Váldostivra čoahkkana vuossárgga 6.3. – čuovo čoahkkima njuolggosáttan dmu 13 rájes!
1.3.2023
Ohcejoga váldostivra. Govva: Studio Borga
Ohcejoga váldostivra čoahkkana vuossárgga 6.3.
Váldostivra mearrida ođđa buresveadjinhoavdda virggi vuođđudeamis. Gielddaráđđehus lea evttohan váldostivrii dálá čuvgehushoavda-rektora virgenamahusa ja gelbbolašvuođaeavttuid rievdadeami. Čuvgehushoavdda virggis báhcet eret golbma rektordoaimma, man dihte gielddas leat geahčadan hovdii gullevaš ovddasvástádusa eará bargguid. Virgenamahusa evttohit rievdadit buresveadjinhoavdan, guhte vástidivčče gieldda čuvgehusdoaimma lassin maiddái buresveadjima ja dearvvasvuođa ovddideami jođiheamis. Buresveadjinhoavda vástidivčče maid bargoveaga ja bargoburesveadjima ovddideamis.
Váldostivra gieđahallá maiddái earret eará lassemearreruđa addima ođđa Ohcejoga Master Plan -projektii. Projeavttas lea dárkkuhus dahkat Ohcejoga turismii guhkesáigásaš ovddidanplána. Projeakta bisttášii 1.6.2023–31.5.2024.
čuovo čoahkkima njuolggosáttan
Váldostivrra čoahkkimat leat buohkaide rabas. Čoahkkima leage vejolaš čuovvut njuolggosáttan Ohcejoga gieldda Youtube-kanálas vuossárgga 6.3. sullii dmu 13 rájes. Čoahkkinbáddi lea oaidnimis kanálas maiddái njuolggosáddaga maŋŋá. Gielddadálus čoahkkima sáhttá čuovvut feaskkirlanja šearpmas.
Čoahkkimis lea simultánatulkon sámegielas suomagillii. Maiddái tulkojuvvon báddi almmustahtto Youtube-kanálas editerema maŋŋá.
OAHPÁSMUVA EVTTOHUSLISTUI
Sáhtát oahpásmuvvat čoahkkima olles evttohuslistui dákko. Čoahkkinbeavdegirji almmustahtto dárkkisteami maŋŋá neahttasiiddusteamet.