Boađátgo čuoiganlupmui Ohcejohkii? Geahča gieldda rávvagiid dorvvolaš luomostallamii ja sávaldagaid girjeráju ja sislihkadanbáikkiid geavaheapmái!

 

COVID-19-dilli lea hedjonan olles Suomas ja stuorámus oassi buohccedikšunbiirriin leat rievdan korona jođálmuvvan- ja leavvanguovlun. Lappi buohccedikšunbiirres eallit ain koronadili vuođđomuttu, muhto lahkoneaddji dálveluomut buktet vuordimis Davvi-Supmii, maiddái Ohcejohkii, gieldalaččaid ja mátkkošteaddjiid korona jođálmuvvan- ja leavvanguovlluin.

Ohcejoga gielda ávžžuha olbmuid, geat bohtet čuoiganlupmui Ohcejohkii eará guovlluin, muitit koronadorvvolašvuođa vuođđoáššiid: buorre giehta- ja gossanhygiena, dorvogaskkaid ja suodjemáskka geavaheami. Reisui ii galggašii vuolgit, jos lea buozus. Iežas dearvvasvuhtii sáhttá váikkohit nu, ahte garvá ovdal mátkki sosiála kontávttaid, ovdamearkka dihte restauráŋŋaid, gávpeguovddážiid ja joavkolihkadanbottuid.

Ohcejoga gielda sávvá, ahte olgobáikegottiid olbmot eai finašii luomuset áigge gieldda girjerájus, filbmateáhteris ja sislihkadanbáikkiin (lihkadansálet, álšasálet, vuojadanhálla).

Jos galledat riskajovkui gullevaš lagaš olbmuid, geat orrot dikšobáikkis dahje dorjojuvvon ássanbáikkis, lea dehálaš čuovvut dárkilit bargoveaga rávvagiid. Gallestallanrávvagiid Ohcejoga dearvvasvuođaguovddážii, seaŋgaossodahkii, Dorvui, Seitakartanoi ja ASPA-ruoktu Goahtái gávnnat maid siiddu loahpas.

Jos boađát Ohcejoga gildii olgoriikkain, ávžžuhat čuovvut THL rávvagiid eaktodáhtolaš karantena doallamis.

Ohcejoga gieldda rávvagat luomostalliide:

  1. Dego Lappi buohccedikšunbiire rávve, guorahala vuos vuđolaččat, leago mátki bákkolaš.
  2. Vikka garvit buot diliid, main lea vejolaš gártat koronavirusa njoammunáitaga vuollái, jo ovdal mátkki. Dakkárat leat dilit, main čoahkkanit olu olbmot ja main ii leat vejolaš doallat dorvvolaš gaskka earáide, ovdamearkan restauráŋŋat, gávpeguovddážat ja joavkolihkadanbottut.

Jos iežat guorahallama maŋŋá mearridat dollet dálvelupmui Ohcejohkii, muitte čuovvut dáppe koronadorvvolašvuođa vuođđoáššiid:

  1. Ohcal testii

    Jos dutnje ihtet luomu áigge makkárnu dávdamearkkat (ee. čottabávččas, nuorvu, gosahat, feber, čoavjebákčasat, luhčadávda, smáhkka- dahje hádjaáiccu hedjona), mana lagamus koronatestenbáikái ja biso erremis nu guhká, ahte fidnet teastta bohtosa. Gávnnat rávvagiid Ohcejoga testemis dáppe.

  2. Doala dorvogaskkaid

    Doala dorvvolaš gaskka earáide ovdamearkka dihte gávppiin ja eará almmolaš báikkiin. Garvve stuorra čoahkkanemiid.

  3. Geavat suodjemáskka

    Suodjemáskaávžžuhus lea fámus buot almmolaš sisbáikkiin, main ii leat vejolaš doallat dorvogaskkaid (almmolaš johtolat, gávppit, restauráŋŋat, girjerádju, álbmotdáhpáhusat ja -dilálašvuođat). Riskajoavkkut ja olbmot, geat deaivvadit riskajoavkkuiguin, galggašedje atnit suodjemáskka álo, go dorvogaskka doallan ii leat vejolaš.

  4. Gosa riekta

    Gosa dahje gastte háválaš njunneliidnái dahje iežat soadjái.

  5. Fuolat giehtahygienas

    Basa ja desinfisere gieđaid máŋgii beaivái. Unna giehtadesiboahtal johtá álket mielde lupmas!

  6. Čuovo dili

    Čuovo koronavirusdieđiheami. Ohcejoga gielda juohká dilis dieđuid neahttasiiddustis ja Facebook-konttustis. Oahpásmuva maiddái Lappi buohccedikšunbiirre dillái ja guovllu ávžžuhusaide ja ráddjehusaide.

+ Lassin, luđe iežat telefovdnii Koronavilkku. Jos Koronavilkku-applikašuvdna alarmere vejolaš njoammunáitagis, čuovo dan rávvagiid.

Rávvagat galledemiide Ohcejoga dearvvasvuođaguovddážis, seaŋgaossodagas, Dorvvus, Seitakartanos ja ASPA-ruoktu Goađis:

  • Jos plánet galledeami, vikka garvit jo guokte vahku ovdal dan diliid, main sáhtát gártat koronavirusa njoammunáitaga vuollái. Dakkárat leat dilit, main čoahkkanit olu olbmot ja main ii leat vejolaš doallat dorvvolaš gaskkaid earáide.
  • Boađe dušše dearvvasin. Galledeaddjis dahje olbmuin, geat ásset suinna ovttas, eai oaččo leat makkárge infekšuvnna dávdamearkkat.
  • Pasieanttaid ja kundariid ožžot galledit 1–2 olbmo hávil.
  • Guossit galget fuolahit buorre giehtahygienas, doarvái buorre dorvogaskkain ja geavahit olles galledeami áigge kirurgalaš njálbme-njunnesuoji. 
  • Galledemiin galgá garvit kontávttaid eará pasieanttaiguin ja kundariiguin.
  • Bargoveahka rávve gussiid dárbbu mielde dárkilabbot.

Jos smiehtadat koronaáššiid, sáhtát váldit oktavuođa Tietoa koronaviruksesta -telefonrávvenbálvalussii, tel. 0295 535 535. Jos dárbbašat rávvagiid iežat dearvvasvuohtaáššiin, leage oktavuođas iežat dearvvasvuođaguovddážii.

Váldot ovttas vára koronadorvvolašvuođas!


Muita uutisia