Gielddaráđđehus evttoha ođđa buresveadjinhoavdan hálddahusdiehtagiid magisttar Päivi Kontio
18.4.2023
Ohcejoga gielddaráđđehus mearridii vuossárgga 17.4. čoahkkimisttis evttohit váldostivrii, ahte gieldda ođđa buresveadjinhoavdda virgái válljejuvvo hálddahusdiehtagiid magisttar Päivi Kontio. Gielddaráđđehus dagai mearrádusas Kontio skuvlejumi, bargovásáhusa, gelbbolašvuođa ja jearahallama vuođul dahkkojuvvon oppalaš árvvoštallama vuođul. Váldostivra čoahkkana mearridit áššis cuoŋománu 27. beaivve.
Váldostivra vuođđudii ođđa buresveadjinhoavdda virggi čoahkkimisttis njukčamánus. Buresveadjinhoavda jođihišgoahtá Ohcejoga gieldda čuvgehusdoaimma, ja buresveadjima ja dearvvasvuođa ovddidanbarggu ja vástidišgoahtá bargoveaga ja bargoburesveadjima ovddideamis gielddahoavdda doarjjan. Virgái bohte mearreáiggis čieža ohcamuša. Gielddaráđđehus válljii ohcanáššegirjjiid ja gelbbolašvuođagáibádusaid vuođul jearahallamiidda guokte ohcci, hálddahusdiehtagiid magisttar Päivi Kontio ja filosofiija magisttar Kaisa Tapiola-Länsman. Tapiola-Länsman goittotge gesii ohcamušas maŋŋelabbos eret.
Gielddaráđđehus mearridii čoahkkimisttis maiddái earret eará, ahte Lappi buresveadjinguovlluin dahkkojuvvojit sode-doaibmasajiid láigosoahpamušat teknihkalaš lávdegotti evttohusa mielde ja ahte Juhunjarga 890-401-35-16 -nammasaš eanasaji gáddesajádatlávva biddjojuvvo johtui ja seammás dasa dahkkojuvvon oassálastin- ja árvvoštallanplána addojuvvo oaidninláhkai eallinfápmo- ja teknihkalaš lávdegotti evttohusa mielde.
ČOAHKKINBEAVDEGIRJI LOHKANLÁHKAI
Váldostivrra čoahkkima olles beavdegirjji sáhttá lohkat suomagillii dákko. Sámegiel beavdegirji almmustahtto jorgaleami maŋŋá.