Dieđáhus Ohcejoga gieldda máŋggadoaimmadáluid huksenbargguid gohcima háhkamis

Ohcejoga gieldda jagiid 2018–2021 háŋkemat, mat leat guoskan ođđa máŋggadoaimmadáluid huksemiid gohcinbargguid, bohciidahtte mannan vahkus ságastallama earret eará medias ja somes.

Ohcejoga gielddaráđđehus ásahii jagi 2018 nu gohčoduvvon vistebargojoavkku (su. tilatyöryhmä) doarjut teknihkalaš doaimma golmma investerenprošeavtta ollašuhttima Ohcejoga gielddas. Ohcejoga gielda lea huksehan jagiid 2018–2021 ođđa skuvla-máŋggadoaimmadáluid golmma giliguovddážii Ohcejohkii, Gáregasnjárgii ja Njuorggámii. Ohcejohnjálmmi ja Gáregasnjárgga ođđa skuvla-máŋggadoaimmadáluide besse fárret mannan čavčča, ja Njuorggáma máŋggadoaimmadállu lea gárvvis boahtte čavčča. Njuorggáma skuvlla huksen lea maŋŋonan, daningo agoartaváldi koŋkánii mannan čavčča.

Gieldda vistebargojoavku lea gullan proseassa iešguđet muttuin iešguđet oassebeliid, ovdamearkka dihte skuvllaid ja árrabajásgeassima bargoveaga ja lanjaid eará geavaheaddjiid, jurdagiid ođđa doaibmasajiin ja addán dán dieđu ovddosguvlui oassebeliide, mat ollašuhttet huksenprošeavttaid. Vistebargojoavkku lahtut leat molsašuddan prošeavtta ja huksema iešguđet muttuin. Váldostivrra mearrádusa ollašuhttimis vástidit virgehálddašeaddjit, teknihkalaš lávdegoddi ja gielddaráđđehus.

Huksenprošeavttaid gohcima olles submi leamašan sullii 240 000 euro, mii lea juohkásan golmma iešguđet prošektii golmma jahkái. Ohcejohnjálmmi máŋggadoaimmadálu gohcima oassi leamašan sullii 99 000 euro, mas logahaga gohcima oassi sullii 20 000 euro, Gáregasnjárgga máŋggadoaimmadálu oassi leamaš sullii 64 000 euro ja Njuorggáma máŋggadoaimmadálu oassi sullii 69 000 euro. Našunála háhkamiid gilvalahttima 60 000 euro rádjá lea ná mannan badjel.

Gielddahoavda Vuokko Tieva-Niittyvuopio mieđiha, ahte teknihkalaš doaimma investeremiidda gulli goncinbargguid háhkama livčče galgan gilvalahttit. Dasa, manin barggut eai leat gilvalahtton, leat váikkuhan máŋggat áššit.

– Huksengohccin doaibman gohcci-inšenevrras lei jo árat leamašan bargogaskavuohta gielddain, ja son bođii lunddolaččat mielde teknihkalaš doaimma veahkkin, go plániimet huksenprošeavtta. Álggushan mii čielggadeimmet, sáhttitgo divvut Ohcejohnjálmmi boares skuvlla dalle dahkkon ortnetčielggadeami vuođul. Ođđa skuvlla huksema guoski mearrádus dahkkojuvvui jagi 2019 bušeahttaárvalusa investerenplánii, Tieva-Niittyvuopio muitala.

– Proseassa áigge bohte ovddal máŋggat oalle vuorddekeahtesge áššit, dego gohcci barggu máŋggabealatvuohta ja prošeavttaid stuorra hástalusat. Prošeavttaid áigge eai boahtán ovdan áššit, mat livčče addán siva gilvalahttit gohcima oasi prošeavttas. Ná maŋŋelgihtii go árvvoštallat dili, livčče galgan meannudit earáláhkai. Ášši hálddašeamis leamašan dákko buohta váilevašvuođat.

Gielddahoavda Vuokko Tieva-Niittyvuopio joatká, ahte loahppabohtosii leat váidalahtti váikkuhan máŋggat áššit, maiddái dakkár áššit, maid ii sáhttán diehtit ovddalgihtii ja dan dihte váldit vuhtii.

– Okta dákkár ášši lei Njuorggáma prošeavtta agoartaváldi koŋkáneapmi. Dathan dárkkuhii, ahte álgomuttu bargguid galggai bargat guktii. Konkursagohcimis dáid liigegoluid sáhttá dieđusge gáibidit ruovttoluotta, muhto boađus lea eahpesihkkar.

Tieva-Niittyvuopio hálida goittotge deattuhit, ahte gohcima guoski háŋkemiin ii leat šaddan gildii ruđalaš dáhpa. Sullii 10 miljovnna hukseninvesteremiid bušehttii lei várrejuvvon ulbmilhaddemeannudeami vuođul 5,5 proseantta gohcci- ja hukseheaddjigoluide (sullii 550 000 euro), go dál loahpalaš submi lei sullii 2,4 proseantta (240 000 euro). Dát sisttisdoallá maiddái goluid, earret eará mátkegoluid buhtadusaid. Mátkegolut leat mearkkašahttit, go gaskkat leamašan guhkit.

– Bargogaskavuođain barggahuvvon gohcin oktan bálká- ja bargoaddigoluiguin ja sierrabuhtadusaiguin, earret eará mátkegoluiguin, livčče šaddan unnimustá seamma divrrasin go dál loahpalaš golut, gielddahoavda Vuokko Tieva-Niittyvuopio čilge.

Gielda lea duđavaš gohcinbargui ja bures lihkostuvvan skuvlaprošeavttaid loahppabohtosii. Máŋggadoaimmadálut leat gárvánan jođánit ja plánejuvvon áigetávvala mielde, earret Njuorggáma skuvla, mii lea agoartaváldi reastaluvvama dihte maŋŋonan.

Ohcejoga gielddaráđđehus čoahkkanii vuossárgga 31.5. ságastallat áššis. Ruhtadoallodárkkisteaddjit leat dárkkistan gieldda ruhtadoalu ja hálddahusa jagis 2020 (maiddái gohcima guoski háhkamiid) ja evttohan, ahte gielddaráđđehussii ja virgeolbmuide, geain lea rehketdoallogeatnegasvuohta, mieđihuvvo rehketdoallo- ja ovddasvástádusfriijavuohta. Loahpalaččat áššis mearrida gieldda váldostivra čoahkkimisttis geassemánus.

Lassidieđut:

Vuokko Tieva-Niittyvuopio
Ohcejoga gielddahoavda
Tel. 0400 933 754
vuokko.tieva-niittyvuopio@utsjoki.fi