Buresboahtin sámegielaid tulkkaid ja jorgaleaddjiid ossodatgotti pláneneahkedii duorastaga 25.11. neahta bokte!
5.11.2021
Kuva: Ville-Riiko Fofonoff / Saamelaiskäräjät
FUOM. OHCEJOGA DILÁLAŠVUHTII BOHTE NU UNNÁN ALMMUHEAMIT, AHTE LEAT MEARRIDAN DOALLAT DILÁLAŠVUOĐA OALÁT GÁIDDUSIN NEAHTA BOKTE. OAČČOT LIŊKKA DILÁLAŠVUHTII PROJEAKTAHOAVDA LEENA NISKAS, OKTAVUOĐADIEĐUT LEAT VUOLÁBEALDE.
Sámegiela dáiddus bargu -projeakta lágida ovttas Deanuleagis sámástit -projeavttain ossodatgotti pláneneahkeda sámegielaid jorgaleaddjiide, tulkkaide ja olbmuide, geat leat beroštuvvan bargagoahtit jorgaleaddjin dahje tulkan.
Dilálašvuohta lágiduvvo Hotel Utsjokis duorastaga 25.11. dmu 17–20. Dáhpáhusa lea vejolaš čuovvut maiddái gáiddusin neahta bokte.
Boađe guldalit áššedovdiid ovdanbuktimiid, ságastallat ossodatgotti vejolašvuođain ja oahpásmuvvat olbmuide. Eahkeda loahpas mii čielggadat, geat leat aktiivvalaččat beroštuvvan ossodatgotti vuođđudeamis ja soahpat čuovvovaš deaivvadeami. Oainnát dáhpáhusa prográmma dákko.
Lassedieđut:
Leena Niska
Projeaktahoavda, Sámegiela dáiddus bargu -projeakta
leena.niska@utsjoki.fi
+358 40 1942954
Mii Sámegiela dáiddus bargu -projeakta?
Dál sámeguovllu tulkkat ja jorgaleaddjit barget ollu okto. Oassi sis doaibmá priváhta fitnodatdoallin, muhto stuorámus oassi bargá jorgalan- ja tulkonbargguid bargogaskavuođas, nu ahte guhtege ovttaskas bargodáhpáhusa várás galgá čállit ovdamearkka dihte beaivvi guhkkosaš bargosoahpamuša. Bálvalusa diŋgojeaddjái dát doaibmamálle lea hiđis ja barggaha ollu, dasgo bargoáigi gollá ollu oktavuođaid doallamii.
Projeavtta ulbmilin lea hábmet sámeguvlui, vuosttas sajis Ohcejohkii, sámegiela tulkon- ja jorgalanbálvalusaid čohkiidusa, mii doaimmašii ossodatgotti hámis dahje eará fitnodatdoaimma vugiiguin. Ulbmilin lea sihke buoridit sámegielat jorgalanbálvalusaid fitnašuvvama ja hábmet vuollegis šielmmá fitnodatdoaimma. Projeavttain geahččalat vástidit tulkon- ja jorgalanbálvalusaid diŋgojeaddjiid dárbbuide, ja fuolahit ahte sii sáhtášedje háhkat bálvalusaid njuovžilit ovtta sajis. Projeavttain ráhkkanat maiddái dasa, ahte ođđa buresbirgenguovllu mielde tulkomiid ja jorgalusaid dárbu lassána.
Sámegiela tulkon- ja jorgalanbálvalusaid dárbbašat ovdamearkka dihte giellalágas meroštallon bálvalusaide, muhto maiddái eará jorgalanbargguide nugo iešguđetlágan cealkámušaide, projeaktateavsttaid jorgaleapmái sihke turismabrošyraide. Ná sámegiela dáidu ja dan lassin maid kultuvrra dovdamuš lea dakkár máhttu, mii lea oalle buorre vuođđu fitnodaga doallamii sierra hámiin.
Projeakta ollašuhtto áigodagas 1.9.–15.12.2021. Ruhtadeaddjin lea Leader Pohjoisin Lappi ry.