Ođđa gielddahoavda dearvvaha

Dearvvahus gieldalaččaide

Vuosttas bargovahku lohppii lea illu dearvvahit Ohcejoga gieldda ássiid. Mu bargui oahpásmahttin gielddadálus lea vuolgán fárttain johtui ja dovddan iežan hui buresboahtin Ohcejohkii.

Vuosttas bargovahku áigge lean oassálastán gielddaráđđehusa ja guovtti lávdegotti čoahkkimiidda. Lean čoahkkimastán gieldda koronadoaimmain ja oahpásmuvvan hálddahusa geavadiidda. Oahpásmuvvan iešguđet doaibmasurggiid áigeguovdilis áššiide álggii gáiddusčoahkkimiin jo golbma vahku dassái.

Ohcejogas leat bargan Vuokko Tieva-Niittyvuopio jođihemiin buori barggu 10 jagi áigge. Dás lea buorre joatkit. Mii seailluhat áššiid, mat leat buorit ja doibmet, muhto geahččat maid ovttas boahttevuhtii ovdagáttuid haga ja ođasmahtti mielain.

Fáhkka ráhkadusnuppástus, Deanu luossabivdogielddus ja korona dagahan rájáidgiddemat eai njeaidde min. Ohcejogas leat olu vejolašvuođat ja ođđa jurdagat eallinfápmomet nannema buorrin. Gielddaekonomiija leamaš jo guhká oalle buorre. Boahttevaš jagiid mii dárbbašat olu barggu ja ovddidandoaimmaid vuoi ekonomiija nanosmuvvá.

Dasa lea vejolaš beassat dušše buriin ovttasbargguin sihke gieldda siste ja čanusjoavkkuid gaskkas. Dušše dainna vugiin mii hukset boahttevuođa buresveadji Ohcejoga. Sávan, ahte mii sáhttit aktiivvalaččat ohcat oktasaš čovdosiid eallinfámu nanosmahttimii.

Ovttasbarggu njunušfidnu lea válmmaštallat ođđa gielddastrategiija, mii mearrida gieldda lagašjagiid doaimmalaš ja ekonomalaš váldomihttomeriid. Mii joatkit ain fáhkka ráhkadusnuppástusa hástalusaide reagerema earret eará aktiivvalaš ovdduidgohcimiin. Sámi giellaguovddáža doaimma álggaheapmi lea okta daid mearkkašahtti fitnuin, mat ovdánit dán jagi áigge.

Sode- ja gádjundoaimma bálvalusaid sirdašuvvan buresveadjinguvlui gáibida mis aktiivvalaš váikkuheami vuoi lagašbálvalusat seilot.

Ovdduidgohcima erenomáš čuozáhahkan lea sámegielat sode-bálvalusaid sihkkarastin. Lihkus oaččuimet Ohcejogas máŋggaid buriid luohttámušolbmuid buresveadjinguovllu mearrideaddji orgánaide. Sávan olu lihku vel buot válljejuvvon luohttámušolbmuide! Sode-ođastus rievdada maiddái gieldda organisašuvnna. Dán nuppástusa válmmaštallamii gullá aktiivvalaš ságastallan bargoveagain.

Gieldda eallinfámu nanosmahttima lassin lean erenomáš čatnasan ovddidit gieldda bargiidjođiheami. Buorre jođiheapmi buorida bargoburesveadjima, bargoaddigova ja ovttasbargama kultuvrra. Buorre bargoatmosfeara huksejuvvo ovttas ja dat oidno maiddái olggobeallái gieldalaččaide, geaid ovdii mii bargomet bargat.

Sávan, ahte beasan farggamusat giliguovddážiidda deaivat gieldalaččaid ja gieldda bargiid. Dalán go koronadili beales lea vejolaš, lea mus ulbmil vuolgit johtit giliin, vuos Gáregasnjárggas ja joatkit das johkaguora vulos girkosiidda bokte Njuorggánii. Deaivvadan mielas fitnodatdoalliiguin, bálgosiiguin ja servviid olbmuiguin.

Hálidan leat aktiivvalaš ságastallanoktavuođas gieldalaččaiguin. Válddán mielas vuostá evttohusaid dasa, mii livčče buoremus vuohki ságastallat áigeguovdilis áššiin ja gieldda doaimma ovddideamis. Evttohusaid sáhttá roahkkadit sáddet mu šleađgapostii: taina.pieski@utsjoki.fi.

Vaikko máilmmepolitihka dilli lea čáhppat ja bohciidahttá fuola mis buohkain, lea dehálaš konsentreret maiddái iežas árgii ja oktasaš áigái iežas lagamuččaiguin. Dat hukse vuođđodorvvu ruovttuin ja bargobáikkiin.

Buorre giđđa buohkaide!

Jovsset Biret Hánsa Taina, gielddahoavda