Suopma čavge riikiiboahtima ja heaittiha rádjeservošiid sierravuoigatvuođaid – geahča oktiigeasu ráddjehusain, mat gusket Norggas Supmii boahtima
Suopma čavge riikiiboahtima ráddjehusaid gaskavahku 27. ođđajagimánu rájes. Ráđđehus mearridii áššis 22. ođđajagimánu.
Supmii mátkkošteami ráddjejit 30 beaivvi áigge, 25. guovvamánu rádjai. Ráddjehusaiguin vigget eastadit koronaepidemiija ja ođđa virushámiid leavvamis Suomas.
Vuolábeallái leat čohkkejuvvon muhtun nuppástusat erenoamážit Ohcejoga gieldda rádjejohtolaga geahččanguovllus. Buot Suoma riikiiboahtima ráddjehusat ja iešguđetlágan diliid doaibmanrávvagat gávdnojit Suoma rádjegozáhuslágádusa neahttasiiddus.
Davvi-Suoma rádjeservošiid riikiiboahtinvuoigatvuohta Supmii nohká. Dasa lassin ráji rasttildeaddjiide addojuvvo vuot karantenaávžžuhus. Suoma riikkavuložis lea ain vuoigatvuohta boahtit Supmii ja vuolgit Suomas. Ráji goit ávžžuhit rasttildit dušše vealtameahttun dilis.
- servodaga doaibmama dahje fuolahansihkkarvuođa oainnus mearkkašahtti bargu, man ollašuvvan eaktuda nuppi riikkas boahtti olbmo dahje olbmuid barggu ja mainna ii sáhte ájáhallat
- dearvvasvuođafuolahusa ja gádjundoaimma bargoveahka (maiddái vuosttasdikšu), boarrásiiddivššu ámmátolbmot iežaset bargguin ja sisrájiin eiseválddit vealtameahttun virgebargguin
- studeren Suomas
- bearašsivat
- Norggas oažžu boahtit Supmii deaivat fulkkiid. Fuolki sáhttá leat guoibmi, mánná, vánhen, mánáidmánná, vuohppa, vuoni, áddjá ja áhkku. Norggas oažžu boahtit Supmii maiddái eará bearašsivaid, omd. hávdádeami, heajaid dahje buohcandáhpáhusa geažil.
- eará vealtameahttun ja ákkastallojuvvon sivva
- Norggas oažžu boahtit Supmii maiddái eará vealtameahttun ja ákkastallojuvvon persovnnalaš siva geažil. Dákkár sivat árvvoštallojuvvojit álo sierra rádjedárkkistemiid oktavuođas.
- Ovdamearkka dihte sápmelaččaid ealáhus- ja kulturbargu gehččojuvvo vealtameahttun sivvan boahtit Supmii. Sápmelaččat ožžot rasttildit Suoma ja Norgga gaskasaš eananráji ja rádjejogaid maiddái eará sajis go rádjerasttildanbáikkiin.
Maiddái erenoamášjoavkkut, dego kultuvrra, falástallama dahje ealáhuseallima ovddasteaddjit, ožžot dihto dáhpáhusain rasttildit ráji.
Suoma ráđđehusa ulbmilin lea fidnet koronatestenvuogádaga buot rádjerasttildanbáikkiide nu, ahte buot mátkkošteaddjiid rávvejit ráji alde mannat testii. Ohcejoga gielda teste Supmii boahttiid sihke Ohcejogas ja Gáregasnjárggas, sáhtát lohkat ášši birra eanet dáppe. Testemiin muitaluvvo maiddái báberdieđáhusaiguin rádjerasttildanbáikkiin.
Suoma iežas ráddjehusaid lassin juohkehaš, guhte mátkkošta Suomas nuppi riikii, galgá dárkkistit, makkár riikiiboahtinráddjehusat ja -eavttut nuppi riikkas leat. Ovdamearkka dihte Norgga áigeguovdilis ráddjehusat gávdnojit eaŋgalas- ja dárogillii dáppe.