Ohcejoga gieldda jođihan sámegielaid gáiddusoahpahusprojeakta lea finalistan Cygnaeus-bálkkašupmái
Cygnaeus-bálkkašupmi addojuvvo priváhta olbmui, projektii dahje servošii, mii lea ovddidan dásseárvosaš ja ovttaveardásaš oahppanvejolašvuođaid Suomas.
Oahpahusráđđehus lea nammadan sámegielaid gáiddusoahpahusa pilohttaprojeavtta Cygnaeus-bálkkašumi 2020 oktan finalistan.
Sámegielaid gáiddusoahpahusa pilohttaprojeavtta (2018–2021) jođiha Ohcejoga gielda ja koordinere Sámediggi.
Projeakta lea ordnen čavčča 2018 rájes anáraš-, nuortalaš- ja davvisámegiela oahpahusa sámiid ruovttuguovllu olggobealde. Dán lohkanjagi projeakta ordne oahpahusa 92 oahppái oktiibuot 65 skuvllas miehtá Suoma. Ovttasbarggus leat mielde 35 oahpahusa ordnejeaddji.
Projeaktahoavda Hanna Helander Ohcejoga gielddas illuda evttohasvuođas.
– Projeavttas lea buorre leaktu, oahppiidmearri lea šaddan masá guovttegeardásažžan jagi 2018 rájes. Jo dušše beare evttohasvuohta lea mearkkašahtti ášši midjiide, geat projeavttas bargat.
– Dát motivere sihkkarit maiddái min jo ovddežis aktiivvalaš oahpaheaddjiid, geain lea beroštupmi ovddidit oahpahusa, Helander smiehtada.
Projeavtta oahpaheaddjin barget dán lohkanjagi Henna Aikio, Satu-Marjut Nieminen, Joni Saijets, Sirkka Sanila ja Sonja Moshnikoff. Davvisámegielas leat 44, anárašgielas 28 ja nuortalašgielas 20 oahppi.
– Projeakta ordne oahpahusa joavkkuin, mat doibmet bures sihke pedagogalaččat ja oahppiid gielladási ja agi beales. Mis leat buorre vásáhusat das, muitala projeaktahoavda Hanna Helander.
Projeavtta koordineremis vástida Arla Magga Sámedikkis. Son atná dehálažžan dán evttohasvuođa, mii lokte projeavtta barggu oidnosii.
– Oahpahusa ordnejeaddjit Mátta-Suomas imaštallet oalle dávjá, ahte guoskágo sámegiela oahpahus duođai maiddái sin. Duohtavuohta goittotge lea, ahte sámemánáin ja -nuorain jo 2/3 orru ja vázzá skuvlla sámiid ruovttuguovllu olggobealde, Magga fuomášuhttá.
Sámedikki skuvlenčálli Ulla Aikio-Puoskari muitala, ahte gáiddusoahpahusprojeakta lea vuosttas lávki dan guvlui, ahte sámegielaid oahpahus šaddá bissovažžan sámiid ruovttuguovllu gielddaid olggobealde.
– Oahpahus- ja kulturministeriija lea vuođđudan sámegielaid ja sámegielat oahpahusa ovddidanbargojoavkku, mii lea aiddo dál bargamin dáinna áššiin. Bargojoavku almmustahttá iežas evttohusa boahtte jagi álggus, Aikio-Puoskari muitala.
Lasi sámegielaid gáiddusoahpahusa pilohttaprojeavttas sáhtát lohkat dáppe.
Cygnaeus-bálkkašupmi addojuvvo priváhta olbmui, projektii dahje servošii, mii lea ovddidan dásseárvosaš ja ovttaveardásaš oahppanvejolašvuođaid Suomas. Bálkkašupmi 2020 juhkkojuvvo 23.11.2020.
Hanna Helander, projeaktahoavda
tel. 040 7012 094
Arla Magga, projeaktakoordináhtor
tel. 040 1985 033