Gielddahoavdda dearvvuođat 20.8.2020

geassi jorggiha čavčča guvlui ja luomut leat eanaš dollojuvvon, doaivvu mielde lehpet vuoiŋŋastan ja čoaggán fámuid! Geasset mii beasaimet eallit ráfálaš áiggiid koronaepidemiija dáfus. Máŋggaid virggálaš ráddjehusaid lei vejolaš burgit ja geahpedit. Lei vejolaš deaivat ustibiid ja čoahkkanit oktii, orui dego eallin livčče rievdan ođđa normálan. Geassi manai korona dáfus bures, gielddas eai lean njoammumat iige mis lean dárbu erenoamášdoaimmaide.

Muhto eathan mii dáppe Ohcejogasge leat dorvvus máilmmiviidosaš epidemiijas – ja ná čavčča álgui oaččuimetge albma muittuhusa das, ahte epidemiija leamaš ja lea ain jođus. Ohcejoga seaŋgaossodagas leat gávdnon guokte koronavirusnjoammuma. Mii leat testen pasieanttaid ja bargoveaga, guoradan njoammunbálgáid ja addán dárbbašlaš karantenarávvagiid. Mannan giđa sohppojuvvon doaibmarávvagat leat dál anus ja dilli hálddus.

Seaŋgaossodaga ja eará doaibmabáikkiid ássiid oapmahaččain lea sihkkarit stuorra fuolla, muhto bargoveahka lea ožžon skuvlejumi dákkár diliid váras ja mii sáhttit luohttit dasa, ahte sii barget iežaset buoremusa ja ámmátdáidduin. Oktavuođaid lea vejolaš doallat maiddái gallestallangildosiid áigge, ja oapmahaččaide sáhttá riŋget ovdamearkka dihte WhatsApp- ja Facetime-applikašuvnnaiguin. Váldet bargovehkii oktavuođa dán ášši ordnemis.

Dán dilis mis juohkehaš galgá čuovvut daid almmolaš rávvagiid, maid birra leat muhtumiid mielas hoahkan jo doarvái; giehtahygienia, dorvogaskkat, suodjemáskkaid geavaheapmi almmolaš báikkiin ja dalle, go ii leat vejolaš doallat doarvái gaskka eará olbmuide, ja ruovttusbissun dalle, go olbmos leat vuoigŋanoali dávdamearkkat. Riskajoavkkut ja sin lagasolbmot galget vuot váldit ávžžuhusaid duođas ja čuovvut daid. Rávvagiid ja ávžžuhusaid ferte čuovvut. Mis juohkehaš sáhttá váikkuhit dasa, ahte koronaepidemiijadilli ii vearrán.

Go árga álgá ja mánát sirdásit lagasoahpahussii ja beaiveruktui, bohciidit mielas máŋggalágan gažaldagat. Leago gáiddusoahpahusas lagasoahpahussii sirdáseapmi dorvvolaš, leago mánáid dorvvolašvuohta sihkkaraston skuvlasáhtuin, mo de jos mánná buohccá? Skuvlabarggu stivrejit dál máŋggat rávvagat. Vánhemat, háleštehket mánáiguin ja nuoraiguin das, manin lea dehálaš čuovvut rávvagiid ja mearrádusaid, maid skuvllat addet.

Deattuhan velá lohppii, ahte dilli lea min hálddus, mii leat dasa ráhkkanan ja ceavzit das. Gielda dieđiha iešguđet doaimmaid ja bálvalusaid áigeguovdilis dilis, ja ávžžuhan buohkaid čuovvut dál gieldda neahttasiidduid. Ruovttuide sáddejuvvojit maiddái báberdieđáhusat dili birra!