Gielddaválggat jagis 2021 Ohcejoga gielddas

Gielddaválggat jagis 2021 Ohcejoga gielddas 1

 

Gielddaválggat doaimmahuvvojit sotnabeaivve 13.6.2021.

Ohcejogas gielddaválggain válljejuvvojit 15 áirasa váldostivrii. Gielddaválggaide guoski válgaáššeolbmuid doaimmahan válgaáššegirjjit váldojuvvojit vuostá Ohcejoga gielddadoaimmahagas 4.5.2021 dmu 12.00–16.00. Válgaáššegirjjiid váldiba vuostá guovddášválgalávdegotti ságadoalli ja čálli.

Digi- ja álbmotdiehtovirgedoaimmahat ráhkada almmuhankoartta juohkeovttas, gii lea váldon jietnavuoigatvuođaregistarii, ja sádde dan maŋimuštá 20.5.2021 buohkaide daidda jietnavuoigadahtton olbmuide, geaid čujuhus lea dieđus. Jietnavuoigatvuođaregistara dieđut leat oaidnin láhkai ja nuvttá oažžumis Digi- ja álbmotdiehtovirgedoaimmahaga mearridan báikkiin 3.5.2021 rájes. Olmmoš, guhte lea iežas mielas guđđon vuoiggaheamet eret jietnavuoigatvuođaregistaris dahje sutnje guoskevaš merken lea boastut, sáhttá dahkat njulgengáibádusa Digi- ja álbmotdiehtovirgedoaimmahahkii maŋimuštá 26.5.2021. Jietnavuoigatvuođaregisttar oažžu lága fámu 1.6.2021.

Jietnavuoigadahtton olmmoš sáhttá jienastit ovddalgihtii man beare almmolaš ovdajienastanbáikkis ruovtturiikkas dahje olgoriikkain. Ovdajienasteapmi ruovtturiikkas lágiduvvo 26.5.–8.6.2021 ja olgoriikkain 2.–5.6.2021. Válgabeaivve jietnavuoigadahtton olmmoš oažžu jienastit dušše dan jienastanbáikkis, mii lea merkejuvvon jietnavuoigatvuođaregistarii ja jienasteaddjái boahtán almmuhankortii.

Jienasteaddji lea geatnegas ovdanbuktit válgadoaibmaolbmui čilgehusa identitehtastis. Dan gávnnaheami várás jienasteaddji berre ovdanbuktit fámus orru persovdnakoartta, pássa, vuodjenkoartta dahje Kela-koartta oktan govain. Dárbbu mielde boleslágádusas oažžu nuvttá gaskaboddosaš persovdnakoartta jienasteami várás.

Gielddaválggaid ovdajienasteapmi Ohcejoga gielddas dáhpáhuvvá ná:

Kirkosiiddas, gielddadálus, váldostivrasáles

  • gaskavahku 26.5.2021 dmu 15.00–19.00
  • duorastaga 27.5.2021 dmu 15.00–19.00
  • maŋŋebárgga 1.6.2021 dmu 15.00–19.00
  • gaskavahko 2.6.2021 dmu 15.00–19.00
  • duorastaga 3.6.2021 dmu 15.00–19.00
  • maŋŋebárgga 8.6.2021 dmu 15.00–19.00

Gáregasnjárgga máŋggadoaimmadálus, máŋggadoaimmalanjas

  • bearjadaga 28.5.2021 dmu 15.00–19.00
  • lávvardaga 29.5.2021 dmu 12.00–15.00
  • bearjadaga 4.6.2021 dmu 15.00–19.00
  • lávvardaga 5.6.2021 dmu 12.00–15.00

Njuorggáma skuvllas, lihkadansáles

  • vuossárgga 31.5.2021 dmu 15.00–19.00
  • vuossárgga 7.6.2021 dmu 15.00–19.00

Lágádusjienasteapmi

Lágádusjienasteapmi čađahuvvo 2.6.2021 dmu 9.00–10.30.

Ruoktojienasteapmi

Ovdajienasteapmái, mii dáhpáhuvvá ruovttus, sáhttá iežas almmuhit olmmoš, gean lihkadan- dahje doaibmannávccat leat hedjonan dan muddui, ahte son ii beasa jienastan- dahje ovdajienastanbáikái almmá govttohis váttisvuođaid haga.

Oapmahašdikšu, guhte orru seamma dállodoalus ruoktojienasteapmái vuoigadahtton olbmuin, sáhttá jienastit ruoktojienasteami oktavuođas. Ruoktojienasteapmi čađahuvvo soahpamuša mielde áigodagas 26.5.–8.6.2021. Ruoktojienasteamis galgá dahkat almmuhusa čálalaččat dahje telefovnna bokte gieldda guovddášválgalávdegoddái maŋimuštá 1.6.2021 ovdal dmu 16.00 čujuhusain:

Utsjoen kunta, keskusvaalilautakunta
PL 41
99981 Utsjoki

dahje telefovnna bokte 040 624 7878 / Birit Vuolab dahje 040 181 0267 / Minna Lukkari.

Reivejienasteapmi

Válggaid áigge olgoriikkain ássi dahje orru jietnavuoigadahtton olbmot sáhttet jienastit reivve bokte olgoriikkain.

Jienastanbáikkit sotnabeaivve 13.6.2021 leat jienastanguovlluid mielde dát:

 

Jienastanguovlu:                  Jienastanbáiki:

002 Vuovdaguoika              Gáregasnjárgga máŋggadoaimmadállu
003 Kirkosiida                     Ohcejoga gielddadállu
004 Njuorggán                    Njuorggáma skuvla

 

Válgadoaimmahus álgá válgabeaivve dmu 9.00 ja joatkašuvvá boatkkaid haga dmu 20.00 rádjai.

 

Ohcejogas 31.3.2021

OHCEJOGA GIELDDA GUOVDDÁŠVÁLGALÁVDEGODDI
Ara Aikio, ságadoalli   


Muita uutisia