Gielddaráđđehus čoahkkana 28.11. – gieđahallamis earret eará boahtte jagi bušeahtta ja hálddahusnjuolggadusa beaivádeapmi
23.11.2022
Ohcejoga gielddaráđđehus čoahkkana vuossárgga 28.11. gieđahallat earret eará gieldda jagi 2023 bušeahttaárvalusa ja jagiid 2024–2025 ekonomiijaplánaid. Dasa lassin gielddaráđđehus mearrida gieldda hálddahusnjuolggadusa nuppástusaid dohkkeheamis ja addimis váldostivrii mearridanláhkai.
Hálddahusnjuolggadusa ferte beaivádit, go gieldda organisašuvdna rievdá
Hálddahusnjuolggadus meroštallá gieldda hálddahusa ja doaimma ordnema ja mearrádusdahkan- ja
čoahkkinmeannudanvugiid, jos lágas ii leat nuppeláhkai mearriduvvon. Ohcejoga ovddit hálddahusnjuolggadus lea
dohkkehuvvon váldostivrras 19.6.2017. Hálddahusnjuolggadusa galgá dál ođasmahttit, go gieldda
organisašuvdna rievdá sode-bálvalusaid ordnenovddasvástádusa sirdásettiin buresveadjinguvlui. Seammás hálddahusnjuolggadussii beaiváduvvojit eará dárbbašlaš ođastusat.
Guovddáš nuppástusat hálddahusnjuolggadussii leat vuođđodorvolávdegotti ja čuvgehusdoaimma sáme- ja suomagielat juhkosiid heaittiheapmi ja teknihkalaš- ja eallinfápmolávdegottiid ovttastahttin. Teknihkalaš ja eallinfámu doaibmasurggiid oktasaš strategalaš mihttomearit ja njuovžilis oktasašbargu leat gieldda menestuvvama dáfus kritihkalaš áššit earret eará Ohcejoga fáhkka ráhkadusnuppástusa, sode-ođastusa, eanapolitihka ja lávva-, viesso- ja giddodatáššiid geahččanguovllus. Ođastus geahppudivččii maid hálddahusa ja beavttálmahtášii resurssaid geavaheami. Doaibmasurggiid ekonomalaš ovddasvástádusat ja virge- ja doaibmaolbmuid barggut eai rievddašii.
Ulbmil lea, ahte ođđa hálddahusnjuolggadus boahtá fápmui 1.1.2023.
Oahpásmuva evttohuslistui
Gielddaráđđehusas leat vuossárgga beavddi alde maiddái earret eará lahtuid nammadeapmi iešguđetlágan bargojoavkkuide ja ráhkkaneapmi gieldastrategiija beaivádanbargui ja boahtte jagi riikkabeaiválggaide.
Sáhtát oahpásmuvvat čoahkkima olles evttohuslistui dákko. Čoahkkinbeavdegirji almmustahtto dárkkisteami maŋŋá gieldda neahttasiiddus.