Ohcejoga cealkámuš sisáššiidministeriijai: Rádjaservoša meroštallan lea áibbas menddo gárži

Sisáššiidministeriijai 27.8.2020

Ohcejoga gielda ja Tenonlaakson yrittäjät -searvi leat fuolas das, ahte rádjaservoša dálá meroštallan ii buvtte dan ávkki, mii meroštallamis leamaš ulbmilin.

Rádjaservoša meroštallan lea áibbas menddo gárži. Davi gielddaid ássit galget beassat geavahit viidát rádjagielddaid bálvalusaid. Sisrájáid dárkkisteamit eai oaččo dagahit seammalágan dili, mii mannan giđa lei. Rádjagielddaid fitnodagat eai šat gierdda mannan giđa lágan ráddjehusaid, ja dál dahkkojuvvon meroštallan mearkkaša rádjagávppiide masá seammalágan dili go rájáid gidden livčče.

Dál mearriduvvon ráddjehusat ráddjejit measta buot áššehasaid geográfalaččat Ohcejoga gieldda olggobeallái. Ohcejoga ealáhusdoaibma dárbbaša iežas áššehasaid, olles ovddeš Finnmárkku leana guovllus. Norgga beale olbmot fitnet Ohcejogas gávppis guhkes mátkkiid duohken ja geavahit seammás earáge bálvalusaid, jearaldat ii leat dušše lagasgielddain iige eisige rájá birrasis. Jearaldat ii leat dušše borramušgávppiid doaibmannávccain, muhto maiddái váikkuhusain restauráŋŋa- ja hotealladoaimmaide, buresveadjinbálvalusaide, fuolahanbálvalusaide ja nu ain.

Guovllu gielddaiguin ja doaibmiiguin galgá dán dilis ságastallat das, mii lea rádjaguovllu beaivválaš vuorrováikkuhusa ja ealáhusdoaimma lunddolaš guovlu. Dálá meroštallamis lea gessojuvvon eahpelunddolaš rádjá gulakeahttá báikkálaččaid oainnu. Dat ii vástit guovllu ássiid ja ealáhusa dárbbuid.

Rádjaservoša meroštallama galgá viiddidit ja ođđasit rávvet jođánamos lági mielde. Ášši galgá dikšut Suoma rádjagielddaid ja ministeriija ovddasteaddjiid oktasaš ráđđádallamiin. Ohcejogas lea jáhkku dasa, ahte dárkkuhus soaitá leamaš buorre, muhto loahppaboađus ii buvtte dan ávkki, mii meroštallamis leamaš ulbmilin.

Ohcejogas 26.8.2020
Ohcejoga gielda
Vuokko Tieva-Niittyvuopio, gielddahoavda

Muita uutisia