Geahčastat Ohcejoga gielddas ordnejuvvon gilieahkediidda: Dál lea dehálaš bargat ovttasráđiid
30.6.2022
Ohcejoga gielda ordnii geassemánu álggus buot gieldda olbmuide rabas gilieahkediid Ohcejoga girkosiiddas, Gáregasnjárggas ja Njuorggámis. Gilieahkedat leat gieldda olbmuide buorre dilálašvuohta čohkkedit káffe- dahje teadjagohpa gurrii ságastallat gieldda virgeolbmuiguin ja luohttámušolbmuiguin. Gilieahkediin sáhttá buktit ovdan gažaldagaid, mat jorret mielas, ja maiddái jurdagiid ja ideaid gieldda ovddideami várás. Gieldda olbmuid buktin diehtu lea dehálaš sajádagas, go guorahallat gieldda boahttevuođa, ovdamearkka dihte projeaktabarggu deattuhusaid dahje dan, man guvlui gieldda imago ja brándi galggašii ovddidit.
Gilieahkediid rabai gielddahoavda Taina Pieski, guhte oanehaččat muitalii gieldda áigeguovdilis áššiid birra. Dan maŋŋá gieldda ovddasteaddjit dolle oanehis ovdanbuktima doaibmasurggiid mielde. Juo nuppi jagi bisti luossabivdogildosa sihke korona váikkuhusaid geažil Ohcejoga gieldda ekonomalaš dilli lea váttis. Duššefal luossabivdogildosa dagahan ekonomalaš táhpa gildii lea sullii vihtta miljovnna euro jagis. Guovtti jagi maŋŋá váikkuhusat badjánit nappo juo logi miljovnna euroi – ja smávva gildii dát čuohcá sakka. Dábálaččat gielda ohcala fáhkkes ráhkadusnuppástusa gieldan dalle, jos guovllus doaibmi stuorra fabrihkka dahje eará mearkkašahtti bargoaddi loahpaha doaimmas. Min gielddahoavda leage veardidan Deanu luossabivdogildosa fabrihkkii, mii lea dál Ohcejogas heaittihuvvon. Dán veardádusa leat dolvon aktiivvalaččat maiddái riikka ministariidda diehtun.
Ohcejoga gielda lea dahkan mearkkašahtti investerema, go dat lea huksehan buot giliguovddážiidda ođđa ja modearna skuvla-máŋggadoaimmadáluid. Go investerenmearrádusaid dahke, ii oktage sáhttán diehtit, ahte doaibmabiras boahtá rievdat ná jođánit korona, luossabivdogildosa ja Ukraina soađige geažil. Jagi molsašumis sirdásat maiddái sode-buresveadjinguovlun, mii buktá mielddis vel iežas váikkuhusaid gieldda ruhtadillái. Dahkkon investeremiid geažil gielddas lea vealgi sullii 11 miljovnna euro, ja dán jagi vealggi gártá váldit vel sullii miljovnna veardde lasi. Gielddahoavda Taina Pieski deattuhii gilieahkediin, ahte gieldda ekonomiija ii fidne dássededdui dušše seastindoaimmaiguin, baicce dárbbašat maiddái eará doaimmaid ja resurssaid, mainna ođđa ealáhusaid sáhtášii ovddidit. Dat ii leat goit dušše hástalus, baicce maiddái vejolašvuohta jurddašit áššiid birra ođđa vuogi mielde!
Ohcejoga gielddas lea jagiid mielde meroštallon, ahte ovdamearkka dihte bieggafámu dahje ruvkkiid eat guvlui hálit. Dan sadjái vásttolaš turismma leat oaidnán boahttevuođas potentiála ealáhussan, man nannema ovdii leatge dál bargamin projeaktadoaimma bokte. Gilieahkediin buktojuvvui ovdan fuolla ealáhusráhkadusa ovttabealatvuođas: Ohcejogas ii galggaše bidjat resurssaid dušše turismii, baicce geahččalit gávdnat lassin maiddái eará čovdosiid. Gielddas leage aiddo biddjon johtui projeakta, mainna čielggadit earet eará fitnodagaid vuolleháhkandárbbuid ja dan bokte vejolašvuođaid ođđa fitnodatdoaimmaide. Projeaktadoaimma bokte leat čielggadan maiddái fitnodatdoaibmavejolašvuođaid, mat vuođđuduvvet sámegillii ja -kultuvrii.
Ealáhusaid ovddideamis deaivida dávjá hástalusaid gávdnat čeahpes bargiid. Bargiid gávdnamis leat hástalusat nu gieldda go priváhta dásisge. Problema lea máŋgga suorggis riikkaviidosaš. Mii dáppe guhkkin davvin gilvalat seamma bargiin, eat dušše Lappi guovllus, muhto oppa riikkas. Vai mii sáhttit sihkkarastit doarvái bargofámu ja čeahpes olbmuid ohcaleami Ohcejoga rabas bargobáikkiide, ferte gieldda brándi ovddidit dan guvlui, ahte dat geasuha buorebut bargiid. Brándi ferte maiddái aktiivvalaččat vuovdalit. Lassin dárbbašat ođđalágan, roahkkadisge rahpamiid bargiid hohkaheami várás. Dánge barggu doarjut projeavttaid bokte, mat leat dál jođus. Gieldda brándi ja eallinvuoibmi váikkuhit mearkkašahtti láhkai maiddái priváhta investeremiid fitnašuvvamii.
Gieldda geasuhan- ja bisuhanfápmui guoski áššit bohciidahttege ságastallama buot gilieahkediin. Olbmot guorahalle viessodili ja gieldda láigoviesuid ortnega, giligeainnuid čorgatvuođa ja geasuhahttivuođa sihke vejolašvuođaid asttuáiggedoaimmaide, earet eará čuoiganláhtuid ortnegisdoallama. Ovdan bohte maiddái bázahusfuolahus, geahppa johtolaga jođáhagaid lasiheapmi buot giliide sihke telefon- ja interneahttafierpmi itkoguovllut. Juohkeokta mis sáhttá dahkat iežas oasi Ohcejoga geasuhan- ja bisuhanfámu lasiheami ovdii ovdamearkka dihte váldimiin gildii ođđa olbmuid vuostá dan láhkai, ahte sii dovdet iežaset buresboahtin servošii. Maiddái iežas giddodaga birrasa sáhttá doallat ortnegis ja čorgadin. Buot dáid áššiin lea mearkkašupmi, go gilvalat bargiin – ja leathan dat hui dehálaččat maid gieldda dálá olbmuid buresveadjima dáfus.
Gilieahkediin nu gielddahoavda, gielddaáirasat go giliolbmotge deattuhedje maid ovttasbarggu dehálašvuođa. Ohcejohka lea eatnandieđalaš sajádaga dáfus erenomáš gielda; dat buktá hástalusaid gieldda doaimmaide, muhto maiddái vejolašvuođaid, mat eai máŋggain eará gielddain leat. Vai dáid vejolašvuođaiguin beasašeimmet nu bures go vejolaš ávkkástallat, de lea dehálaš bargat ovttasráđiid. Nu mo gilieahkediin gávnnahuvvui, de ovttasbargu, ovttas doaibman ja oktasaš čovdosiid gávdnan leat eaktun smávva gieldda eallinvuoibmái ja seailumii iehčanas gieldan.
Stuorra giittus giliolbmuide ealaskas ja ovdánahtti ságastallamis. Oaidnalat fas boahttevaš gilieahkediin!
Buori geasi buohkaide!
Taru Lindell
Projeaktahoavda
uKoordinaatio -projeakta
+358 40 154 3649
taru.lindell@utsjoki.fi
