Ođđa Gávpotfearán-mobiilaspeallu oahpaha gávpot- ja dovdosániid golmma sámegillii
11.8.2021
Ohcejoga gieldda ja Sámedikki oktasaš sámegielaid gáiddusoahpahusa pilohttaprošeakta lea almmustahttán ođđa sámegielat Gávpotfearán-mobiilaspealu. Speallu lea ráhkaduvvon davvisáme-, anáraš- ja nuortalašgillii.
Gávpotfearán lea 6–8-jahkásaččaide oaivvilduvvon giellalávgunspeallu, mas spealli beassá iešguđegelágan fearániid bokte oahppat gávpot- ja dovdosániid iešguđet gávpotbirrasis. Spealli ii dárbbaš máhttit lohkat ja čállit vai sáhttá speallagoahtit.
Mobiilaspealu ulbmilin lea doarjut áitatvuloš sámegielaid geavaheami ja oahppama mánáid astoáiggis. Spealu leat plánen gáiddusoahpahusprošeavtta bargit ja dan oahpaheaddjit. Davvisámegiela oahpaheaddji Satu Pieski lea duđavaš loahppabohtosii.
– Spealu gávpotbirrasat hohkahit mielde, ja spealli oahppá árgabeaisániid, mat iešguđet birrasii laktásit. Mađi eanet spealli oahppá sániid, de dađi guhkkelebbui speallu ovdána, Pieski muitala.
Prošeaktahoavda Hanna Helander sávvá, ahte nu máŋgasat go vejolaš luđejit spealu mánáidasaset, daningo dálá áigge mánát ohppet giela álkimusat spealuid bokte.
– Min mihttomearrin lea leamašan dat, ahte spealli vásiha lihkostuvvama dovdduid ja oahppá giela iešalddes, Helander muitala.
Gávpotfearán-mobiilaspealu sáhttá luđet Google Play -gávppis ja AppStores. Spealu davvisámegielat jietnan lea Juulienna Näkkäläjärvi, anárašgielat fas Satu Aikio ja nuortalašgielat Sisko Hilkka Fofonoff. Spealu lea ráhkadan oululaš LudoCraft Oy.