Deanuleagis sámástit -projeakta ohcá áššedovdinuoraid ođđa Deanuleahki-dihtorspealu ovddideapmái
Speallu lea oaivvilduvvon erenomážit mánáide ja nuoraide, ja dan dihte projeakta hálida, ahte nuorat leat mielde spealu huksemis gitta álggu rájes.
Deanuleagis sámástit -projeakta ohcá áššedovdinuoraid ođđa Deanuleahki-speallomáilmmi ovddideapmái.
Deanuleagis sámástit lea guovttejahkásaš Interreg Nord -projeakta (2020–2022), man váldoulbmilin lea nannet Deanuleagi sámegiela ja árbedieđu, ja fállat ođđalágan sámástanlávddiid Deanuleagi olbmuide.
Projeakta earret eará buvttada áibbas ođđalágan dihtorspealu, olles virtuála oahppanbirrasa, Deanuleagi sámegiela ja árbedieđu birra. Deanuleahki-nammasaš speallomáilmmi lea vejolaš speallat dihtoriin ja dat lea oaivvilduvvon maŋŋá earret eará skuvllaid atnui. Speallu ráhkaduvvo ovttasbarggus Kajaani ámmátallaskuvlla Clever Simulation Entertainment -ávkespeallojoavkkuin.
Speallu lea oaivvilduvvon erenomážit mánáide ja nuoraide, ja dan dihte projeakta hálida, ahte nuorat leat mielde spealu huksemis gitta álggu rájes. Projeakta ohcá dál áššedovdibargui guokte nuora Suoma bealde ja guokte Dáža bealde. Barggus galgá earret eará speallat, hutkat ja oassálastit čoahkkimiidda ja bargobájiide. Deaivvadeamit leat sullii oktii mánus miessemánu 2021 rádjai. Barggus máksojuvvo bálká.
Ohcci galgá leat 12–16-jahkásaš nuorra, geas lea vásáhus dihtorspealuin. Projeakta sávvá lassin, ahte ohcci lea hutkái ja liiko hástalusaide.
Jos leat beroštuvvan de čális maŋimustá sotnabeaivve 15.11., manin eiddo don heivešit dán bargui.
Kati Eriksen, projeaktahoavda
WhatsApp / puh. +358 40 594 5060
Facebook Messenger @deanuleagissamastit
Loga lasi Deanuleagis sámástit -projeavtta doaimmain, ulbmiliin ja projeaktaveagas projeaktasiiddus.