Ohcejogas ja Gáregasnjárggas leat váldon atnui koronavirusa jođánis teasttat – geahča lassin beaiváduvvon rávvagiid bargui, beaivedikšui ja skuvlii máhccamis
19.11.2020
Ohcejoga gielddas leat váldon atnui jođánis teasttat COVID-19 koronavirusinfekšuvnna diagnoseremis. Jođánis teastta boađus gárvvásmuvvá sullii diibmobealis. Jođánis teasttat dahkkojit dušše pasieanttaide, geain leat makkárnu dávdamearkkat.
Testii beassá sihke Ohcejoga dearvvasvuođaguovddážis ja Gáregasjárgga dearvvasvuođadálus. Rávvagat testii ohcaleapmái gávdnojit vuolábealde.
Rájáid rasttildeaddjit, geain eai leat dávdamearkkat, testejuvvojit pcr-teasttain.
Ohcal testii dalán, go dávdamearkkat ihtet!
Suoma koronastrategiija mielde olmmoš galgá ohcalit testii dalán, go dávdamearkkat ihtet vuoi vejolaš koronainfekšuvnnat gávdnojit nu árramuttus go vejolaš.
COVID-19 koronavirusinfekšuvnna dávdamearkkat leat earret eará oaivebávččas, hádja- ja smáhkkaáiccu hedjoneapmi, feber, nuorvu, gosahat dahje vuoigŋanváttisvuođat, deahkkebákčasat, čottabávččas, illáveadjin, vuoksin ja luhčadávda.
Ohcal koronatestii dalán, go dávdamearkkat ihtet:
- Árgan Ohcejoga dearvvasvuođaguovddáš tel. 040 181 0285, Gáregasnjárgga dearvvasvuođadivššár tel. 040 758 2076
- Eahkediid, vahkuloahpaid ja árgabasiid Ohcejoga dearvvasvuođaguovddáža seaŋgaossodat tel. 040 181 0281
Jos infekšuvdna-mearkkat vearránit, galggat álo vuosttamužžan váldit oktavuođa gozihanvuostáiváldimii telefovnna bokte:
- Virgeáigge dbm 8–16 Ohcejoga dearvvasvuođaguovddáš tel. 040 181 0285
- Eahkes, ihkku, vahkuloahpas ja árgabasiid Anára gieldda dearvvasvuođaguovddáža goziheapmi Avvilis tel. 040 770 9187 dahje Ohcejoga dearvvasvuođaguovddáža seaŋgaossodat tel. 040 181 0281
Heahtedilis riŋge 112.
Jos koronavirusteasta lea positiivvalaš, dearvvasvuođafuolahus bidjá olbmo erremii ja čielggadišgoahtá njoammunbálgáid. Dearvvasvuođafuolahus addá joatkkarávvagiid.
Rávvagat bargui máhccamis
Jos COVID-19 koronavirusteasta lea negatiivvalaš ja:
- nákcet bargat, muhto infekšuvdna-mearkkat bissot, váldde oktavuođa iežat bargoaddái bargguid ordnema dihte (gáiddusbargu jos vejolaš). Jos gáiddusbargu ii leat vejolaš, čuovo koronaáiggi rávvagiid: ane suodjemáskka, doala dorvogaskkaid ja fuolat giehtahygienas. Garvve dušši sosiála kontávttaid dávdamearkkaid áigge amaset infekšuvnnat njoammut ovddosguvlui. Ane bákkolaš áššiid dikšumis suodjemáskka.
- it nákce infekšuvdna-mearkkaidat dihte bargat, almmut áššis iežat bargoaddái. Ohcejoga gieldda bargi sáhttá dábálaččat leat iežas almmuhusain hovdii eret vihtta (5) jándora dearvvasvuođafuolahusa duođaštusa haga. Eará bargoaddiid bargit čuvvot iežaset bargoaddiid rávvagiid. Bivdde dárbbu mielde Ohcejoga dearvvasvuođaguovddáža buohccedivššáris/dearvvasvuođadivššáris duođaštusa buohcanluomus (Ohcejoga poliklinihka buohccedivššár tel. 040 181 0285, Gáregasnjárgga dearvvasvuođadivššár tel. 040 758 2076). Garvve dušši sosiála kontávttaid dávdamearkkaid áigge amaset infekšuvnnat njoammut ovddosguvlui. Ane bákkolaš áššiid dikšumis suodjemáskka.
Jos infekšuvdna-mearkkat joatkašuvvet, ohcal ođđasit koronavirustestii.
Jos mánná buohccá – rávvagat beaivedikšui ja skuvlii máhccamis
Vuoi koronavirus ii njoamo ovddosguvlui, lea hui dehálaš, ahte mánná ii mana buohccin skuvlii dahje beaivedikšui.
Jos skuvlaahkásaš mánás dahje su bearašlahtus leat makkárge koronavirusdávdii čujuheaddji dávdamearkkat, galgá olmmoš ohcalit koronavirustestii dakkaviđe. Koronavirusa dávdamearkkaid ii sáhte earuhit mange eará virusdávdda mearkkain eará go teasttain. Erenomážit mánáid koronavirusdávdamearkkat leat dávjá láivvit ja bistet dušše oanehis áigge.
Mánáid vánhemat sáhttet váldit teasttain oktavuođa Ohcejoga poliklinihka buohccedivššárii tel. 040 181 0285 dahje Gáregasnjárgga dearvvasvuođadivššárii tel. 040 758 2076. Skuvlaahkásaš mánná sáhttá máhccat skuvlii, jos koronavirusteasta lea negatiivvalaš ja dávdamearkkat leat čielgasit láivumin.
Vuollel skuvlaahkásaš máná láivves dávdamearkkaid sáhttá čuovvut ruovttus moadde beaivve testema haga. Máná dávdamearkkat leat láivvit, jos son lea virkui ja nagoda stoahkat, vaikko sus livčče nuorvu, gosahat ja/dahje feber. Jos mánás leat dávdamearkkat, son ii sáhte mannat beaivedikšui.
Jos máná dávdamearkkat jávket ruovttus ollásit, ii son dárbbaš mannat testii, ja sáhttá máhccat árrabajásgeassimii, go leamaš dearvan unnimustá ovtta beaivvi. Jos dávdamearkkat joatkašuvvet, livččii buorre čielggadit, leago sivvan koronainfekšuvdna. Vuollel skuvlaahkásaš mánná sáhttá máhccat árrabajásgeassimii, jos koronavirusteasta lea negatiivvalaš ja dávdamearkkat leat čielgasit láivumin.
Olmmoš, geas leat dávdamearkkat, galgá bissut ruovttus unnimustá teastabohtosa gárvvásmuvvama rádjai. Bearašlahtut, geain eai leat dávdamearkkat, sáhttet leat skuvllas, beaivedivššus dahje barggus teastabohtosa vuordináigge, jos ii de leat buorre sivva eahpidit, ahte teastabohtosa vuordi bearašlahtus lea koronavirusnjoammun.
Jos koronavirusteasta lea positiivvalaš, galgá olles bearaš bissut ruovttus. Joatkkarávvagiid oažžu dearvvasvuođafuolahusas.