke- ja verddegaskavuođat ollet lunddolaččat rájáid rastá. Norggain lea oktasašbargu maiddái sosiála- ja dearvvasvuođabálvalusain sihke čuvgehusbálvalusain.
Suoma ja Ruoŧa rádjá lea dán háve eanet rabas go Norgga ja Suoma rádjá, vaikke Ruoŧa koronavirusdilli lea fuonit go Suomas. Norgga dilli lea Suomain mealgadit seammalágan, iige rájá rahpan galggašii dagahit riskka goappáge bealde. Norga ja Dánmárku rahpet oktasaš rájáset mátkkošteapmái 15.6.2020. Suopma galggašii eandalii viggat dan seammái Norggain.
Ohcejogas 3.6.2020
Eeva-Maarit Aikio
vs. gielddahoavda, Ovddidan- ja ealáhushoavda
Ohcejoga gielda