Ohcejoga váldostivrra ođđa ságadoallin Arto Pohjanrinne, gielddaráđđehusa njunnošis joatká Väinö Guttorm – váldostivra dohkkehii maid ođđa gieldastrategiija
21.6.2023
Ságadoalleguovttos: Ohcejoga gielddaráđđehusa ságadoallin joatká Väinö Guttorm (gur.) ja váldostivrra jođihišgoahtá Arto Pohjanrinne. Govva: Ohcejoga gielda
Ohcejoga váldostivra válljii čoahkkimisttis 21.6. iežas ságadoallin čuovvovaš guovtti jagi áigodahkii 2023–2025 Arto Pohjanrinne, kok. Vuosttas várreságadoallin válljejuvvui Uula Tapiola, kesk. ja nubbi várreságadoallin Mika Aikio, sd.
Gielddaráđđehusa ságadoallin joatká Väinö Guttorm, kd. (várrelahttu Pirjo Konttinen, kd.) ja várreságadoallin Vesa Länsman, rkp. (várrelahttu Urho Guttorm, kesk.). Gielddaráđđehusa eará lahtut leat Marjatta Kordelin, kok. (várrelahttu Eemeli Hekkanen, kok.), Niku Rasmus, kok. (várrelahttu Veikko Porsanger, kok.), Laura Niittyvuopio-Valle, kesk. (várrelahttu Eeva Jaatinen, kesk.), Riikka Rasmussen, sd. (várrelahttu Aslak Holmberg, sd.) ja Ilmari Tapiola, kesk. (várrelahttu Anni Ahlakorpi, vas.).
Maŋimuš čoahkkimisttis ovdal geassebottu váldostivra maiddái dohkkehii earret eará jagi 2022 ruhtadoalloloahpaheami ja ođđa gieldastrategiija 2035.
Lassin čoahkkin mieđihii earu gielddahoavda Taina Pieskii ja mearridii almmuhit virggi ohcanláhkai. Pieski lea eretcealkán iežas virggistis 1.8.2023 rájes ja báhcán virgefriijavuhtii 18.5.2023. Vs. gielddahoavdan doaibmá dán dilis eallinfápmohoavda Tanja Lepistö.
ČOAHKKINBEAVDEGIRJI LOHKANLÁHKAI
Váldostivrra čoahkkima olles beavdegirjji sáhttá lohkat dárkkisteami maŋŋá min neahttasiiddus.
ČOAHKKIN GEAHČČANLÁHKAI
Váldostivrra čoahkkimat streamejuvvojit ja daid sáhttá geahččat sihke njuolggosáttan ja maŋŋelgihtii báddin Ohcejoga gieldda Youtube-kanálas. Sihke álgoálgosaš ja tulkojuvvon čoahkkinbáttit almmustahttojit kanálas editerema maŋŋá.