Ohcejoga gielda seastá energiija máŋggain ođđa doaibmabijuiguin – geahča energiijaseastinplána váldodoaimmaid
20.12.2022
Ohcejoga gieldda energiijaseastinplánii gullá earret eará gáhttačuovggaid mudden. Govva: Ohcejoga gielda
Energiija hattiid badjáneami ja vejolaš boahtteáigge fitnašuvvanhástalusaid mielde maid Ohcejoga gielddas leat álggahuvvon máŋggat ođđa doaimmat energiija seastima várás. Gielddain lea guovddáš rolla Suoma dálkkádat- ja energiijabeaktilvuođa geatnegasvuođaid ollašuhttimis. Ohcejoga gieldda ruhtadilli lea váttis, man geažil energiija seastindoaibmabijuin biddjojit návccat váldoáššis dakkár vugiide, mat eai eaktut dahkat investeremiid.
Gieldda teknihkalaš doaimma dahkan energiijaseastinplánas deattuhuvvo, ahte gieldda juohkehaš bargi iežas doaibmavugiiguin sáhttá veahkehit ahte šleađga seastašuvvá. Bargiide leatge ráhkadeamen giddodatguovdasaš rávvagiid, mat sisttisdollet earálágan geavatlaš rávvagiid šleađgga seastimii, ovdamearkka dihte laktásettiin biilla liggemii ja maid čuovggaid, dihtoriid ja šearpmaid geavaheapmái.
Okta stuorra energiijageavaheami čuozáhagain Ohcejoga gielddas lea vuojadanhálla sávnniid liggen. Jagi 2023 álggu rájes vuojadanhálla sávnnit liggejuvvojit dušše oktii beaivvis. Dan lassin vuojadanhálla ja čázi lieggasa leat vuolidan ovttain gráđain. Vuojadanhálla lea rabas boahtte jagi álggu rájes vuossárggaid dmu 16–20, gaskavahkuid dmu 13–17 ja bearjadagaid dmu 15–19. Lávvardatrabasáigi báhcá eret.
Energiijaseastinplánas darvánit maid gáhttačuovggaid muddemii ja giddodatfuolahusa doaimmaide. Seitageainnu, Siula ja Stuorraluobbala gáhttačuovggat leat muddejuvvon nu, ahte dat jáddet dmu 23.00–06.30 gaskkas. Gieldda giddodagaid liekkas ja áibmomolsun muddejuvvojit daid geavahanáiggi mielde. Seamma láhkai giddodagain, gos ii leat šat jeavddalaš doaibma, lieggasa vuolidit vuollerádjái. Oljoliggenrusttegiid jeavddalaš ortnegisdoallamiin ja muddemiin fitnašuvvá rehkenastima vuođul 10 proseantta seastu oljju geavahusas.
Guorusin báhcán skuvlagiddodagaide laktásettiin gielddaráđđehusa nammadan bargojoavku lea ráhkadeamen doaibmabidjoplána. Plána gárvvásmuvvá 2023 guovvamáno loahpa rádjai.
Ovddabealde máinnašuvvon seastindoaimmaiguin lea árvaluvvon fitnašuvvat jagis seastu buohkanassii sullii 100 000 euro. Sestui lea stuorra dárbu energiija hatti badjánettiin Ohcejoga gielddas.
– Oktasaš eaktodáhtolaš seastindoaimmaid mearkkašupmi lea dehalaš eandalii jagi 2023 álggu rájes, go gieldda mearreáigásaš, ovddolaš ja fásta hatti šleađgasoahpamuš nohká ja sirdásat spot-haddevuđot šleađgga doaimmahansoahpamuššii, muitala gieldda giddodatinšenevra Mirja Savolainen.
Ohcejoga teknihkalaš lávdegoddi dohkkehii gieldda energiijaseastindoaimmaid čoahkkimisttis 21.11.2022.
Lassedieđut:
Mirja Savolainen
Giddodatinšenevra
040 592 7925
mirja.savolainen@utsjoki.fi
Tanja Lepistö
Vd. Doaibmasuorgehoavda
040 0151 294
tanja.lepisto@utsjoki.fi