Váldostivra čoahkkana duorastaga 27.4. – čuovo čoahkkima njuolggosáttan dmu 14 rájes!
25.4.2023
Ohcejoga váldostivra. Govva: Studio Borga
Ohcejoga váldostivra čoahkkana duorastaga 27.4.
Váldostivra mearrida ođđa buresveadjinhoavdda válljemis. Gielddaráđđehus lea evttohan buresveadjinhoavdan hálddahusdiehtagiid magisttar Päivi Kontio su skuvlejumi, bargovásáhusa, gelbbolašvuođa ja jearahallama vuođul dahkkojuvvon oppalaš árvvoštallama vuođul.
Váldostivra vuođđudii ođđa buresveadjinhoavdda virggi čoahkkimisttis njukčamánus. Buresveadjinhoavda jođihišgoahtá Ohcejoga gieldda čuvgehusdoaimma, ja buresveadjima ja dearvvasvuođa ovddidanbarggu ja vástidišgoahtá bargoveaga ja bargoburesveadjima ovddideamis gielddahoavdda doarjjan. Virgái bohte mearreáiggis čieža ohcamuša. Gielddaráđđehus válljii ohcanáššegirjjiid ja gelbbolašvuođagáibádusaid vuođul jearahallamiidda guokte ohcci, hálddahusdiehtagiid magisttar Päivi Kontio ja filosofiija magisttar Kaisa Tapiola-Länsman. Tapiola-Länsman goittotge gesii ohcamušas maŋŋelabbos eret.
Váldostivra mearrida maiddái iešguđetlágan mearreruđaid dohkkeheamis earret eará Ohcejoga kirkosiidda sajádatlávvaproseassabarggu ja gieldda eanapolitihkalaš prográmma válmmaštallama váras.
ČUOVO ČOAHKKIMA NJUOLGGOSÁTTAN
Váldostivrra čoahkkimat leat buohkaide rabas. Čoahkkima leage vejolaš čuovvut njuolggosáttan Ohcejoga gieldda Youtube-kanálas duorastaga 27.4. sullii dmu 14 rájes. Čoahkkinbáddi lea oaidnimis kanálas maiddái njuolggosáddaga maŋŋá. Gielddadálus čoahkkima sáhttá čuovvut feaskkirlanja šearpmas.
Čoahkkimis lea simultánatulkon sámegielas suomagillii. Maiddái tulkojuvvon báddi almmustahtto Youtube-kanálas editerema maŋŋá.
OAHPÁSMUVA EVTTOHUSLISTUI
Sáhtát oahpásmuvvat čoahkkima olles evttohuslistui dákko. Čoahkkinbeavdegirji almmustahtto dárkkisteami maŋŋá neahttasiiddusteamet.