Gielddaráđđehus: Ohcejoga gielda ii hálit stuorrabeaktofápmofierpmádagaid, ruvkkiid ja bieggafápmorusttegiid guvlosis

Ohcejoga gielddaráđđehus čoahkkanii vuossárgga 17.10. gieđahallat earret eará cealkámuša Davvi-Lappi eanagoddelávvahápmosis 2040. Lassin gielddaráđđehus dagai váldostivrii evttohusa gieldda biebmobálvalusaid lágideamis 1.1.2023 rájes, go Lappi buresveadjinguovlu álggaha doaimmas.

cealkámuš Davvi-Lappi eanagoddelávvahápmosis 2040

Gielddaráđđehus dohkkehii čoahkkimisttis cealkámuša Davvi-Lappi eanagoddelávvahápmosis 2040. Lappi lihttu lea bivdán gielddaid cealkámušaid ođđa Davvi-Lappi eanagoddelávas, man leat válmmaštallamin ja mii guoská Anára, Soađegili ja Ohcejoga gielddaid.

Ohcejoga gielda buktá cealkámušastis ovdan, ahte dat ii guottit stuorrabeaktofápmofierpmádagaid, ruvkedoaimma ja bieggafápmopárkkaid guvlosis, daningo dain leat vahátlaš váikkuhusat lundui, boazodollui ja mátkkoštanealáhussii.

Ohcejoga gielda doarju eanagoddelávvahápmosis evttohuvvon joavkojohtolaga ovddidandoaimmaid ja geahppa johtolaga jođáhagaid huksema. Mátkkošteami ovddideamis Ohcejoga gielda deattuha lagašluonddu geinnodagaid lasiheami, guovlogeainnu 970 ovddideami sihkkelastingeinnodahkan ja prográmmabálvalusaide vuođđuduvvi turismma lasiheami.

Ohcejoga gielda buktá cealkámušastis ovdan maiddái dárbbu ráhkkanit girdinjohtolaga elektrifiserenovdánupmái. Gielda hálida oassálastit čielggadusaide, main kártejuvvo gieldda guovllus potentiála sajádat smávva áibmojohtolatgieddái, mii dagašii vejolažžan elektrihkalaš girdima.

Ohcejoga gieldda cealkámuša Davvi-Lappi eanagoddelávvahápmosis 2040 sáhttá lohkat dákko.

Áirasat Arto Pohjanrinne, Väinö Guttorm ja Marjatta Kordelin guđđe cealkámušas sierra oaivila.

Davvi-Lappi eanagoddeláva 2040 stivrenjoavku

Lappi lihttu lea bivdán gielddaid nammadit luohttámuš- ja virgeolbmuid lahttun Davvi-Lappi eanagoddeláva 2040 stivrenjovkui.

Ohcejoga gielddaráđđehus nammadii čoahkkimisttis eanagoddeláva stivrenjovkui lahttun Taina Pieski (várrelahttu Tanja Lepistö), Niila Laiti (várrelahttu Anni Ahlakorpi), Veikko Porsanger (várrelahttu Marjatta Kordelin) ja Laura Niittyvuopio-Valle (várrelahttu Urho Guttorm).

searvan POHJOIS-LAPIN RUOKA OY -fitnodaTSEARVÁI

Lassin gielddaráđđehus mearridii evttohit váldostivrii, ahte Ohcejoga gielda searvá Soađegili gieldda vuođđudan Pohjois-Lapin Ruoka Oy -fitnodatsearvái sode- ja čuvgehusdoaimma biebmobálvalusaid lágideamis.

Lappi buresveadjinguovlu álggaha doaimmas 1.1.2023. Háhkanláhka ii atte vejolašvuođa dasa, ahte ovdamearkka dihte
gieldda guovddášgievkkan buvttadivččii biebmofuolahusa bálvalusaid sihke gieldda ja buresveadjinguovllu bálvalusovttadagaide, muhto doaimma ferte baicce rievdadit fitnodatsearvin.

ČOAHKKINBEAVDEGIRJI NEAHTAS

Gielddaráđđehusa čoahkkima olles beavdegirjji sáhttá lohkat dákko.