Lappi eanangottehoavdda galledeamis Ohcejogas šattai sáhka koronaepidemiijas, ruoná doaimmain ja ođđa, hutkás projeavttain

Joavkogovas Ohcejoga gielddadálu ovddas Lappi lihtu ja Ohcejoga gieldda ovddasteaddjit.

21.9.2020

Lappi eanangottehoavda Mika Riipi gieldagalledemiid 2020 ráidu joavddai vuossárgga Ohcejohkii.

Lappi lihtu ja Ohcejoga gieldda gaskasaš deaivvadeamis ságastahtte erenoamážit koronaepidemiija váikkuhusat unna gielddaide, viggamušat ruonát ja čitnaneutrálot Lappi eanangotti ovdii ja digitála ovdáneami ávkkit davvin.

Ohcejoga váldostivrasáles dollojuvvon deaivvadeapmái oassálaste gieldda beales gielddahoavda Vuokko Tieva-Niittyvuopio, gielddaráđđehusa ságadoalli Ilmari Tapiola, giddodathoavda Markku Porsanger, čuvgehushoavda-rektor Virpi Veskoniemi, golggotmánus ovddidan- ja ealáhushoavdan álggaheaddji Johanna Mikkola, dieđiheaddji Aletta Lakkala, Vastuullinen matkailu Utsjoella -projeavtta hoavda Sonja Sistonen ja Deanuleagis sámástit -projeavtta máŋggagielatvuođaáššedovdi Laura Arola.

Eanangottehoavda Mika Riipi muitalii rahpansáhkavuorustis Lappi lihtu boahtteáiggi stuorra dáhpáhusain, ovdamearkka dihte Lappi-soahpamuša hábmemis, digitalisašuvnnain ávkkástallamis ja Lappi eanangotti iežas Green Deal -prográmmas.

– Eanangoddi, mii eallá luondduriggodagain ja luonddudiliin, galgá atnit fuola iežas guovllus, Riipi dajai sáhkavuorustis.

Ohcejoga gielddahoavda Vuokko Tieva-Niittyvuopio muitalii gieldda leat fuolas das, mo báikkálaš fitnodagat cevzet koronaepidemiija áigge ja mo Deanu guolástannjuolggadus váikkuha ain gildii.

– Suoma ráđđehusa doaimmat mátkkoštanealáhusa buorrin eai sihkkarit leat geange mielas doarvái. Dilli čuohcá maiddái rádjagávpái ja boazodollui. Deanu guolástannjuolggadusa negatiiva váikkuhusat geasseturismii oidnojit ain guovlluekonomiijas.

– Stáhta lohpidan gielddaiddoarjagiidda lea duohta dárbu vuoi mii fidnet ruhtadoalu vuot dássededdui. Mii vuordit stuorra beroštumiin boahtteáiggi ruhtadanvejolašvuođaid earret eará ovddidandoaimmaide, gielddahoavda muitalii.

Gielddahoavda Vuokko Tieva-Niittyvuopio muitalii Lappi lihttui earret eará koronaepidemiija váikkuhusain báikkálaš fitnodagaide.

Giddodathoavda Markku Porsanger muitalii gieldda bures lihkostuvvan, stuorra investeremiin ođđa skuvllaide. Vastuullinen matkailu Utsjoella ja Deanuleagis sámástit -projeavttat ovdanbukte iežaset doaimmaid, maid maiddái Lappi lihttu ruhtada.

Máŋggagielatvuođaáššedovdi Laura Arola muitalii čoahkkinvehkii giđđat álgán Deanuleagis sámástit -projeavttas, man maiddái Lappi lihttu ruhtada.