Deanu, Kárášjoga ja Ohcejoga gielddaid oktasaš cealkámuš riikkarájá rahpama birra

Deanu, Kárášjoga ja Ohcejoga gielddaid oktasaš cealkámuš riikkarájá rahpama birra

Deanu, Kárášjoga ja Ohcejoga gielddat gáibidit ovttas, ahte Suoma ja Norgga ráđđehusat dalánaga rahpet rádjajohtolaga dán guovtti riikka gaskka. Rájá gidden koronavirusa leavvama eastadeami dihte lea čuohcán garrasit rádjagielddaid olbmuid eallimii ja ealáhusaide. Ii leat govttolaš ain doallat rájá gitta, vaikko guovllu koronavirusdilli lea bures hálddus eaige ođđa njoammumat dihtto davvin goappáge bealde rájá.

Deanu, Kárášjoga ja Ohcejoga gielddaid siste lea Deanuleahki ja Deanu čázádat, mii lea kultuvrra ja ekonomiija dáfus oktasaš guovlu. Dan guovllu mihtilmas sárgosat leat rájá rasttildeaddji bearaš- ja sohkaoktavuođat, bargojohtolat ja ealáhusat. Norgga ja Suoma rádjagielddat dárbbašit guđet guimmiideaset.

Rájá rasttildeapmi gullá guovllu ássiid árgabeaivválaš eallimii. Go rádjá lea gitta, de bearrašat, fuolkkit ja ustibat eai leat sáhttán deaivvadit, dahje deaivvadeamit leat sakka ráddjejuvvon. Ássit eai leat sáhttán dábálaš láhkai fitnat gávppašeamen ja astoáiggedoaimmain, geavahit bálvalusaid, eaige johtit iežaset guovllus.

Deanu čázádatguovllu ekonomiija gillá rádjagiddema geažil, go rádjá lea oktan vuođđun ealáhusaide. Guovllus lea oktasašbargu turismma, gávppi, bálvalusaid ja earáge ealáhusaid suorggis. Namalassii guovllu rájáhisvuohta geasuha turisttaid. Bálvalussurggiin kundarat leat stuorra oassái rádjaguovllu ássit ja turisttat.

Davviriikkat ráđđádallet dál rájáid rahpamis ja ráddjehusaid geahpideamis. Norga ja Dánmárku leaba rahpamin rájáska mátkkošteaddjiide 15.6.2020. Mii gáibidat, ahte Norgga ja Suoma rájá rahpan meannuduvvo máttit rájáid ektui ovttaveardásaččat.

8.6.2020

Ilmari Tapiola

ságadoalli
Ohcejoga gielddaráđđehusa

Helga Pedersen

sátnejođiheaddji Deanu gieldda

Svein Atle Somby

sátnejođiheaddji Kárášjoga gieldda

Oktasaš cealkámuš (002) Oktasaš cealkámuš – felles uttalelse Yhteinen kannanotto