Ohcejoga gieldda Luossaguovddážii 150 000 euro stáhta ruhtadeapmi

Govva: Ohcejoga gielda

Ohcejoga gielda fidne riikkabeivviid stáhtaruhtaváljagotti jagi 2023 juohkinmunis 150 000 euro ođđa Luossaguovddáža čielggadanbargui. Stáhtaruhtaváljagotti smiehttamuš jagi 2023 bušeahttaárvalusas almmustahttojuvvui maŋŋebárgga. Smiehttamuš doallá sisttis maiddái riikkabeivviid nu gohčoduvvon juovlaskeaŋkaruđaid nappo bušeahttalasáhusaid.

Ohcejoga gielda hálida vuođđudit Luossaguovddáža, mii doarjjošii guovllu eallinfámu ja johkasápmelaš kultuvrra seailuma. Ohcejohka gárttai nu gohčoduvvon fáhkka ráhkadusnuppástusa (su. Äkillinen rakennemuutos) dillái giđđat 2021 Deanu luossabivdogildosa dihte. Gielddus orru joatkašuvvamin jo goalmmát gease, iige luossanáliid boahtteáiggi sáhte einnostit.

Luossaturisma leamašan Ohcejoga mátkkoštanealáhusa geađgejuolgi ja dehálaš sisaboahtu báikkálaččaide. Guolástangielddus dagaha guovllu ekonomiijai árvvu miel viđa miljon euro dáhpaga jagis. Dasa lassin gielddus áitá máŋggačuohtejahkásaš, rikkes sápmelaš luossabivdoárbevieru ja dasa laktáseaddji kultuvrralaš ja gielalaš máhtu seailuma.

Luossaguovddáš doaimmašii Deanu luossabivddu ja árbedieđu áššedovdi- ja ovttasbargoorganisašuvdnan sihke riikka dásis ja riikkaidgaskasaččat. Guovddáža oktavuhtii lea ulbmil ohcat maiddái ovttasbargoguimmiid dutkan- ja innovašuvdnasuorggis.

– Ruhtadeami fidnen Luossaguovddáža válmmaštallanbargui lea hui miela miel juovlaskeaŋka Ohcejoga gildii. Deanu ja luosa mearkkašupmi gieldalaččaide lea stuoris ja mii leat hui ilolaččat, ahte maiddái riikkabeivviin leat fuomášan min dili. Mii válmmaštallagoahtit buriin mielain maiddái riikka dásis beroštahtti prošeavtta, muitala gielddahoavda Taina Pieski.

Lassedieđut:

Gielddahoavda Taina Pieski
Ohcejoga gielda
+358 50 535 1574
taina.pieski@utsjoki.fi