Ohcejoga gielda stáhta geaidnofierpmádaga investerenprográmmas: Lappi geaidnofierpmádaga ovddideapmái ja vuođđodivvumii galgá bidjat áibba ođđa láhkai resurssaid
28.2.2023
Ohcejoga gielda oaivvilda, ahte Lappi geaidnofierpmádaga ovddideapmái ja vuođđodivvumii galgá bidjat áibba ođđa láhkai resurssaid boahttevuođas. Ohcejoga gielda lea 28.2. addán Väylävirastoi (sá. Geaidnodoaimmahat) cealkámušas stáhta geaidnofierpmádaga investerenprográmmas jagiide 2024–2031. Väylävirasto lei bivdán cealkámušaid vuođđun iežas joatkkabargui.
Ohcejoga gielda fuopmášahttá almmolaš dásis, ahte olles Lappi eanagotti infradárbbut leat váidalahtti unnán mielde geaidnofierpmádaga investerenprográmmas. Davimus Lappis eai leat plánen álggahit ovttage infraprošeavtta.
– Dát lea mearkkašahtti váttisvuohta guovlluid dárbbuid dássebealatvuođa ja olles riikka fuolahussihkkarvuođa geahččanguovllus. Riikkadási Johtolatortnetplána (su. Liikennejärjestelmäsuunnitelma) 2021–32 galgá váldit ođđasis gieđahallamii boahtte ráđđehusbajis, gielda oaivvilda.
Lappi geaidnofierpmádaga ovddideapmái galgá Ohcejoga gieldda mielas bidjat boahtteáiggis návccaid earret eará dorvvolašpolitihkalaš sivaid, olles riikka fuolahussihkkarvuođa, industrijia fievrridemiid ja turismma ovddideami dihte.
– Ovdamearkka dihte Ohcejogas heittot infra váttásmahttá mearkkašahtti láhkai turismma ovddideami gielddas, mii lea gártan fáhkka ráhkadusnuppástusa (su. äkillinen rakennemuutos) dillái.
Ohcejoga gielda buktá cealkámušastis ovdan ovttaskas buoridandárbun erenoamážit geahppa johtolaga geainnuid dahkama Ohcejoga ja Njuorggáma čoahkkebáikkiide, Girkobávttis gahččan laiggahagaid čorgema njelješgeainnu guoras ja Suoma ja Norgga rájá alde Gáregasnjárgga šalddi ja duolloštašuvnna johtolatordnedallamiid ođadeami.
Sáhtát lohkat cealkámuša ollásit dákko (suomagillii).