Badjeskuvllaid ja logahaga oahppiid máskaávžžuhus nohká, miessemánus sáhttá lágidit vuollái 50 heakka dilálašvuođaid – geahča Ohcejoga gieldda beaiváduvvon ávžžuhusaid ja ráddjehusaid
Beaiváduvvon 6.5.2021
Lappi buohccedikšunbiirre koronadilli lea bisson ráfálažžan. Dan dihte buohccedikšunbiirre koronakoordinerenjoavku ja Lappi guovlohálddahusdoaimmahat leat beaivádan iežaset ávžžuhusaid ja mearrádusaid guovllu gielddaide.
Lappi buohccedikšunbiirres lea fámus 50 heakka čoahkkananráddjehus 4.5.–31.5. Lappi guovlohálddahusdoaimmahat gieldá dán áigodagas Lappi buohccedikšunbiirre gielddain badjel 50 heakka almmolaš dilálašvuođaid ja čoahkkimiid lágideami sihke siste ja olgun. Siste ja ráddjejuvvon guovlluin olgun lea goittotge lohpi lágidit badjel 50 heakka almmolaš dilálašvuođa dahje čoahkkima erenoamášdoaimmaiguin. Lappi buohccedikšunbiirre koronakoordinerenjoavku lea mearridan, ahte buohccedikšunbiirre gielddain sáhttá lágidit maiddái vuollái 50 heakka priváhta dilálašvuođaid 3.5. rájes.
Badjeskuvllaid ja logahaga oahppiid máskaávžžuhus nohká. Ohcejoga gielda ávžžuha goit árrabajásgeassima ja skuvllaid bargiid geavahit ain ámadadjomáskka, jos ii leat vejolaš doallat dorvogaskkaid.
Ohcejoga gieldda áigeguovdilis ávžžuhusaid ja ráddjehusaid oainnát álo dán beaiváduvvi artihkkalis.