Gielda álggaha ráhkadusnuppástusguovllu doaibmabijuid plánema Deanu vejolaš ráfáidahttima dihte

1.4.2021

Deanu guollebivdosoahpamuša ráđđádallamiin lea váldon ovdan dat vejolašvuohta, ahte Deanu luossa livččii ollásit bivddus ráfáidahtton boahtte geasi. Eat vuos dieđe dan, šaddágo ráfáiduhttin, ja jos šaddá, de aiddo man hámis. Čielggas lea goit, ahte gažaldat lea nu stuorra áššis gieldda ealáhusaide, ahte mii leat mearridan reageret dán vejolašvuhtii dalánaga.

Gielddas lea biddjon johtui Fáhkalaš ráhkadusnuppástusguovllu doaibmabijuid plánen. Odne jo čoahkkanii bargojoavku, mas leat mielde gielddahoavda, ealáhus- ja ovddidanhoavda ja viiddis ovddastus eanagotti dásis. Áibbas vuosttamužžan mii hábmet gova dilis ovttas ee. gieldda fitnodatdoalliiguin, ja jo boahtte vahkus mii čohkket fitnodatdoalliid oktii vai sii sáhttet muitalit dili birra iežaset geahččanguovllus. Mielde leat aŋkke EJB-guovddáš (ELY), Lappi lihttu, Lappi ámmátallaskuvla, Sámi oahpahusguovddáš, Lapin yrittäjät -searvi ja velá earátge. Joavku viiddiduvvo dárbbu mielde, ja mii jođihat proseassa báikkálaš vuolggasajiin. Gielddaráđđehus nammadii váldostivrra, gielddaráđđehusa ja eallinfápmolávdegotti ságajođiheaddjiid searvat joatkkabargui.

Mun dieđihan áššis, go čielggadanbargu ja plána ovdánit.

Dáid dearvvuođaiguin sávan buohkaide buriid beassážiid!

 

Gielddahoavda Vuokko Tieva-Niittyvuopio


Muita uutisia