AVI gieldá badjel 20 heakka almmolaš čoahkkanemiid Lappis – Ohcejoga gielda ávžžuha lassin gáiddusbarggu, badjel 16-jahkásaččaid asttuáiggedoaimmaid gaskkalduhttima ja máskkaid badjeskuvllaide ja logahahkii

Lappi buohccedikšunbiire lea sirdásan koronavirusepidemiija jođálmuvvanmuddui. Koronavirusnjoammumat leat lassánan čielgasit, ja guovllus leat leamašan njoammumat, maid vuolggasadji ii leat dieđus. Davvi-Suomas leat gávdnon maiddái koronavirusvariánttat. Sáhtát lohkat dili birra eanet Lappi buohccedikšunbiirre neahttasiiddus.

Epidemiija vearráneami dihte Lappi guovlohálddahusdoaimmahat AVI gieldá vuossárgga 22.2. rájes Lappi buohccedikšunbiirre gielddain buot badjel 20 heakka almmolaš dilálašvuođaid ja čoahkkimiid, mat dollojuvvojit jogo siste dahje olgun. Gielddus guoská maiddái Ohcejoga ja lea fámus 21.3. rádjai. Sáhtát lohkat guovlohálddahusdoaimmahaga dieđáhusa áššis dákko.

Ohcejoga gielda addá čavgadot ávžžuhusaid eastadandihte ođđa njoammumiid

Ohcejoga gieldda koronadilli lea ain ráfálaš. Ohcejogas gávdnui koronavirusnjoammun maŋimuš 20.12.2020.

Gielda lea goittotge mearridan čuovvut Lappi guovllu koordinerenbargojoavkku ávžžuhusaid, maiguin lea ulbmil eastadit ođđa njoammumiid. Ávžžuhusat leat fámus 22.2. rájes.

• Ohcejoga gielda ávžžuha sihke badjeskuvllaid ja logahaga oahppiid ja bargoveaga atnit suodjemáskkaid. Čuvgehusdoaibma ja skuvllat leat dán ášši birra dárkilabbot oktavuođas oahppiide ja vánhemiidda.
• Ohcejoga gielda ávžžuha gáiddusbarggu buot bargosajiide, main dat lea vejolaš.
• Ohcejoga gielda ávžžuha, ahte maiddái falástallanhárjehusain ja priváhta dilálašvuođain čuvvot badjel 20 heakka čoahkkananráddjehusa.
• Ohcejoga gielda ávžžuha, ahte badjel 16-jahkásaččaid asttuáiggedoaimmat gaskkalduhttojit 14.3. rádjai.

Gieldda asttuáiggedoaimmat gaskkalduvvet dalán, lihkadan- ja álšasálet bissot rabas

Ohcejoga gieldda rávesolbmuidskuvlla badjel 16-jahkásaččaid lagašoahpahus ja fysioterapevtta vuojadanhálla- ja álšasálejoavkkut gaskkalduhttojit áigái 22.2.–14.3. Mánáid asttuáiggedoaimmat joatkašuvvet dábálaččat.

Ohcejoga gieldda lihkadanhállat, álšasálet ja vuojadanhálla bissot rabas, muhto gielda bivdá daid geavaheaddjiid čuovvut erenomáš dárkket lihkadanbáikkiid koronadorvvolašvuođa rávvagiid.

Lassin gielda ávžžuha lihkadansáliid geavaheaddjiid mearkut vuoruid oassálastiid namaid bajás ja álšasáliid geavaheaddjiid mearkut sáliid gihppagiidda namaset, beaivemeari ja diibmoáiggiid, goas sii leamašan álšasáles. Listtut álkidahttet čielggadit vejolaš koronavirusinfekšuvnnaid njoammunbálgáid.

Sanni Rannikko

njoammudávddaid vástideaddji doavttir

Tel. 040 181 0284

Vuokko Tieva-Niittyvuopio

gielddahoavda

Tel. 0400 933 754

Jos eahpidat alddát dahje lagašbirrasisttát koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8–16 tel 040 181 0285, vahkuloahpaid, eahkediid ja árgabasiid tel 040 181 0281).

Koronavirusa dábálaš dávdamearkkat leat earret eará feber, gosahat, oaivebávččas, illáveadjin, luhčadávda, deahkkebákčasat, čottabávččas, nuorvu, vuoigŋanváttisvuođat ja hádja- ja smáhkkaáiccu hedjoneapmi. Mánáin dávdamearkkat sáhttet leat láivvit ja bistit oanehis áiggi. Koronavirusdávdda mearkkaid ii sáhte earuhit eará virusdávddaid mearkkain earágo koronavirusteasttain.

Lasi dieđuid koronavirusdilis gávnnat earret eará Ohcejoga gieldda, Lappi buohccedikšunbire ja THL neahttasiiddus.