Riskajoavkkuide gullevaš 12–15-jahkásaččat ja buot badjel 16-jahkásaččat sáhttet dál almmuhit iežaset koronavirusboahkoheapmái
21.6.2021
Ohcejogas koronavirusboahkoheapmái sáhttet dál iežaset almmuhit:
- Riskajoavkkuide 1 dahje 2 gullevaš 12–15-jahkásaš gieldalaččat
- Buot badjel 16-jahkásaš gieldalaččat
Boahkoheapmái sáhttá almmuhit iežas árgan maŋŋebárggas bearjadahkii dmu 12.30–15.30 riŋgemiin tel. 040 181 0288. Boahkohanáiggi fidne sullii guovtte vahku geahčái áiggivárremis. Ohcejogas leat anus mRNA-boahkut (Pfizer-Biontech Comirnaty ja Moderna).
THL ávžžuhusaid ja ákkastallamiid riskajoavkkuide gullevaš 12–15-jahkásaččaid boahkoheapmái sáhttá lohkat dákko.
Golbma siva, manin koronaboahkoheami gánneha váldit:
- Sáhtát vealtat duođalaš buohccáma – koronaboahkoheami ávkkit leat čielgasit stuorát go hehttehusat
Koronavirusdávda lea váralaš dávda, mii sáhttá duođalamosit doalvut jápmimii. Dávda sáhttá leat heaggaváralaš maiddái muđuid dearvvas olbmuide ja nuoraide. Koronavirusdávdda maŋŋá šaddi mearkkat (haksin- ja smáhkkaáiccu manaheapmi sihke nearva- ja geahpesmearkkat) sáhttet joatkašuvvat mánotbajiid.
Ohcejogas boahkoheamit dahkkojit Pfizer-Biontech ja Moderna boahkohanávdnasiin. Dáidda boahkohanávdnasiidda eai leat gávnnahan laktásit lassánan buđđosanriskka. MRNA-boahkohanávdnasiid hehttenváikkuhusat leat dábálaččat láivvi ja meattá manni, mearkkat sáhttet leat čuggensaji bávččas, feberreakšuvdna, goaluheapmi, oaivebávččas sihke deahkkebávččas. Siidomearkkat álget moatte jándora siste boahkoheami váldimis ja bistet moadde beaivvi. Dávdamearkkaid sáhttá dikšut bávččasdálkasiiguin.
Boahkohanávdnasiin lea dutkama mielde suodji maiddái ođđa virusvariánttaid vuostá, ovdamearkka dihtii MRNA-boahkohanávdnasiid guokte addosa addet India virusvariánta vuostá badjel 80-proseantasaš suoji.
- Mátkkošteapmi šaddá álkibun
EU koronaboahkohanduođaštus váldo Suomas atnui 22.6. EU ulbmilin lea koronaduođaštusain álkidahttit dorvvolaš ja friija johtima. Koronaboahkohanduođaštusaid sáhttá geavahit rájáid rasttildettiin EU-guovllus. EU koronaboahkohanduođaštus gávdno Omakanta-bálvalusas.
Boahkut álkidahttet mátkkošteami maiddái Suoma ja eará Schengen-riikkaid gaskkas, go Suopma dohkkeha 21.6. rájes riikiiboahtima EU- ja Schengen-riikkain earret eará olbmuide, geat leat ožžon guktuid boahkuid.
Váldimiin boahkoheami dál, gearggat vel oažžut suoji geasi mátkkošteami várás. Lasi áššis sáhtát lohkat THL siidduin.
- Boahkoheami váldin lea oppa servodaga ávki
Boahkohandoaimmaid ulbmilin lea fidnet čorasuoji: boahkoheapmi suddje boahkohuvvon olbmo lassin maiddái su lagamuččaid ja buohkaid servodaga riskajovkui gullevaš lahtuid.Ohcejogas rádjajohtin lea gieldda eallineaktu. Alla boahkoheami veagas mii nákcet maŋŋelis eastadit virusa leavvama sihke ovddidit rájáid rabas bissuma. Dása mii dárbbašat buot gieldda ássiid.
Maiddái turisma lea deaŧalaš ealáhus min gielddas. Alla boahkoheami mielde mii leat dearvvasvuođadorvvolaš ja geasuheaddji báiki geasseturisttaide.
Boahkoheami váldimiin dorvvastat maiddái dearvvasvuođafuolahusa guoddinnávcca: dearvvasvuođafuolahusa resurssaid ii šatta geavahit koronavirusepidemiija hálddašeapmái, ja daid sáhttá geavahit lági beales buorre vuođđodearvvasvuođafuolahusa fállamii gieldda ássiide.
Eambbo koronavirusboahkuin ja boahkohanortnegis sáhttá lohkat THL neahttasiiddus. Lassidieđuid fidne maiddái dearvvasvuođadivššáris tel. 040 758 2073 árgan dmu 8–9.